عالم البنات النسائي كل ما يخص المرأة العربية من ازياء وجمال والحياة الزوجية والمطبخ
مرحبا يا فراشات يا حلوات ….
مدري شلون أشرح لكم إللي بداخلي .. بس من جد أنا أتألم .. أتوجع .. أتقطع .. ومحد يحس فيني ..!!
مشكلتي هي وزني .. شكلي .. حجمي ..
أول صدمة تلقيتها بهذا الخصوص كانت من طبيبة أسنان كنت أتعالج عندها .. وذكرت القصة من قبل .. واللي يحب يقراها يفتح ذا الرابط :
http://satfrequencies.com/girls/showthread.php?t=519947
بعد هذي الصدمة .. عقدت عزمي وصممت إني أتغير .. وبالفعل .. الآن فقدت من وزني 12 كيلو أو أكثر شوي ..
بس إللي مضايقني .. إن شكلي -حجمي- ما تغير كثير .. خصوصاً الناس إللي تشوفني كل يوم في الكلية أو البيت ما يحسون بأي تغيير ( رغم إن ثيابي وسعت علي )
ما علينا .. مو هذي سالفتنا ..
عندي في الكلية وحدة .. أعتبرها أكثر من صديقة .. أكثر من أخت .. وهي دكتورتي في الجامعة .. بيني وبينها صداقة قوية بالإضافة إلى الشغل .. وهي تعتمد علي في كثير من الأعمال وأنجز أشغال صعبة وذات قيمة
تكونت بيننا صداقة عمرها تقريباً سنتين أو أكثر …
الدكتورة هذي .. سبحان الله .. تحس فيني .. وإذا صار لي أي ظرف أو موقف صعب أول وحدة توقف معي وتساعدني .. ويمكن صديقاتي المقربات جداً جداً جداً تلاقيهم تبخروا وقت الشدة .. إلا هي .. وقت الشدة أشوفها قدامي بدون ما أطلب منها أي شي ..
تراعي شعوري .. ومستحيل تقول لي شي يضايقني …
فجأة .. وبدون مقدمات .. صارت تلمح على وزني أو شكلي ..
فجأة صارت تتكلم عن الرياضة والمشي وإنها شرت جهاز رياضة علشان إذا ما مداها تتمشى في الكلية .. تمشي بالبيت بالجهاز
صارت تتكلم عن الأكل .. والملابس .. والحركة .. والمشي ووووو ..!!
أمس … قلت لها إني مارح أجي اليوم .. لأن عندي محاضرة وحدة وإحتمال 90% إنها تنلغي .. وأنا أصلاً أبي أغيب لأن ما عندي غياب في ذي المادة وعندي يوم ثاني إختبار ..
كلمتني أمس وعطتني شغل .. وقالت تبيه بكرة ( إللي هو اليوم إللي رح أغيب فيه ) ..
قلت ماشي .. جبت معي الشغل إللي المفروض أنجزه في الكلية .. وتفاجأت الصبح إنها ما تبي شي من الشغل ( يعني كان حجة علشان أجي ) .. أخذتني ورحنا نمشي في الكلية ساعة كاملة .. وهي تتكلم عن فوائد المشي ..!!
هي بصراحة كانت تتمشى معاي دائماً في الأيام إللي أكون فيها فاضية وهي فاضية .. بس اليوم تأكدت إنها فعلاً تقصد .. وتلمح تلميحات واضحة ..!!
وش أقول ؟؟ أنا حظي قرد .. أنا دائماً أتمشى في الكلية لما أكون فاضية .. وبس أجلس على الكرسي أرتاح .. أشوفها ناطة وجاية عندي .. طبعاً تشوفني جالسة .. وبكذا أنا أصير قدامها إني وحدة كسولة وقليلة حركة ..!! وتقوم تاخذني ونطلع برا وتمشي معي ..!!
والله مدري وش كتبت أصلاً .. بس مدري .. أبي أفضفض .. شي يقهر من قللللب .. وأنا مستانسة ومبسوطة بعمري بعد ما نقصت 12 كيلو في وقت قصير نوعاً ما .. كل هذا وما يبان .. صرت ما آكل شي تقريباً .. وكل هذا ما يبان .. أهلك نفسي من المشي في الكلية .. وفي الأخير لما أجلس .. أكون بعيون إللي يشوفني جالسة .. إني جالسة من زماااااان ويمكن من أول ما جيت وأنا ما تحركت من مكاني .. !!
قولوا لي لو كنتوا مكاني وش رح يكون شعوركم ؟!
صدقوني أنا مو زعلانة منها أبداً أبداً .. أسمع التلميحات والتعليقات وأبلعها بغصة وأنا ساكتة .. وصدقوني ما أزعل من صاحب التعليق .. لكن أزعل من نفسي ..
أنا عارفة إنها تسوي كذا لمصلحتي .. وأنا أقدر هذا الشي … بس الشي إللي يزعل ويقهر إذا كنت بالفعل أسوي كل هذا .. وفي الأخير أكون بعيون إللي يشوفني وكأني ما أسوي أي شي بتاتاً ..
صدقوني يا بنات … تعقدت من كل شي .. صرت أكره عمري .. رغم إني أمشي بالدايت والرياضة بشكل ممتاز والميزان يشهد على هذا .. ووزني كل ماله ينقص
بس ما ينفع .. لأن إللي أسويه شي .. وإللي ينقال لي شي ثاني ..
يمكن هذي الصدمة الثانية إللي تلقيتها بسبب شكلي …
صرت ما أحب أجلس مع أحد .. وما أحب أشوف أحد .. حتى الدكتورة هذي لما تعطيني شغل .. ما أحب أشتغل قدام أحد .. وما أحب أمر القسم إللي فيه الشغل .. لأن ما أبي أحد يشوفني .. بس أكون مجبرة إني أروح .. لأن وراي شغل
حتى أختي الكبيرة إللي ساكنة في منطقة بعيد عننا .. إتصلت فيني يوم من الأيام .. وسألتني إنتي تسوين ريجيم ؟ ( ما أدري إذا هي لاحظت فيني تغيير أو لا ) طبعاً كذبت عليها وقلت لها لا .. لأني ما أبي أحد يعرف .. وجلست تكلمني عن الريجيم .. وإني بنت على أبواب الزواج ولازم أكون حلوة قلباً وقالباً ..
طبعاً أنا كلمتها بكل رحابة صدر .. وما حسستها إن كلامها ضايقني .. بس حسيت بغصة ما قدرت أبلعها …
إذا جت تزورنا في نهاية الأسبوع .. أروح أنخش وما أحب أجلس معها .. عادة تجي بالليل .. قبل لا تجي أروح أنام علشان لا تشوفني ..!!
أنا ما كنت كذا أبداً .. بالعكس كان الأمر عندي عادي جداً .. وأحياناً إللي يلمح لي عن شكلي أنكت معاه وأعلق على نفسي بكل بشاشة ومرح .. وما يهمني شي
ألحين صرت أتحسس وأتضايق من أي كلام بخصوص الأكل والوزن والملابس والمشي والرياضة ووووووو ..!!
صرت أخاف أروح أي عيادة .. خصوصاً عيادة الأسنان رغم إني أعاني من أسناني معاناة شديدة .. بس أقول لنفسي إن ألم الأسنان أهون بكثير من الغصة إللي رح آكلها هناك …
ونفس الشي حصل من سنتين لما رحت لطبيبة أبي أتعالج عن شي .. قالت لي رح آخذ تحاليل وعلى بال ما تطلع التحاليل أبيك تكوني نزلتي من وزنك شوي … كرهت المستشفى .. وبطلت أتعالج ولا رحت آخذ نتيجة التحاليل أصلاً
أنا ما أبي أكون كذا .. أبي أرجع مثل ما كنت .. ما أتضايق من شي .. ولا أتحسس من أي موضوع .. بس ألحين فيني غصة .. فيني ألم .. فيني وجع .. مابي أشوف حد ولا حد يشوفني .. ما أبي أروح الكلية أصلاً .. ما أبي أطلع من غرفتي نهائياً ..!!
أنا مو ناطرة من أي أحد يعطيني حل .. بس حبيت أكتب الموضوع علشان أفضفض .. لأني من جد مختنقة :062:
