محتاجه للمواساه.. أنا غرقااااانه بالإكتئاب وما عارفه اطلع منه.. تكفوون ساعدوني

يا بنات أنا عندي إكتئاب شديد بسبب تأخر الحمل ما قادره أطلع منه.. كل يوم اتمنى إني ما اقوم من النوم أبدا وأقعد بالفراش حتى لو ما فيني نوم.. أحس بألم فجسمي كله وما قادره أعيش حياتي طبيعي ولا حتى انظف البيت او اطبخ.. ما أبي أشوف حد ولا أكلم حد وكله قاعده على الإنترنت بروحي.. حياتي الزوجيه صارت زفت وما أبي زوجي يقرب مني وصايره أكرهه ةما أدري ليش أحس انه هو السبب مع انه ما سوى شي.. انا وزوجي ما طار بينا جماع من أكثر من 6 شهور تخيلوا
يابنات أنا تعبت من العلاجات والأبر والأدويه والفحوصات والسفر للخارج للعلاج.. ما بقيت علاج ولا إختبار ولا تحليل ما سويته وفوق هذا كله عمري ما حملت.. أنا كل إلي أبي أشوفه هو بس فحص حمل إيجابي علشان احس اني طبيعيه!!
جربت التلقيح الصناعي 10 مرات وأطفال الأنابيب 3 مرات وبعضها مع فحوصات الجينيه وهم ما في فايده.. كل الدكاتره يقولون كل شي تمام وإستجابتي للتبويض زينه وسني صغير والأجنه إلي تنتج من الدرجه الممتازه ومع هذا عمره ما يصير حمل.. أحس اني بجن.. جربت أكبر مراكز الإخصاب بالعالم مثل Guys Hospital و the bridge center كلهم ببريطانيا وجربت أيضا العلاج في بلدي وهم ما في فياده.. أخذت الستيرويد والهيبارين وهرمون البروجيسترون على شكل إبر وكل شي تمام ويوم الفحص تظهر النتيجه سالبه!!! طيب ليش ابي افهم؟؟
دعيت ربي وما زلت أدعي له وأصلي وأقوم الليل واتصدق واستغفر وكفلت يتيمه و أساعد غيري بكل شي ممكن تتخيلونه بس الله ما كتب لي لين الحين.. أحيانا أسأل طيب ليش؟؟ أيش المشكله؟ وين التقصير؟؟؟
يا بنات كل يوم اتم أبكي بالساعات وحزة النوم ما أقدر انام من القهر والحزن إلي فيني وأبكي بكاء شديد وبحرقه وأحس إني وحيده ومحد حاسس فيني..
أنا يتيمة الأب وما عندي اهل غير امي و اخواني وكلهم مب عايشين معاي ينفس البلد وهذا الشي إلي مخلي وضعي صعب أكثر خصوصا اني بموت على طفل يملي لي حياتي ويونسني… أحس اني وحيده بهالدنيا..
ما صرت أقدر امسك الدمعه من عيني كل ما جات وحده وتسألني بكل غباء ووقاحه “ما حملتي؟ ليش؟” صرت ادعي على كل وحده تحرجني بهالسؤال انه الله يوريها ويذوقها العذاب والنار إلي أنا فيه علشان تحس على دمها وما تسأل.. يا بنات والله تيجيني مثل الغصه كل ما أشوف وحده حامل او عندها بيبي وأنا بطبعي إنسانه لا حسود ولا حقود بس ما ادري إيش إلي صار فيني؟؟؟ صرت أحقد على الناس وأكره كل إلي حوالي وما أبي أطلع من البيت أبدا ولا أقابل حد..
أرجوكم ساعدوني شيرو علي أيش الحل وأيش إلي ما سويته..؟ شلون ارجع نفس الإنسانه قبل… شلون أرجع اشوف الحياه ورديه