عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بسم الله الرحمن الرحيم
السلآم عليكم ورحمة الله وبركاته ..
الزمان : على أيام جهاز جوال البصمه ( أبو أنتل )
المكان : عند بيت أم صالح ..
إسم القصة : بنات شرق الرياض <- أبد ماسرقت اسم الرواية وحرفت فيه
نوع القصه : حزينه
الشخصيات : أنا (مزنه) / جدتي / حصيصه / نوره / سعاد / اميرة الغنية / وحنان المطوعه ..
http://lolitta111.googlepages.com/faaaseeel.gif
جالسة بالملحق وفاتحه على غصب واحد (الأولى) .. وأتأمل في ملامح المذيع حق الأخبار منب قايلة
أسمه .. وأقول في نفسي ياحظ أمه ماتعبت بولادته ، شكلها تبي تقلد المسلسلات وتصارخ لاجت بتولد
، مامداها فاتحة فمها ناويه تصارخ الا وهو طالع من شدة قصره .. (لاتطالعوني كذا وتقولون اني اذب
على العالم بالعكس انا قاعده احسد امه على سهولة ولادته ) .. وبينما كنت أتابع الأخبار .. كان صوت
التلفزيون عااالي : حضر حفل افتتاح بقالة سلة الغذاء فلان بن فلان آل فلان .. وحضر أيضاً فلان بن فلان
الفلاني .. وحضر ……… قطع صوت التلفزيون صوت جدتي : حضروا جنازتتس بلا .. وراتس متزويتن عن
المطبخ ؟ لاشغل ولا مشغله ، ومن زين الحلايا خاقه مع المذيع .. قلت : ياختي قسم بالله لو فيه اشهب
الهب غيره بذا التلفزيون كان خقيت معه . مافيه الا هو مقابلني 24 ساعه بهالشاشه ..
قطع حديثنا صوت المذياع : حدث مساء اليوم القبض على الخطابة أم حمود وهذا بسبب أنها مقروده فكل
ماجمعت بين زوجين تطلقوا ، ولانعلم السبب الحقيقي لهذا الطلاق ……. ومير أول ماسمعت هالخبر وهو
يطري لجدتي العرس
جدتي : هيه فلبينو (تناديني) وانتي ريضتن عندنا ؟ ، ماودتس تعرسين ؟! نعنبو حيتس مريم بنت الجيران
اعرست وهي أصغر منتس بخمس سنين ، وسارة بنت عمتس اعرست ، ولطيفه زوجت كل بناتها والحين
هي مرتاحه في بيتها لاعيال ولا شي ، يعني بالعربي بالعربي مامنتس فايده ، ياأنا يا أنتي بهالبيت
(تحمست ) .
دق التلفون : هلا والله بحصيصه، بتجين بكرا للكليه ؟
حصيصه : ايه بجي ، اسمعي بكرا بتفطر معنا اميرة (المليونيره ) وحنان (المطوعة ) زيدي على قطة
الفطور ريالين وبكلم الشله يزيدون على القطه . أنا : يؤيؤيؤ اما عاد ، اميره وحنان يتنازلن لنا الله
لايهينتس تنظفي مانبي صنان لو بكرا بس تكفين ، حصيصه : ايه بتروش الله يعين يلا مع السلامه ..
{ حصيصه / الإسم : حصه (<<اشوى انتس قلتي لنا ، نحسبها موضي ) العمر : 21 ، الطول : 170 .. الوزن / 25 .. تشبه الممثل السوري (حارس باب الحارة) ، هوايتها : تلاحق البنات الطخمات بالكليه ، وجمع الطوابع ، أخلاقها سياحية / وهي صديقتي من أيام الطفوله (ونعم الصداقه ) ، اذا وقفت جنبها تحس انك اطخم غصب(ن) عليك }
أنا (بتميع) : جدتي جدتي ، حلوة البسمتي ، لم يزل حبها .. ساكن المهجتي :$ ،، جدتي : اخلصي كم
تبين ؟! (تعيش الجده الي فاهمه احفادها ، تعيش تعيش تعيش <<- كلي تبن ) أنا : ابي ريالين غير
خمست الأريل حقت باتسر ::$ ..
http://lolitta111.googlepages.com/faaaseeel.gif
من بكرا بالكليه : هلا حصيصه شلونتس ؟ وين البنات ؟؟ حصيصه : مادري والله بس تلقينهم بقسم أمن
الكلية كالعاده مسوين بلا .. يلا نروح للقاعه .. دخلنا على القاعه ، وك العاده ريحة زينه وعطورات الصبح
والحركات السنعه .. بحركه لاشعوريه ( تلقائيه) رفعت يد حصيصه وحطيت راسي في ابطها : ياااوك
ياحصيصه هماني قايلتن لتس تروشي ؟ بتفشليننا قدام المخلوقات على الفطور .. حصيصه : يابنت
الحلال محد حاطن وجهه بإبطي .. أنا : طيب افرضي مثلا جاء زلزال بالكليه همن طاحت اميرة ولا حنان
بحظنتس وشموا الروائح .. وماكملت السالفه الا وسعابيلها طايحه (خقت ) ..
طبت علينا نوره : اعوووذ بالله يابنات تصدقون توني جايه من الأمن ، كافشين بجوالي مقاطع ثقافية . وش
اخباركم ؟ حنا : تمام ، بس الله يهديتس وراتس تحطين مقاطع ثقافيه ، ( ولا علمتينا ) الله يهيدتس ، الله
يهديتس .. <<- برا .
{ نوره / الإسم : نوره (<< احلفي مره ثانيه ) ، العمر : 25 ومعنا بنفس القاعه (الله من كثر الرسوب )
الطول : 150 ، الوزن : 80 .. تشبة الممثله البحرينيه (لطيفة المجرن) ، هواياتها : الزرط ، ومكالمات آخر
الليل .. عقليتها : مدري هي بقره ولا تتبيقر }
اجتمعت الشله ، وكل وحده تسعبل على قصتها (غرتها) ايقالنا نتزين لاميرة التي مليونيره ، وحنان التي
مطوعه .. المطوعه : السلآم عليكم !! حنا : وعليكم السلام ، حياتس الله يارب تدخلين الجنه (فاهمين
المطاوعة غلط الله يهدينا ) .. المطوعه : جزاكم الله خير .. كيف الحال ؟ حصيصه : الحمد لله تصدقين البارح
كنت اشوف قناة المجد (ايقالها تبي ترضيها ) المطوعه : ايه وبعدين ؟ حصيصه : لا بس قضت السالفه ..
سعاد : اقول يابنات ، جت القهوه ، سمو بالله واقروا الفاتحه قبل ماتقحنون (مازلنا فاهمين جلسة
المطاوعه غلط ) مرت الدقايق ، وحنا نتقهوى جت اميرة المليونيره ، وانا بحركه سريعه سويت نفسي
ماانتبهت لها وقلت في صوت عالي : والله ياحنا ربحنا البارح بسوق الأسهم مليونين ، بروح للسوق
واشتري صندل ، مادريت الا وسعاد خابطتني على راسي بالفنجال وقالت : كم مره اقولتس جهزي
النصبه قبل تقولينها ؟؟!!
{ سعاد / اسمها سعاد (برضه احلفي ؟! ) ، العمر :21 ، الطول : تغاير النجوم ، الوزن : 70 ولو فكينا تقويم اسنانها يكون وزنها 40 .. هذي الله يسلمكم تشبه الممثل الخليجي الي بشبابيك (ماعرف اسمه بس فيه درويش ولا شي زي كذا ) تمتاز بشدة القراوة ، ومخباتها ماشاف القرش .. هواياتها : التنغيف بحيث ان تدخل اربع اصابع في خشمها وتطلع مع عينيها ، وهي من اقوى صديقاتي في فك عصير السيرز }
http://lolitta111.googlepages.com/faaaseeel.gif
فاصل إعلاني …
يقولك فيه واحد ماخذ دورة في الإسعافات الأوليه ، يقول بالإختبار سألوه : لو ولدك بلع مفتاح البيت وش
تسوي ؟ قال : اطب من فوق الجدار … <<- أهه أهه أهه ..
تحسون ودي أحط فاصل ، بس مدري وش اقول
خلص الفاصل الإعلاني …
http://lolitta111.googlepages.com/faaaseeel.gif
جلسنا وتقهوينا و وجبنا الفطور وكان فلافل وشطه وكولا .. اميرة : يؤيؤ ما آكل فلافل أنا أعذروني مسويه
رجيم .. مامداها تكمل الجمله الا وحنا بحجرها نتهاوش على سندويتشتها .. وكالعادة أقوانا سعاد هي
الي خذتها ، عاد انا من القهر ألتفت على المطوعه وقلت : وش حكم الفلافل (كودها تقول حرام عشان
اخذ حقتها ) اميرة : بنات .. بصراحه أنتم فلة ، وجلستكم عفوية ومافيها أي تكلف (ماتدري اننا متسلفين
الفرشه الي كنا قاعدين عليها ، وطارين فلوس من اهالينا ) وبصراحه يعني ودي أعزمكم عندي في
البيت الليله .. وأعشيكم .. وبدون شعور وبصوت واحد وعالي : تم .. ( لابوكم لابو من جمعكم يالصلب ،
ماصدقوا احد يعطيهم وجه )
]|—***—|[
بالبيت ..
دخلت ولبست احسن لبس عندي .. [ بنطلون من حقات المصريات الي اطرافه من عند الرجول فيه مغاط
+ شراب مع صندل + فنيلة الإتحاد اسود واصفر .. مع العلم اني ماداني الإتحاد .. خذت الشنطة
البرتقاليه وروج بني غامق يحلفون انه اسود ، ومتحمسه اروح عند اميرة المليونيره ]
طلعت متحمسه ووصلت عند باب بيت اميرة ، من الشفاحه اول ماشفت القصر طقيت باب الرجال احسبه
باب الحريم (معلميننا اهالينا ان الباب الكبير هو حق الحريم والصغير هو حق الرجال ، بس هذا قصر كبير
يعني باب الرجال كبير ، ومن كبر باب الحريم ماشفته احسبه جدار )
قبل يفتحون الباب ، لقيت حصيصه توها واصله ، قلت تعالي لايفوتتس الباب ، صوريني عنده بالله ، وافتش
الغطوة وأغمز للكاميره وانا خامتن الباب ..
حصيصه : اقول لوليتا الظاهر ان فيه كاميرا فوق الباب تكشف من عند الباب ، بدال مانعقل ونتذيرب قمنا
نسوي حركة النصر بأصابعنا للكاميرا .. انفتح الباب وسمعنا صوت : تفضلوا حياكم الله .. (نعنبوهم
تكنلوجيا ، وندور الي فاتح لنا الباب مالقيناه ، وندور مصدر الصوت برضه مالقيناه ، مادريت الا واميرة
(صاحبة البيت) ترحب فينا .. دخلنا وسلمنا على اساس نبي ننزل عباياتنا
أنا : حصيصة تصدقين أول مره اشوف وجهتس ؟ قالت : ايه إيه افا عليتس تروشت وراحت الطبقات الي
كانت عليه (مرقة عشاء البارح + صلصة مكرونة عشاء العام الماضي + مكونات مدري وشي بس اشياء
لذيذه) نعنبو حيها لاجاعت مدت لسانها على خدها وقامت تزرط من بقايا المأكولات العالقه )
دخنا ذاك القصر ، يحلفون أني ماقد شفت مثله حتى بالمسلسلات ، هذيك الثريات وهذاك الدرج ولا
هذاك الرخام الي يمديك تشوف صورتك فيه من شدة ماهوب يلمع ، تسنه مرايه ، تطالع السقف تسنك
تطالع لوحة فنية ماشاء الله .. وأنا فاهيه وأطالع السقف مادريت الا وصوت الزلقة وراي ، أثاريها حصيصه
ماهيب متعوده على الرخام .. والتفت يمين وأشوف شاشه صغيره على الجدار ، اثره هذي الكمره الي
عند باب الشارع ، يوم قربت لها لقيت وحده مسويه نفس علامة النصر بأصابعها للكاميرا أثاريها سعاد
وصلت ، سبحان الي جمعنا نفس العقليات ..
شوي وجتنا الشغاله لابسه شورت وبدي .. وحاطه مكياج .. يحلفون أن سعاد صورت معها ..
قدمت لنا العصير وراحت ، وفيما حنا جالسين ، أكتشفنا ان كل وحده وفينا لابسه فنيلة نادي سعودي ..
مدري هي قالتن الملابس ولا وش قصتنا .. أنا : يابنات قبل تجي اميره ودي أنكم تصوروني بجنب
التحفة .. ومير أصور ذيك الصوره الي كل يوم قبل أنام أطالعها وأخق .. (ما اخق على صورتي ، لالا ، على
التحفه )
جت اميرة ، وبدنا نسولف لحد ماسمعنا صوت زلقه عند مدخل البيت .. درينا ان نوره جت .. اميرة: أكيد نوره
بروح اشوفها .. فتحت الباب ولقت نوره منزلقتن على وجهها ، ولما رفعت راسها شافت اميرة قبالها ،
وصرفتها بحركه تلقائيه ايقالها ساجده تصلي ، وسلمت من السجود وقامت ..
اميرة : حبيبتي ، اولا ماهوب وقت صلاة ، ثانيا : القبله ماهيب كذا ، ثالثا :مالقيتي تصلين الا عند الباب ؟
نوره : والله ياوخيتي جاني الدين فجأة (ينعن اوم التصريفه ) .. اميرة: ايه ايه ميخالف بس نزلي عباتتس
وتفضلي .. دخلت نوره علينا وحنا ندعي عليها من الفشيله ، نوره اول ماشافتنا وبصوت عالي : ينعن
اووووم المزاج ، سبحان الي جمعنا ، تصدقون الي لابسه فنيلة الطائي ؟ ..
]|—***—|[
اميرة : تفضلوا على العشاء ، قبل ماتكملها إلا وحنا عند باب المجلس .. دخلنا وليتنا مادخلنا ، شي اول مره
بحياتي اشوفه ، زودن على جمال جدران واثاث البيت ، لا وأجواء رومانسيه بعد ، مطفية اللمبات وحاطه
نور شموع خفيفه .. حسيت بإنخقاق ماعشته ولن أعيشه مابقيت حيّة ، الله مير يعوضنا بالجنة .. قولوا
امين ..
]|—***—|[
جلست أطالع الجو والأنوار الخفيفه ، والحركات الي توجع البطن من زينها، مادريت الا التكرونيه لطيفة
المجرن قصدي نوره مطفيتن الشموع بيدها ، يعنني قويه اطفيها بأصابعي .. اميره : يااااااااي كيف
سويتيها بأصبعك ماتعورك ؟ نوره : ههههه (ضحكه بصوت رجولي خالي من الأنوثه ) لالا ماتوجع متعوده ..
سعاد : جوعانه أخلصو علينا (وحده تطفي الشموع ووحده بجيحه وين انحاش من هالشله أنا ؟ ) ولعت
اللمبات اميرة واثاريه بوفيه مفتوح ، يحلفون اني خذت ثلاث صحون كل يد فيها صحن والثالث عاضته
بأسناني .. بدينا نحط من كل نوع ، وندحس من ذا المأكولات ، الين امتلت الصحون وجلسنا نبي ناكل ..
فكانوا حاطين عصير على الطاوله بكاسات كشخه ، طول الكاس الواحد 30 سم تقريبا ، ومحطوط على
حافة الكاس فراوله ، بصراحه بيني وبينكم ودي اصور وانا ماسكه الكاس ، كان تصير صورة ماتنفوت بس
مستحيه من مزنه (اشوى استحي فيني رجاء ) ..
]|—***—|[
البنات ازعاج وسواليف وضحك ، وأنا ادور خطه عشان أصور ، آخر شي مالقيت الا أني أحط الكاميرا
الثانويه بجهازي قدامي ايقالي اتفرج على مقطع ، مستكت العصير وخليت وجهي بجنبه وقلت في
نفسي ( يلا يالوليتا صوري مع الإزعاج محد داري) وسبحان الله على ماضغطت زر التصوير عم الهدوء وبان
صوت التصوير .. وش ذا الحظ لهم ساعه يسولفون ماسكتوا الا يوم صورت !!
واطالع النظرات الحاده من البنات ، وبحكم العشره ادري وش يدور في بالهم ..
نوره : يارب تموتين ، يارب ياكلتس حوت ، يارب يعضتس ثعلب فشلتينا
سعاد : نعنبو حيها ، مايكفي ان وجهها يفشل !! يعني لاوجه ولا اخلاق ؟ لازم تفشلنا يعني
حصيصه : (تتوطاني من تحت الطاوله ) وعيونها في نبرة حزن ودها تقتلني ..
أنا : أهه أهه أهه .. كنت اجرب كاميرة جوالي ، سعاد : كم مره اعلمتس تنصبين زي الناس ؟! يعني حبكت
هالدقيقه تجربين الكاميره .؟؟.
اميرة : ههههه (تتصنع الإبتسامه ، ولسان حالها يقول : لابوكم لابو من جمعكم ، عزمناهم وبلشنابهم )
ماحصل الا كل خير ، ماصار شي ، كملوا اكلكم عشان نتابع لنا فلم .. سعاد : وش نوع الفلم (ينعن ابليس
تفكيرها ) اميرة : حزين .. سعاد : اجل تامرون بشي ؟ أنا ماشيه للبيت .. المهم تفرقنا وكل وحده راحت بيتها .
http://lolitta111.googlepages.com/faaaseeel.gif
فايدة اليوم : كان يوم حافل (الصدق انه بدون فايده) الا أني صورت :a!!
]|—***—|[
مايستفاد من الموضوع ..
1- اذا كنت قروي واخوياك قراوي لاتصادق ناس كشخه .
2- اذا كان عندتس أخوان بالمتوسط فأعلمي أن بيجي يوم وبتنقين
أحسن فنيلة لأي منتخب وتلبسينها .
3- إذا عندك صديق مطوع لاتسوي نفسك مطوع ، لأنك تبي تنكفش .
4- لاتلبس شراب مع صندل
5- أي واحد يطيح على وجهه ، يسوي نفسه ساجد ، تراها خوش
تصريفه .
6- لاشفت كاميرا عند باب أحد لاتسوي علامة النصر لأن عندهم تلفزيون داخل يكفشك <<احلفي !
