عالم البنات النسائي كل ما يخص المرأة العربية من ازياء وجمال والحياة الزوجية والمطبخ
💡 السلام عليكم ورحمة الله 😥
خواتي العزيزات حبيت اذكر لكم اعراض الافراط في التبويض او مثل ما تنكتب بالإنجليزي OHSS والي ممكن تصيب الأخوات الي ياخذوا ابر التحفيز على التبويض وخصوصا المقبلات على عمليات أطفال الأنابيب 😡
وانا للأسف جاتني هالأعراض في في محاولتي الأولى لأطفال الأنابيب وكانت فعلا مؤلمة بس الحمدالله ما وصلت لدرجة كبيرة من الخطورة الي تستدعي التنويم في المستشفى، والله لا يبليكم ولا تجربون ولا حتى واحد من هالأعراض. أما الي تحس في هذي الاعراض لازم تشوف دكتورها فورا:
(ملاحظة: ممكن تصير قبل السحب وممكن تصير بعد الإرجاع، يعني مافي وقت محدد)
1= تلاحظي انه البطن يثقل وينتفخ وكأنك حامل
2= ونتيجة هذا الانتفاخ يزيد وزنك 2 الى 4 كيلو خلال يومين! 👿
3=تحسين بالجوع الشديد لكن اول ما تبدين تاكلين تحسين نفسك مليانة وما تقدرين تكملين. 😥
4= تحسين بآلام مبرحة في منطقة الرحم وتزيد اذا استلقيتي عالفراش وممكن تكون مصحوبة بامساك او ما تكون (وهذا اهم عرض واكبر دليل على المتلازمة، واكرر “مبرحة” ومش مثل آلالام الدورة)
😛
5= غثيان واستفراغ
6= تناقص في كمية البول
اذا حسيتي بهذي الأعراض معناته انه صار عندك تبويض اكثر من اللازم بشكل ما يكفي المبايض فتكبر وتكبر عشان تحتويهم ونتيجة لهذا تضغط عالمعدة وعلى باقي الاعضاء (وهذا يفسر الجوع والشبع الفجائي). ولازم تتوجهي للطبيب عشان يعمل لك الترا ساوند ويشوف اذا راح ينومك بالمستشفى والا لا لأن ممكن يتجمع الماي في رحمك بسبب هذي المتلازمة وبالتالي لازم يسحبوا الماي.
بالنسبة لتجربتي فأنا عانيت من بعض هذي الاعراض تدريجيا وكانت في أقوى حالاتها بعد الابرة التفجيرية، طبعا في اطباء راح يطلبوا من المريضة انها تأجل الإرجاع ويتم تجميد الأجنة لين تخف الحالة ومنهم يقرروا انه يتم الإرجاع بأي حال، وانا بالنسبة لي كملت الإرجاع وتابعني الدكتور بشكل دوري عشان يتأكد انه ما تجمع ماي والحمدالله ما صار فما كان يستدعي اني انام بالمستشفى وراحت الآلام بالتدريج ورجع وزني نزل مرة وحدة الى الطبيعي والحمدالله على كل حال.
والدكتور أثناء الفحص كان يسبح ويحمد الله على عظمته وذكر لي انه الله سبحانه وتعالى خلق جسم المرأة بحيث يستوعب اي ثقل وتقدر المرأة تمشي مهما كان الثقل في الجسم، ولما شاف مبايضي قال لو نصف هالضخامة في رجل ما كان يقدر يمشي، او حتى يقوم من السرير، ولكن بلطف الله سبحانه وتعالى المرأة تقدر تتحمل اي ثقل في رحمها، وطبعا ذكرت لكم هالنقطة عشان اذكركم بلطف الله ورحمته علينا
حبيت انبهكم يا بنات انها مو حالة شائعة جدا يعني لا تخافون بس الحذر واجب، وانا هذي الحالة بس صارت لي مرة وحدة والمحاولة الثانية (والي ما نجحت ولله الحمد) والمحاولة الثالثة الحين (انا في اليوم الخامس من الارجاع حاليا) ما صارت لي اي اعراض والحمدالله وكل شي ماشي تمام
وعسى الله يرزقنا واياكم ويتمم عليكم وتحملون وتفرحون بالبنين:(
😥
