لو ما احبكم ماحذرتكم من هالمنتج وعن تجربه والله

السلام عليكم
بادخل بمو ضوعي ع طول
انا حبيت احذركم من منتج ينباع بهالمنتدى يخص الشعر وباحكيلكم تجربتي اللي والله بكيت قهر ع شعري اللي خسرته ومدري وش اسوي عشان يرجع شعري مثل اول
من البدايه انا صار لي فتره طويله اقرا بالمنتدى عن منتج كوين هير لفرد الشعر
وبعد ماقرات داخل وخارج المنتدى عنه وعن تجارب البنات قررت اتوكل ع الله واستخدمه اتصلت باحدى التاجرات وطلبت علبتين لي وللوالده وكانت للامانه قمه في الذوق والتفاهم هالتاجره حتى اذكر اول مره طلبته وكانت بتجيبه لي وتعبت بنتي وطرحت اوديها امستشفى اتصلت فيها وكانت في الطريق واعتذرت
وقالت مو مشكله متى ماسمحت ظروفك كلميني واجيك
وفعلا اليوم الثاني جابته لي وشرحت لي طريقة استخدامه بالتفصيل الممل
واصلا هو يجي معه ورقه بالتفصيل
المهم عجنته بالليل الساعه 1 تقريبا وقمت الصبح واستشورت شعري خصله خصله يعني وربي سدحته وذبحت امه استشوار وبعده بالسيراميك
وربي ياشعري تقولي شعر يابانيه من النعمومه لاله الا الله هههههه
المهم اخذت خصل صغار وبديت احطه بنفس الطريقه اللي قالت لي ومكتوبه كمان
لين خلصت
سويته تقريبا الساعه 9 الصباح واخذ وقت لانه له طريقه معينه المهم تركته ع شعري 3ساعات ونص
وغسلته وكان شعري نااااااااااااااااااشف وربي مايدخل المشط فيه وحطيت حمام زيت لمده 3ساعات مثل مو مكتوب بالورقه
ولافي نتيجه شعري تقول سلك مواعين
وكررت هالطريقه لمدة 3 ايام والله تعبت مع شعري مايتحسن ابدا وصار يتساقط بشكل مخيف والله صرت اخاف اصلع ووهذا غير الريحه الكريهه اللي لها اليوم ماراحت من شعري
اتصلت بالمندوبه وحكيت لها اللي صار
واستغربت وحلفت لي هذه اول مره يصير كذا
والله يابنات صار لي 3 شهور من غلطت هالغلطه بحق شعري
ومن السوء للاسوا
والله خسرت شعري
المصيبه قبل يومين تعبت وسخونه وكذا
ومامشطت شعري ههههههههه
يعني اقولها لكم بصراحه يومين لامه شعري
وربي وربي يابنات يالمشط مايدخل فيه وماخليت شي ماحطيته مو راضي ينمشط

هذه تجربتي السيئه مع المنتج انا ماذكرت اسم المندوبه لحسن تعاملها معي ولان مشكلتي بالمنتج مو بالمندوبه
واللحين يارب ياودوود اللي تعطيني حل لمشكلة شعري ترزقها من حيث لاتحتسب وتوفقها بحياتها ودنياهاواخرتها
الحقوني تكفون والله ياشعري مايدخله المشط وكل محاولاتي مع حمام الزيت والفاشكول بائت بالفشل
والله يالخميس عندي زياره كيف اروووح وشعري لازق بقفاي
انتظركم