عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم …
اليوم عندي موضوع شاغلن اغلب الشعب اذا مو كلهم
اكيد كل وحده فينا تتمنى تلف بلاد العالم بس لمن تجلس هي وزوجها يحسبون للأسف يطلع السفر عليهم غالي..
طبعا لابد يكلمون فلان اللي سافر سويسرا 10 ايام كم كلفتك .. لااا يافلان تراها غاليه حيل كلفتني حدود 30 الف < مجرد مايسمع الطرف الثاني هذا المبلغ يهون عن السفرة ويلجأ الى السياحة في مملكتنا الحبيبة .. ويكسر خاطر المدام اذا مو الاولاد بعد:D
تصدقون ولا ماتصدقون .. < تذكرت برنامج صدق او لا تصدق اللي كان يجي ع القناة الثانية
المهم تصدقون ان سفرتي قبل اسبوع لدبي ماكلفتنا الا 3500 ريال عدآ ونقدآ …
ولا ترا بعد يقالنا مسرفييييييين بقووة..
ولا بعد ساكنين بفندق 4 نجوم ومعه افطار مجاني ❗
وماتركنا مكان ماطبينا فيه..
وصديقتي وزوجها جلسو اسبوع مثلنا ولا في وسط الدراسة رايحين .. يعني مختارين هالوقت عشان مايصير وقت موسم ومصاريف زيادة ..
وكلفت عليهم 20 الف ريال عدآ ونقدآ ..
ولمن اسألهم .. رحتو كذا شفتو كذا .. كله يقولون لا 😎
طيب طلعتو برج خليفة .. لا
طيب ركبتو قارب .. لا
طيب رحتو ملاهي .. لا
اجل وين رحتو
قالت اممم رحنا دبي مول ومريت صالون جويل ورحنا للـ ويلد وادي
بس عجزت ابلع هالعشرين .. قلت ايه شكلكم تتعشون مندي جمل كل يوم 😛 <
طيب صدق او لا تصدق ..
ان زوجي لقا فندق في لندن في هذه الاجازة شهر كامل 5000 ريال فقط
صدق او لا تصدق .. تو من باب البلاغة سوا الهازبند بحث فنادق .. اغلى مــــــــــــــــــــــدينة بالعالم ..
(( طوكيو))
عاد مايحتاج اليابان غااااليه جدآآآ جدآآ والمعيشة عندهم موت ..
لدرجة وحده اعرفها راحت لليابان مع ابوها ” رحلة عمل اسبوع لأبوها ” تقول تخيلي اللموزين هناك عشان مشوار قريب مرررة بـ 1500 ريال
< يعني فايف ستارز بـ 8000 لمدة 10 ليالي 😆 idea:
ترا هذي كلها مقدمة مادخلنا زبدة الموضوع<< 😎 <
كيفكم ترا الموضوع لمصلحة الجميع وفيه اسرار خاصة جدآ للسفر بأرخص الكاليف ..
وحده من صديقاتي تبي تسافر هي واختها واخوانها لدبي وميزانيه كل واحد منهم 5000 ريال ..
يعني المجموع حدود 25 الى 30 الف عشان اسبوع واحد ..
وفجأه هونو يسافرون .. جاء صديق اخوها وقال انا توني جاي والله دبي موت موت موت غاااليه حيل ..
صراحة تفاجأت قلت تصدقينه وانا مثال حي امامك اقولك والله دبي رخيصة ومو اول مرة ازورها هذي ثالث مرة اجيها ..
وعلمتها وفهمتها وشحنت راسها البارح بالمسن لحد مافهمت وقلت فهمي اخوتس لأتصرف معه انا < اوخص ياقويه
يابنات السر الاول والاخير هو موقع حجز الفنادق وهو ” www.booking.com/hotels
دائما قبل تسافرون تابعو هذا الموقع وفتشو زين مازين راح تلاقون عروض بالهبل فيه ..
يعني مثل عرض فندق سبع ليالي في دبي من 7500 ريال الى 1300 مع توصيل يومي لشاطيء الجميرا مجانا وساعة مساج مجانآ .. وخصم مادري كم بالميه ع المحلات معينة من ضمنها محل مجوهرات .. .. طبعآ هالعرض انتهى
وحلات هذا الموقع انه ماتدفعين الا اذا وصلتي الفندق نفسه والالغاء غالبآ مجاني
وتلاقي فيه اراء النزلاء وتقييم الموقع للفندق نفسه مع يبين لك موقع الفندق بالخارطة وكل شيء .. يعني شامل ..
“”ومجرب مني شخصيآآآآ “”
وتراها لجميع فنادق وشقق العـــــــــــــــــــــــــــــــــــــــــــــــ ــــــــــالم 🙂
ونصيحة مني ونصيحة قالها بعد الكاتب في جريدة الرياض ” فهد الأحمد “
دائما لاتفكرو تحجزو فنادق غاليه وبالمقابل هناك فنادق سعرها مناسب ونظيفة وكل شي
او تلاقو بدل فندق شقق اكبر واوسع بنفس سعر فندق ..< طبعا ماقصد فيها فنادق وشقق السعودية .. لا هذولا حاذفتهم من موضوعي نهائيآ 😀
فيه هنا وحده اسمها ع ماعتقد ” ام رغد ” نزلت تقرير سفرتها الى سويسرا العام الماضي وانهم زارو حتى الريف الفررنسي .. وانا شفت تقرير زوجها 15 يوم بـ 16 الف
وردت عليها وحده شلون انا رايحة لها شهر عسل كلفت 40 الف
بالرغم اني شفت تقريرها ويقالهم اسرفو وشرو مقاضي الاكل من هناك .. شلون لو سافرو ومعهم اغراضهم كامله .. راح تصير اقل من هالسعر وبكثير ..
ام رغد احس تفكيرهم مثل تفكيري انا وزوجي .. هو الحجز من بدري واستغلال العروض وانه مايهمهم فندق 5 نجوم او 3 نجوم .. لأنه بالنهايه بيصير للنوم فقط ..
نصيحتي لمن تنون السفر لازم يكون من بدري الاستعداد له لايقل عن 5 اشهر اذا كانت دولة غير خليجية ..
اما حجوزات الطيران تابعوها اول بأول لاتعتمدو ع الطيران السعودي .. لا ابحثو عن الخطوط الاخرى .. صحيح فيها ترانزيت بس اذا مقابل السعر فرق بينه وبين الطيران السعودي .. يفداه الترنزيت وتعبه ^_^
برضو تابعوها ع مواقع الخطوط .. ومايحتاج احط لكم روابطهم سهله فقط اكتبي اسم الخطوط بالعم قوقل وهو مايقصر ..
التسوق : خصصي له مبلغ معين من قبل تسافرين .. خلاص هالمبلغ خاص للتسوق فقط ..
وحاولي سفرك يكون ع وقت التخفيضات وهو شهر 7 و 8 بالميلادي ..
sorry غثيتكم بالكلام الكثير وسلامة عيونكم من القراءة ..
وهذا كل ماعندي .. واي بنت عندها نصيحة او فكرة لا تبخل علينا
واتمنى لكم سفرآ سعيدآ ➡
