بسبب حلقة تحفيظ قرآن كريم اتهموني زورا وبهتانا حسبي الله ونعم الوكيل

اخواتي الحبيبات وحشتوني اوي ووحشتوني ووحشني منتداي الحبيب اللي انا فيه بقالي اكثر من 4 سنين واتعرفت فيه على اخوات طيبات وصحبة جميلة اتعرفنا ببعضنا وتقابلنا مع بعضنا واتكلمنا مع بعضنا وشفت فيه ايام جميلة وموضوعات عظيمة يارب يديم علي المنتدى نعمة الاحسان اللي بيه
النهاردة هحكيلكم اللي حصلي في منتدى نسائي تاني واللي حصل فيه بسبب حلقة تحفيظ القرآن الكريم
اخواتي في يوم لقيت واحدة صحبتي بتقولي فيه منتدى جميل اوي اوي وهوه من بلدنا واولى بمشاركاتك وادخلي ده فيه مجموعة جميلة وطيبة وناس كويسه وانا اشهد ان فيه ناس كويسه جدا وكفاية انه من بلدنا المهم انا سجلت فيه بنفس الاسم اللي انتوا عارفيني بيه اكثر من مرة واكثر من موضوع ولقيت استجابة حلوة لكن الظاهر واحدة اسلوبها كويس مش مطلوبة يمكن المهم لقيت واحدة مرسلة رسالة على الخاص بتقولي انتي راجل واثبتي عكس الكلام ده انا استغربت اوي بس قلت حقهم بس الاغرب لقيت الرسالة جاية من واحدة بتقولي كلام محترم وبتتكلمي كثير بالدين يعني انتي راجل والله ده حصل المهم رحت مرسلة لقسم الشكاوى لقيتهم حظروني اني راجل عملت مشاركات جديدة بعضوات جديدة وارسلت برضه لقسم الشكاوى بتاعهم وقلت حرام عليكم اللي بتعملوه ده اعمل ايه عشان اثبت ليكم اني ست زيكم وبشتغل مدرسة وبالرياض قلت طيب خدوا ايميلي وهكلمكم مايك وكاميرا كمان وهتشوفوني وتسمعوني مفيش فايدة راجل بالزوق بالعافية راجل بالقوة باللين راجل انتي متنكرة قلت ليهم حرام عليكم طيب حاولوا تتأكدوا الاول وانغظت اوي وبقيت اعمل عضويات كثير على امل ان حد يسمعني بالشكاوى وقلت ليهم انا بالي طويل اوي اوي مش بضايق بسرعة بس بلاش الظلم ومستعدية لاي عقاب ان طلع كلامي غلط وانا مش عاوزة انتقد اسلوب المنتدى باي مكان تاني ومش عاوزة اكتب عنه وعن اجراءاته التعسفية والشك اللي ملوش اي مبرر برضه مفيش فايدة فيه مشرفة قالت حطي رقمك على الشكاوى وهوه اسرع قلت مش معقول احط رقم الموبايل يقرأه اكثر من 300 مشرفة مثلا رحت مختارة مشرفتين اثنتين واحدة مسمية نفسها امنا كلنا والثانية بتحب الناس الصالحين ومش كده وبس وكمان تقوم بحراسة حدود الله حتى لا يتعداها احد المهم رحت مختاراهم وقلت هم معايا وهيتصلوا عليه وارسلت رقم جوالي اه والله شفتوا اكثر من كده حاجة طبعا كلكم هتقولوا ايه دخل الكلام ده بالعنوان اصبروا بس جايالكم بالطريق ارسلت الجوال تفتكروا قالوا ايه
قالولي هنتصل عليكي من كذا رقم شفتوا يعني مطلوب ارد على كل الارقام اللي تيجي الغريبة قلت ليهم مش برد عل كل الارقام أي واحدة هتتصل ترسل رسالة وتقول انها هيه عشان اكون عارفاها ولكن اصحاب العقول تقولوا ايه قالوا هوه كده قلت سبحان الله يعني لو راجل وعرف ان ده موبايل ست هيسكت المهم لقيت ارقام عمالة ترن عليه والله رحت متصلة على رقم منهم طلع راجل قلت ممكن اكلم المدام قالي انا بره بالليل حصل اللي كنت متوقعاه لقيته اتصل بحسبها هيه لقيته عاوز ياخد ويدي بالكلام قفلت الخط ادي النتيجة المهم عملت عضوية ورحت داخلة وقلت بالشكاوى ياجماعة حرام اللي عملتوه راحت امنا العزيزة بصراحة قالت انا مش هتصل عليكي جوزي مش وافق قلت سبحان الله يعني انتي اللي قلتي هتصل يكون الرقم غلط مش مهم وفيها ايه اننا نتعرف كاخوات في الله ولله بس احترمتها لانها صاحبة مبدأ وانتهت .
لقيت الاخت اللي كنت متوسمة فيها خيرا كثيرا مهي تحرس حدود الله سبحان الله رحت عاملة عضوية وقلت بس كلميني اعرفوا اني ست وبعدين مش يهمني اني ادخل تاني المنتدى ده خالص شوفوا الكلام الغريب بقة
يوم مديتها الرقم اتصلت مرتين والله مرتين واحنا بالعمارة 7 شقق بنجمع بعضنا الساعة 10 الصبح ونعمل حلقة لتحفيظ القرآن الكريم نفضل نسمع لبعضنا واللي متجيش مثلا واحدة تطلع ليها كل يوم عند واحدة النهاردة عندي بكره عند جارتي وكده نراجع القرآن ونحاول نحفظ بالوقت ده بحط الموبايل على الصامت عشان مفيش واحدة تكلمني خالص والله لقيتها بتقول انتي اتأخرتي عليه بارسالك الرقم وانا اتصلت عليكي مرتين قلت حصل ووالله اتصلت عليكي بعديها مش رديتي خالص وكنت منتظرة تتصلي تاني محصلش قالت بصي انتي راجل قلت ياسبحان الله راجل ازاي بس وانا بقولك اتصلي باي وقت بالليل بالنهار صبح ظهر عصر مغرب عشاء بس اكون عارفة انك انتي اللي بتتصلي عشان مش برد على أي رقم غريب والله مش بكذب ياجماعة
قالت اصلا انتي بتقولي كنتي بحلقة تحفيظ قرآن كريم والحلقات بتبدأ بالرياض الساعة 8 الصبح او الساعة 4 العصر يبقى ازاي كنتي اون لاين الصبح انتي كذابة انتي راجل اتقي الله اتقي الله اتقي الله قلت ياسبحان الله لحد كده وماشي الكلام مقبول
لكن كانت المفاجأة الحارسة لحدود الله واللي المفترض انها تعرف هيه بتقول ايه قبل مترمي الكلام وتقذفني هذه الاخت المفترض انها تكون حارسة وتعرف اين تذهب الكلمة راحت رامياني بتقولي ( واكيد انت مدي الرقم لبنت من بتوعك ) شفتوا دناءة الكلمة شفتوا الانسانة الحارسة ازاي تعدت كل حدود الله وحدود الكلام العادي كمان يعني انا راجل ومدية الرقم لبنت من البنات بتوعي واكيد لو انا طلعت ست يبقى راجل هوه الي ادني الرقم عشان اكلمهم شفتكم سوء الظن وصل لفين شفتم الشك وصل لفين شفتم المشرفة المفروض تكون قدوة بالتعامل عملت ايه واللي انا زعلانة منه اني اخترتها هيه بالذات انغريب بالاسم آه والله توسمت بالاسم خير راحت رامياني بالباطل وانا متأكدة اني اكبر منها سنا ومقاما واحتراما كمان طالما وصلت انها تقولي كده وانا والله مش بقول الكلام ده هنا من وراهم بالعكس انا حاولت كثير اني ادخل لكنهم بيحظروني اللي غايظني اني كنت متوقعة انها هيه اللي هتنصفني تروح شتماني بالطريقة الدنيئة دي والله ياجماعة مقلت كلمة واحدة تكون سيئة ولا غلطت بحد هناك ولا اصلات حاولت اتكلم مع حد خالص هناك منتوا عارفيني يا اما ادخل موضوع يا اما ارد وبس حتى الاخوات اللي عارفيني هنا تقابلنا وتكلمنا صحيح انا خرجت من بيتي واللي يخرج من داره ينقل مقداره بس ياجماعة انا كنت حاسة اني راجعة بلدي يعني دخلت منتدى من بلدي يعني انا واحدة منهم بنتهم امهم اختهم عمتهم خالتهم مكنتش احسب ان ده هيكون رد الفعل هقول ايه حسبي الله ونعم الوكيل مش كده وبس حاولت اني اشتكي للمسئولة بالمنتدى لقيتهم حظرني وكاتبين بتقول حافظ القرآن طيب روح احفظه الاول بالله عليكم فيه كده بالدنيا فيه سوء ظن للدرجة دي فيه ضحك ونفاق للدرجة دي تحرس وتحفظ حدود الله وهيه اللي ترميني بالباطل من اخت ال معرفتها بقولها انا اخترتك انتي تردي الحق لاهله طيب كنتي افضلي اتصلي اتصلي عليه فجأة كده هتلاقيني بكل مرة برد عليكي لكن لما تأكدوا تماما اني ست واحدة زيهم ازاي يطلعوا غلطانين ويغلطوا نفسهم لا اهون عليها تتعدى حدود الله وتقذف بالباطل ازاي مردش عليها وازاي فيه حلقة تحفيظ قرآن كريم الساعة 10 استغفر الله العظيم الله يارب ياخذ حقي منها في اتهامها ليه يارب