عالم البنات النسائي كل ما يخص المرأة العربية من ازياء وجمال والحياة الزوجية والمطبخ
أسعد الله أوقاتكم بذكره
بدون مقدمآآآت
الموضوع ومافيه يحكي عن أختي المتزوجة من ولد خالي
وكان فيه عشاء عند أهل خالي أخواني مشغولين فماراحوا للعشاء ورحت أنا وأمي مع أختي وزوجها للعشاء
أخوي قال لأختي المتزوجة اذا خلصتوا من العشاء خلي أهلي يروحون معك وأنا أجيهم في بيتك لأني مستحي من خالي قالت اختي طيب
الموووهيييم وصلنا لبيت خالي ونست أختي لاتقول لزوجها أنه احنا بنروح معهم لبيتهم وبعدين يجي اخوي يأخذنا منااك
وتذكرت اختي ذا السالفة << على حظها
يوم خلصنا من العشاء وأرسلت لزوجها رسالة قالت ترى أهلي بيروحون معنا للبيت وأخوي يجي يأخذهم لأنه مستحي من خالي
وتبغى تأكد له وصول الرساله دقت عليه مكالمة وحدة بس دقت 3 نغمات وقفلت علطول
أبـــــــــــــــــــــــــــــــــو الشباب الفهيم فهمها
أنه يالله امش اللحين …؟؟؟!!!
راح ودق على أختي وقال يالله أطلعوا قالت أختي طيب ورحنا نلبس عبايتنا الا شوي جااء لأختي استدعــــاء رسمي من هيئة البحث والأرصاد
من اللي أستدعاء اختي أم أبو الشباب وش تتوقعون تقول ؟؟
تقول ليش تقولين لأبو الشباب يالله مشينا قـــــــــــــــــــــــــــــــــرف
أختي علامات التعجب فوق رأسها !!!
طبعا كان هالأستدعاء محصور في غرفة والحضور لخوات أبو الشباب وأمه وأختي تخيلوا الأمر يعني كأنهم حاشرين أختي والا مسووووية جريمة
أختي ع بالها صــــــادوووه تناظر تدور كاميراتهم ماشافت شيء عرفت أن الأمر جدي للغاية ..
الموووهيم قالت أختي وليش أقول قرف وأنا في بيت خالي وعند بنات خالي والله ماصار ياعمه
قالت الا أبو الشباب يقول أرسلتي له رساله تقولين يالله مشينا قرف ؟؟!!!
قالت خليه يطلع جواله ويفتح رسالته وتشوفين أنا وش قايله فيها !!
قال ابو الشباب أنا مسحت الرسالة ..
قالت اذا أنت مسحتها أنا مامسحتها وراحت أختي وفتحت جوالها على الرسائل المرسلة والحمدلله أنها مامسحتها ومدت الجوال لأخته الكبيرة وقالت أقري الرسالة يافلانه على عمتي ..!!
وقرت الرسالة وقالت الأخت الكبيرة والله يايمه أخواني مانصدقهم ابد وأما أنتي يافلانه << المعني بها أختي
والله أنك غالية وفي قلوبنا ولا نصدق فيك أي حكي يقال
ثم بعد ذلك تتابعت الأقوال من أخوات الزوج بمدح اختي أمام الزوج
<< تحسينهم بيرقعون والشق وش كبره مايترقع 😆 🙂
وفي وسط ذهوووول الأم اللي كأني شايفتن فيسها هاللحين فوقه تعجبااات كثيييرة وفاتحتن الكشرة
وانتهت الحادثة ببرأة أختي أمامهم من الكذب والزيف الذي اطلقه زوجها ..!!؟
ثم بعدين طلعنا لسيارة وسبقتنا أختي تقول أول ماركبت قال أنا غلطان وسكت
مجرد ركوبنا قال اللحين المفروض أنك ماتسببين مشاكل أنا ماأحب المشاكل وقعد يتشره على أختي
<< وكأنه بسوي دفاع قبل الهجوم
لأن أمي ولله الحمد تتميز بالهيبة مااقولكم قوية الشخصية بالعكس أمي أطيب من قلبها مافيه ولكن لها هيبة
لأنها ماتحب الهرج والقيل والقال وغااامضة وغموضها هو اللي أكسبها الهيبة
فسكتت أمي وابن الحلال قاعد يهرج ويتشره قالت أمي تعوذوا من إبليس ثم بعدها سكت وصلنا لبيت اختي
نزلنا << وانا وأمي مثل الأطرش في الزفة ماندري وش السالفة
وبعدين قالت لنا أختي السالفة ومافيها كذا وكذا وكذا
تقول اختي في آخر الموقف يوم كانت بدائرة التحقيق والأتهام تقول قالت عمتها أم أبو الشباب
لاتقولين لأمك ولأهلك ..!!!؟
تقول نظرت فيهم وسكت وطلعت
طبعا أنا وأختي قمنا نحلل ونفسر وقالت اختي أنا اتوقع ان عمتي زعلانه من البداية لأننا أحنا يااهل الزوجة
جينا مع زوج اختي وأم الزوج فيها غيره بشكل مو طبيعي لذلك سببت مشكلة من لاشيء..
أهل خالي يعشقون بجنون القيل والقال يعني فلانه قالت وفلان قال وهكذا
يحبون الهرج
بعكس أمي ربي يحفظها انسانه رزينة ولا تحب الطبع هذا وماتحب الأمور تكبر خلا ص اسكتوا وبس
ونحن أخذنا من أمي هذا الطبع لذلك أخواني مايحضرون أغلب المناسبات عند خالي بسبب الهرج والقيل والقال والمشاكل..
على فكرة زوج أختي من الشخصيات اللي يحب ان المرآة تكون قوية ولاتبين ضعفها حتى بدموعها يعني من شخصيات الشمالي << أنماط الشخصيات قصدي مو قصدي الديااااار
فمثل هالنوعية شلووووون التصرف معه؟؟
مارأيكم بالموقف كيف تتصرف اختي في مثل هالموقف مع زوجها أولا ومع أهل زوجها ثانيا ؟؟..
أدلوا بدلوكم الطيب بارك الله فيكم وجزاكم ربي الجنة 
أنا وأختي بانتظاركم ..
