ابي انقذ زواجي و تعبانة نفسيا

ابي اخبركم قصتي و كلي رجاء من بعد الله انه ربي يكتب لي الحل على ايديكم

انا متزوجة من 9 اشهر من رجل اقل مني ماديا و عن طريق الاهل

اول اشهر خطوبتي فهمت منه انه مضغوط ماديا و غير قادر على استكمال عش الزوجية و علشان هالشئ بيتاخر العرس اللي صار بعلم الغيب و لانه السنة الناس صارت تلاحقنا كون انه العرس ما تحدد حبيت احسم الموضوع و تسلفت من البنك علشانه

كمل الشقة و توسع ماديا له و لاهله و الحمدلله صار العرس

من فلوس السلفية سافرنا و ما كان يبي يسافر دولة بعيدة عشان يوفر فلوس

في النهاية ما كانوا الفلوس فلوسه عشان كذية اصريت على الدولة اللي طلبتها

تخيلوا طول السفر كان معصب و يتأفف من كل شئ و لاني عروس و اول مرة اسافر عن اهلي صرت ابكي كل يوم

كان يجاملني بكل شئ و بكل طلعة اهم شئ ما يصرف فلوس

اقدر حرصه بس احنا في شهر عسل فلازم نكون متوسعين

تخيلوا انا حجزت التذاكر و انا حجزت الفنادق اهو كان اسم بس و فوق اذية كنت اترجاه عشان يطلعني من الفندق نتمشى و لا نروح المول

بعد رجعتنا من السفر صار ما يصرف علي

يعني انا اصرف على عمري و انا قدرت هالشئ عشان راتبه منخفض

كان يصرف على اهله و نفسه و بس

بعد 6 اشهر تسلفت مرة ثانية عشان نسافر بس تخيلوا من شهر 4 لين اليوم ما سافرنا

كل يوم يطلع لي بحجة:ابوي يقول التذاكر مرتفعة-الاجازة بتطول ليما تطلع-انا ابي هالبيزات عشان كذا-و كل مرة دولة ليما وصلت لارخص دولة

يعني تنازلت وايد بس عشان خاطر اسافر لاني متحسرة على سفرة شهر العسل لاني صدج ما تهنيت غير كذا الفترة الماضية تعبت وايد نفسيا

في اشهر الزواج الاولى صرت ابيع شوي شوي من ذهبي عشان يبي بيزات فوق هذا مرة حاشني مرض و من مستشفى لمستشفى ماحد كان يعرف ا فيني لما قلت له ابي مستشفى خاص صار يساومني

اقوله مابيك تدفع معندك انا بدفع اهم شئ اطمن على صحتي

يغيب عني اسبوع و اسبوعين بسبب دوامه و ما يلمسني الا مرة كل ثلاث ايام او يومين

و اليوم بعد 9 اشهر زواج معصب علي داخل علي يحاسبني انتي لليوم ما حملتي و شوفي نفسك اش فيك

انسكر خاطري و الله بس مسكت نفسي و بعد ما سافر طرشت له رسايل فيهم كلام كبير

وضحت له اني كارهه العيشة معك و انه البيت صاير لي مثل القبر و صرت موب طايجتك حتى ربي موب رايد لي منك عيال رد علي اذا موب طايجتني روحي بيت ابوك

حسيتها طردة و بالفعل رحت بيت ابوي

خبرت امي اني تعبت منه و ما اقدر اتحمله,طبعا ماحد يعرف عن موضوع السلفيات و الذهب غيري و غيره

شوي و دخل اخوي يكلمني يقول انه زوجك يشتكي منك و يقول دوري لي حل مع اختك و اش صاير بينكم

خبرته بس عن سالفة السفر اقوله تعبانة نفسيا,صدق ما اطيقه و اهو عنده المادية بس ما يبي يسفرني و انه المغرب فتح لي موضوع بس بسببه فتحت مواضييع وايد لانه تكلم كلام حتى لو ما كان يقصده بس ماله حجة انه ما يوزن كلامه(انا اقصد موضوع الحمل)

حاولوا اهلي يهدوني بس صدج متضايجة و متحسفة قد شعر رأسي

اني عطيت و عطيت و في النهاية شو عطاني

9 اشهر عمره ما دخل علي بعطر او وردة او عشى

كل مرة اقول ابي اطلع ابي كذا ابي كذا اما اهو من عنده ما يعطيني

يجلس يمي اخر الليل و شوي و يطنشيني و يجلس يكلم اصدقاءه

سوالفهم اللي ما كملوها في الطلعة يكملها عندي اخر الليل

و انا و الله تلفوني احطه صامت او اصكره اول ما يدش عشان ما يحس اني انشغل عنه

و اذا كلمته او طرشتله و اهو عند ربعه يرد علي انا عند ربعي لا اطرشي او لا تتصلي

كل ما ابي اكلمه يقول شو تبي اكثر انا اييب لك اكلك و شربك

طيب انا ما ابي اكل و شرب

ابي انسان يحس فيني

انسان يحبني مثل ما انا

بعض الاحيان احس اني متزوجة طفل

او انه اهو الحرمة و انا الريال

انا اللي اخطط و انا علي ثلاث ارباع التنفيذ و اهو متفرج بس

الحين زعلانة بيت اهلي و ما ودي ارجع لاني صدج هالمرة تعبت تعبت من كل خاطري منه

كل شوي ابكي شو ذنبي انا

عزيته و حبيته و اهو بشو جازاني

اهو يبيني و يحبني بس ما يعرف اشلون يحافظ علي

الحين ابي اعلمه درس و ابي ابتدي من اول و يديد بس ماعرف شأسوي