جانـا مطــر !
وينك .. ترى جانا مطر غطّا شوارعنا
كل الشوارع امطرت .. ماغير شارعنا !
.
.
قالو لي انك جيت
مريتها الكويت
دقيت باب البيــت
ودك توادعنـا !
.
مارحت .. الاّ والمطر نادالـك بصوته :
ياللي توادعنا …
غـرْقــت شوارعنا !
عقبك سنينه ماحكت واللهفه بـسكوته
أحييـت شارعنـــا
ارجـع …. وطالعنـــا !
وينك ؟
ترى جانا مطر غطّا شوارعنا
كل الشوارع امطرت
.. ماغير شارعنا !
.
.
هذا الشهـر عيديــن
عيــد احتفـلنـا فيك
وعيــد ارتوينـا فيه
عيـده زعلـنا فيك
وعيـدك رضينا فيـه
من قـّرتـك العيـــون
عيـد المطر عيديـن !
وثالث .. ورابعنـا
حفلة شوارعنــا !
وينك .. ؟ ترى جانا المطر!
كل الشوارع امطرت
بالذات .. شارعنا !
.
.
اللي نسى .. نسْـوه
واللي قسى .. قسـْوه
واللي تعمّـد يبتعـد عن ديـرة أحبابه
اللي شغل فكره
واللي هجر حبره
واللي تعوّد ينتـظـر عند اعتبــة بابـه !
اللي رخص طيبه
واختار حبيبــه
حتى تهاوت طيبتـه في ناس كذابـه !
اللي عطا نفسه
يومه نسى امسه
حتى دفع جرحه ثمن من اقرب اصحابه!
ماكانت القسوه سبـب
ولا السبب نسيـان !
اصلاً أمانينا كِــذب
عمر الأمل ماكــان
الدرب علّمنـا غصـب فالحلم نتشابـه !
من أجل واقعنا …..!
طالع شوارعنا
لما الشوارع امطرت
طاحــت مواجعنـا !
وينك ..
ترى
جانا مطر !
😆
لم
ينتهي
هذا النص بعد!
للشاعرة / خلود البراري