عالم البنات النسائي كل ما يخص المرأة العربية من ازياء وجمال والحياة الزوجية والمطبخ
كيف تكوني سيدة صالون ……لا سيدة …..سيكل……
سلامين وحتتين …….هذا الموضوع ..إهداء …..لعيون (تسووواهن …) …( مهددة الأخت بأبرة )
ولعيون كل سيدة تحب ان تكون جلستها مرغوبة ….
مهوب إلا طلعت من بيت الناس كسروا وراها زير…..
×××××××××××××××
دايماً ننعزم ونلبي دعوه اللي عازمينا ….
بس كم وحدة منكم تكون جلستها مرغوب فيها من قبل اهل البيت اللي هي فية ؟؟
عمركم فكرتوا بالفكرة اللي كونوها عنكم ؟؟
قد حسبتوا حساب الإنطباع الأول ؟؟
يمكن بعضكم ماقد سمعت فية ولا جابت خبرة ..
(كل مايعجبك والبس مايعجب الناس )
معظم الناس (وانا منهم …) يكونون انطباع اول عن الشخص اللي يشوفونة اول مرة …
وعلى ضوء هالإنطباع …تتحدد علاقتهم معاة مستقبلاً ..
مثلاً …
فية حريم اذا راحوا للناس …مايهتمون في مظهرهم كما ينبغي ..
ومو معناة انك تلبسين ماركات …لا موشرط …لكن مايمنع تكون ملابسك نظيفة …
خالية من (التلطيط ) …
( انا شفت وحدة من فترة بجمعه …كانت تنورتها من تحت محرقة بجمر …والله …
فيها فتحات تكييف من تحت …لية طيب ؟؟؟المشكلة انها ماعليها مادياً …)
ولا تحسبون الناس ماينتبهون ..لا ينتبهون ..
واللي تجي وريحتها كشنة …وكابة عليها غرشة عطر عشان تغطي الريحة ..
تعالي شوفي عاد تفاعل الكشنة مع العطر …..مفاعل نووي ..
××××××××××
(فن الإصغاء للغير )
هذا فن لايتقنه إلا يمكن 30% من نساء مجتمعنا …للأسف …مع انها اهم نقطة
تدعم الإنطباع الأول …
مثلاً …تجيك الوحدة تروي قصة معينة ولا تبدي رايها بموضوع ماتصبر الضيفة المملوحة
لين تخلص سالفتها ..لا ..تنشب الكلام في حلقها من كثر المقاطع …
(مرة كنت في جمعه ..وقامت وحدة تقص قصة حادث صاير في الرياض …وتحكي عن السائق
وانة شالوة ميت ومدري ايش …وتجي ذا الضيفة البثرة وتنط في حلقها ..لا لا لا ..مهوب كذا !!
يقولون ….مات في المستشفى !!!!!!!!!!!!!!!!!!!!!!!!!!!!!)
طيب ؟؟؟؟هماة مات وخلص الله يرحمة ؟؟لازم تفشلينها …والمشكله مصدرها (يقولون )
كان خليتيها تكمل السالفة على اللي هي علية …وش بينقص ولا بيزيد ؟؟
تلقينها من داخل ودها تقوم تطحنها ..
ولا عاد اللي تقعد وانتي تكلمينها ومتحمسة …عيونها تتلوقط في مجلس الناس ..
ولا في جزمة وشنطة اللي جنبها …وانتي تحاكينها ….
مهوب فشيلة ؟؟
×××××××××××××
(فن انتقاء الموضوع المناسب للنقاش )
عندنا بشرية ..اللي في بطنها بتطلعة …ماتفكر يناسب مايناسب ..بتفك هالخشة وتحكي
وبس ….
ساعات يكون في المجلس ناس مايناسبهم الموضوع اللي تطرحينة ..
مثلا …تتكلمين عن الزواج والزوج وفية مطلقات ولا عوانس قاعدين ..
تتكلمين عن ولادة ولا امور خاصة …وفية بنات جالسين ماتزوجوا ..
(عاد وفية ناس تحب الشرح التفصيلي بهالمواضيع )
تتكلمين عن السفر والفلوس والماركات وفية ناس قاعدين على قدهم ولا مايقدرون ..
ولا تقولون وش نتكلم فية ؟؟بتلقون موضوع …ماخليت …
لكن لازم نتعود على مداراة مشاعر الناس …لأن هذا يكون انطباع رائع عننا ..
×××××××××××
(رحم الله من زار وخفف )
بعض الحريم الله يهديهم ..يروحون لناس اول مرة يشوفونهم …ومع ذلك تقعد تسهر عندهم
لين 2 ولا3 …عيب بصراحة …حتى لو كانت المستضيفة مرحة وحبوبة ..برضة عيب
كل ناس عندهم خصوصية …ساعات زوجها يتضايق وماودها انك تحسين ..
طبعا تختلف ظروف العزايم …بس والله اشوف فية ناس يسوونها ..
هذا عاد غير لو صارو معك بزرانك …
××××××××××××
(حبي للناس ماتحبين لنفسك )
فية حريم …مايهمهم انهم ياخذون بزران معاهم للعزايم اوحتى الإجتماعات المختصرة
بحجة ماعندهم احد يمسك عيالهم ..مع انك ممكن تصرفينهم عند ام ولا اخت ..
لكن حتى لو بلاك الله وخذتيهم معك ..
انتبهي لهم ….(تقعد الوحدة تفك كشرتها تسولف وتتقهوى وتترك هالبزران يرعون
في بيت المرة …يكسرون يحوسون يوصخون وهذا اقل شي ممكن يسوونة ..
وهي ولا كنها تشوف …تلقين راعية البيت مسكينة طول اليوم وهي ترتب وتنسق
في هالتحف والزرايع …واخرتها ………..)
لكن لو كل وحدة حطت نفسها مكان راعية البيت ….وحست بالقهر اللي تحسة
يمكن راعت هالنقطة ….
وحدة مرة تقولي انا ماعاد اعزم فلانة بسبب عيالها …وانقطعت علاقتهم …
تقول لأن زوجي كل ماطلعت مني طب فيني بسبب البلاوي اللي يخلفونها وراهم ..
××××××××××××
( خلي اللقافه في بيتكم )
بعض المملوحات الله لايبلانا …من تدخل وهي تسأل
وش ذا ؟؟وذا ليش حاطينة هنا ؟؟؟(تدبرهم بعد)
وذا بكم ؟؟ومن وين ؟؟(فية ناس مايحبون احد يعرف
من وين يشرون ..عادي هم احرار )
اذا هم سولفوا ممكن تعرفين من خلال حديثهم
من وين وبكم بدون ماتنشبين …
وفية ناس مايحبون الأسئلة الخاصة والعائلية ..
ودامك في بيتهم لازم تراعين هالشي حتى لو ما ارضى طموحاتك الفضولية ..
××××××××××××
واخيراً وليس اخراً…الحديث يطول في هالنقطة …بس حاولت اختصرها على قد ما اقدر
لأن فعلاً شي مهم ان تكون شخص مرغوب فيك ..ويدورونك الناس اول مايفكرون
يحطون عزيمة ..مهوب تطلعين ويقعدون يزغرطون …ويقولون الله لايعيدها …
((عاد واحنا عندنا طبع ….نعلق بإنطباعاتنا والحرمة توها مابعد حطت رجلها في الشارع
…..نحش فيها ..))….وسلامتكم ….اللهم اجعلنا من عبادك المحبوبين …
((((ملاحظة ))))………
سيدة الصالون هذا لقب بريستيجي يطلق على السيدة اللي (تواجة في المجتمعات
المخملية والكل يدور قربها )
منقووووووووووووووووووووووووووووووووووووووووووووووو وووووووووووووووووووووووووووووووووووووووووووووووووو ول
