من جيت ابكي وانا موناقصة ..

السلام عليكم..كيفكم فراشات..بدخل بالموضوع على طول انا ضايقة من جيت من دوامي والسبب وحدة من صديقاتي ..حنا شلة صديقات من اول ابتدائي لين تخرجنا عددنا 5 وكلنا قلوبنا على بعض ثلاثة مننا تزوجوا وانشغلوا بحياتهم لكن نسأل على بعض من فترة لفترة ولسا قلوبنا على بعض والرابعة ماتوظفت ولاتزوجت وانا توظفت بمدينة ثانية ومغتربة لحالي المشكلة بصديقتنا الرابعة انقطعت عنها فترة لظروف صارت لي وشرحت لها لكن مو قادرة تقتنع ومبدأها انه لقيتي غيري واستغنيتي وكنت اراعي نفسيتها لانها جالسة بالبيت وصرت اتصل دايم ولاترد وارسل رسايل من باب العشرة اللي بيننا ولا ترد وهذا الكلام العام..وبالنهاية ارسلت لي اكتشفت انك اكبر كذابة واكبر منافقة واذا لقيتي غيري تستغني وسبت كمان بصديقاتنا الثلاثة ان كلكم تخونون العشرة..انا قريت رسالتها وزي النار بقلبي منافقة وكذابة ويلاه وين عايشة انا وصعبت علي نفسي ارجع احاول فيها قلت بنفسي((من عافنا عفناه لوكان غالي))وطنشت الموضوع بهذي الفترة هي قطعت علاقتها مع كل صديقاتي هم اتصلوا فيها فترة وكذا مرة وماترد ..لدرجة صاروا مايعرفون شي عنها..امس احدى اخواتي شافتها باجتماع وسلمت على اختي وسألتها كيف فلانه؟اللي هي انا وقالت اختي كويسة واني لسا مانقلت بمدينة ثانية ادرس..وخبرتني اختي..قلت بنفسي يمكن حنت لايامنا ورجعت نفسيتها تتعدل خل ارسل لها رسالة بالذات ان كل شلتنا فاقدينها ويسألون عنها ارسلت لها رسالة حلوة ابيات شعر فيها انا مشتاقين لها وفاقدينها وشوفي شصار بيننا بالرسايل..باكتبها من الموبايل كلها وانتوا احكموا..
كتبت انا: لا تظن اني تعمدت الغياب..الظروف اللي تبيني افقدك..والله ان فراقك عندي عذاب..وخايف ان الهجر عني يبعدك..يشهد الله وسط قلبي لك كتاب..عنوان الكتاب ان ربي يسعدك)) وكتبت اسمي لان كنت تو مغيرة رقمي وهي ماتعرفه. شوفوا وش ردت:كتبت:حبيبي نفسي عزيزة من جفاني جفيته حتى لويصعب على القلب فرقاه..الصاحب المغرور يبقى في بيته..والله مااهين النفس وادور رضاه..وان طالت المدة وانا مانسيته..بأعز النفس واجبر القلب ينساه))
رديت كتبت((انا ماغلطت برسالتي بس حق العشرة والحمد لله واثقة من نفسي والكل عارف من انا مو محتاجة اتعذر لأحد))
كتبت لي((للأسف كنت ماخذا فيك مقلب واللي يعرف حقيقتك ماظن يعاشرك!!
هنا يابنات احس غصة وقفت بحلقي وش حقيقتي وش محد يعاشرني اللي يسمع يقول نمامة والا كذابة والله جرحتني بقوة وانا مااستاهل منها كذا وماامدح نفسي بشهادة الجميع محبوبة الحمد لله وعلاقاتي بكل الناس زينة صديقاتي من الابتدائي ولاعمر وحدة منهم غلطت عليها وكلهم لاضاقوا والا احتاجوا والله مايتصلون الا فيني واحبهم ويحبوني وبالمدرسة طالباتي مرة يحبوني والمدرسات انا الوحيدة فيهم اللي مالها حزازيات ولا مشاكل مع احد والله من طيبة قلبي مااشيل على احد ولا احقد واقدم الظن الزين دايم المهم صعبت نفسي يوم قريت ردها كتبت((حقيقتي!!!اسالي فلانة وفلانة وذكرت اسماء شلتنا اساليهم عن حقيقتي ويعلمونك..لا تتكلمي كلام تندمي عليه فيه رب يحاسبكمو أنا.اللهم اني تصدقت بعرضي على من ظلمني)))وارسلتها
ردت علي((شكلك فاضية قلتي اتسلى او مااحد اعطاك وجه من البنات عشان كذا تذكرتيني))
رديت عليها وكنت معصبة ((بصراحة ماني فاضية اسمع تجريح ولو على حبايبي عدي واغلطي الله يخليني لهم.لاترسلي رجاء))
ردت علي((والله ياليت تمسحي رقمي لأن مايشرفني اعرف وحدة مثلك بس ياخسارة اني عرفتك))
رديت عليها((ماراح ارد عليك لأن اخلاقي ماتسمح لي اغلط واذا عندك زيادة تجريح لاترسلي))

والله مغتلقة من اللي صار ومابي اندم اني طيبة ولااشيل بنفسي..لا اله الا انت سبحانك اني كنت من الظالمين ..ابي حد يقول كلمة تريحني مخنوووووقة …. 😳