قصة ولادتي كلها طرافة

حبيت اكتبلكم قصة ولادتي بكل الطرافة الي فيها طبعا وقتها مانت طريفة بس بعد اسبوعين كل ماافتكر اضحك
ولدت يوم الخميس 12/14 السعة وحدة الا ربع
جاني الطلق يوم الربوع الليل من تسعة ونص وادق على زوجي تعال بسرعة شكلي بولد يقولي استني شوية يمكن يهدا زي كل مرة قلتلو لا مو زي كل مرة وهادي تاني ولادة لي ومتاكدة ان هادا هو الطلق قالي طيب شوي يدق عليه ويقولي خلاص انصرعتي اجيكي اقوم اصرخ عليه واقولو انت لسه ماجيت ليش بكذب عليك يقول انا تحت امزح معاكي انزلي>>>>مزح وقت الطلق عاد اتمنيت ان الرجال يجربو الطلق عشان يبطلو خفة دم في هادي المواقف
المهم نزلت بسرعة وكنت امشي عادي لاني كنت بين الطلق وصار يقولي ماشية زي الحصان وتقولي بولد
قلتلو استنى شوية الالم بيجي كلها دقيقة
وصلنا المستشفي وانا كلمة ماتكلمت من الالم وهو هروج عن اصحابوا ماادري ايش يحس فيه وقتها
ولمن نزلنا المستشفى يقولي سوي حالك تعبانة مرة عشان يدخلوكي الطواري على طول
قلتلو وليش امثل وانا تعبانة بجد<<<<كل هادا لاني كنت اتألم بصمت من الحيا
المهم طلعوني الطواري وعملولي تخطيط طلع ولادة والرحم مفتوح تلاتة ونادوا الدكتورة قاست قالت اربعة قال زوجي وي توو كان تلاتة قلتلو ياويلي شكلي ماراح اولد بسببك انقلع من قدامي وشوية يجيني الطلق يسألني ايش حاسة دحين اشرحيلي نوع الالم كل هادا وهو يضحك وان ودي بقارورة وارميها عليه وشوية يقولي خليني اقول الى ابغاه انتي تعبانة ماتقدري تسويلي شي قلتلو ليه ايش كنت اسوي اول حسستني انى مجرمة وخرج يكمل الاوراق حسيت انى ارتحت وصرت اقدر اصرخ زي ماابغي من غير مااستحي منو كان من اول خرج وانا كاتمة على نفسي
المهم رجع وقاسوا اللمرضات وقالو صار سبعة ونبض الجنين ضعيف بنادي الدكتورة ولادة وجات الدكتورة ودخلوني الكشك وهو مادخل وماحطولي مسكن عشان النبض وعندي بواسير فلمن كنت ادف احس ان روحي بتطلع وصوتي يمكن الى في المدينة الي جنبنا سمعني باقي القصة سمعتها من امو واختي لانهم كانوا معاه عالخط دق الحلو على امو وحط الجوال علباب عشان تسمع صوتو وهي تبكي وتقول قفل الخط مااقدر اتحمل وهو مو راضي وشوي قفلت الخط بوجهو ودقت اختى تطمن عليه تقولي يقول انو مستني ورا الباب بسبب صوتي ويقول ليكون موتوها وربي لاقلب الدنيا عليهم ولمن خرجوا لسه بيضارب الا ويقولولو كلهم تمام وجابت ولد طبعا انا خرجت صاحية لانهم مابنجوني واحتسب الاجر عند الله في ذلك وصرت اقولو طلعت تخاف عليه طيب ليش الحركات الى سويتها وقت الطلق يقولي وربي ابغى الطف الجو عشان تنسي الالم>>>>>مادري الرجال كيف يفكرو بس اهم شي حسن النية
المهم هادي كانت قصة ولادتي بمواقفها الى ماراح انساها