عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم
كيفكم كرووشات؟؟؟
اليوم بحكيلكم قصة ولادتي الأولى..
انا كانت معي ولادة مبكرة من الشهر السابع تقريبا يعني لما يحطولي جهاز الطلق بيلقوا معي طلق قوي ومنتظم يوصل 100 بس الرحم مقفول وتنومت كثييير فالمستشفيات من السابع واطلع على مسؤلييتي
واخذت اجازة شهر من الجامعة مع اني كنت اتمنى اداوم وكذا بس ممنوع الحركة عشان مايفتح الرحم
وآخر اسبوعين من الثامن برضوا اتنومت ثاني عشاان الطلق وكنت احس بطني يتحجر طووول الوقت بس فالمستشفى كل شوية ابرة مسكن فالعضل وانام كثيير بسببها عشان تخفف الطلق وطبعا اعطوني ابرة الرئة عشان البيبي
فالاسبوع الاخير من الثامن خلاص طفشت ووصلت معي وخرجت من المستشفى على مسؤوليتي 😆 🙂 ورحت داومت فالجامعة ولقيت صحباتي وانبسطت كثيير لكن اثناء المحاضرات كان يجيني طلق وتتحجر بطني واجلس ادعي ياارب مااولد فالقااعة 😆 hy:فشششلة واخاف الموية تنفك وكدا
وكان زوجي زعلان اني اداوم وامي مو راضية وحتى الدكتورة خبيت عليها اني اداوم خخخخ مررة تهور
المهم اول ما دخلت فالتاسع اول يوم رحت للمستشفى وكشفوا علي وكانت قابلة عسسل وماحسيت فيها ابدا قالت لي مفتوح اسم ونص وبما انك بكرية احتمال تطولي وماتولدي إلا بعد اسبوع او اكثر
طبعا اخذت اجازة من الدوام وصرت اتمشى فالليل مرة اروح السوق ومرة الممشى وثاني يوم فالتاسع رحت تمشيت لمدة ساعتين ومشي سريع ورجعت لبيت امي وتروشت وتعشيت وشربت عصير توت معاه ملعقة زيت خروع وعملت لي بعدها قرفة وشربت منها فنجانين مع الحليب
وفآخر الليل جلست اتمشى فالبيت واتفصح فالنت واقرى قصص الولادة وانا مكيفة ومو جاي عبالي اولد نهائي إلا بعد اسبوع حسب كلام القابلة
وطول الوقت كنت احس بتحجر فبطني وبما اني تعودت ع آلام الطلق من السابع فمو حاسة بفرق هالمرة
وكلمني زوجي وكان وقتها مسافر ويقولي لا لاتشربي قرفة او اي شي انتظريني اجي عشان امشيك واتمشى معاك واحضر فوقت ولادتك وقلتله طيب خلاص عشانك بروح انام ولما تجي بكرة اتمشى ثاني ونكمل المشروع 😆 hy:
ورحت نمت الساعة 3 الليل وطول ما انا نايمة احس بألم وصحيت الصباح الساعة 6 واشوف بطني والمسها اخاف اكون ولدت وانا نايمة هههههه
سبحان الله اول ماتشوفني امي تقولي يلا نروح المستشفى اقولها لييش تقولي شكلك تعبانة سبحان الله قلب الام
قلتلها طيب اروح بس عشان آخذ اجازة للجامعة لان شكلي ماراح اداوم بكرة وعندي اختبار 😈
وتجيبلي امي فطور وتحاول فيني عشان آكل بس مالي نفس بالمرة ويادوب آكل لقمتين واشبع خلاص
واتصل ع السواق يجينا واتجهز وامي تقولي باخذ شنطة النونو وانا ازعل اقولها لا لاتاخذيها مو لازم بس بروح اخذ اجازة وفبالي ماابغى اولد إلا لما يجي زوجي من السفر اليوم:D
وفالسيارة امي تاخذ معها اغراضي واغراض النونو وانا اشوف ماله داعي
وصلنا المستشفى واروح الاستقبال واسأل عن دكتورة النسا يقولي الموظف شو الحالة ؟ ارتبكت مو عارفة شقول لكنه سأل ولادة؟ ولقيت لساني يتحرك ويقول ايوة سبحان الله وانا مو عارفة شي
وقام بسرعة ونادى النيرس واخذتني معاها قالت اجيب لك كرسي اقلها لا بمشي ع رجولي واطلع معها المصعد لقسم الولادة والقى الدكتورة والطاقم ينتظرني
سألتني الدكتورة بكرية؟
اقولها : انا بس جاية اخذ اجازة لاني حاسة بشوية ألم
وتقولي طيب تعالي اكشف عليك
وانا ارفض بحجة انو رحمي مقفول من السابع وكذا وبس هي تصر علي
واطلع ع السرير وتكشف علي وانا فجأة احس بالألم وتنزل دموعي بعدين امي تسألها : مفتوح الرحم يا دكتورة؟؟
إلا الدكتورة ترد وكانت المفاجأة: خلاص معاها ولادة رحمها مفتوح ماشالله 8 سم وتكلم النيرس جيبيها ع غرفة الولادة
واقوم انا ابكي لاني مو متوقعة هالشي ابداً
ومن شدة ما انا متفاجأة اقوم من السرير وامشي ع رجولي ورا الدكتورة اطاردها يا دكتورة كيف ولادة مستحيل ؟؟
وادخل غرفة الولادة برضو ع رجولي واطلع ع سرير الولادة وانا لسه طرحتي علي واتناقش مع الطبيبة : كيف ولادة وأنا ما معي لادم ولاموية ؟؟؟
وهي الدكتورة عصبت وصارت مطنشتني ويرفعوا رجولي ويحطولي المغذي وانا لسه مو مستوعبة ودموعي تنزل شلالات وبدون مقدمات الدكتورة تدخل يدها وتفتح الموية وتوسع بيدها وتقولي يلا دفي الراس باين
وانا لسه ابكي واقول لا لسه مو ولادة توي دخلت التاسع انا
وعصبت الدكتورة وتقولي خلاص اسويلك عملية وتهددني وانا ابكي وهي مارحمتني وقتها اتذكرت
ان الدعاء مستجاب وقمت ادعي بصوت واطي لابوي بالرحمة ولنفسي ولاهلي ولما لاحظت الدكتورة اني ساكتة استغربت وقامت تصارخ : لا يكون الطلق راح منكـ ؟؟؟؟
وانا اقلها حرام عليك اصبري علي شوي
وقامت تنادي امي ودخلوها علي وانا امي معها السكر ما تتحمل فديتها اول ماشفتها قلتلها لا تخافي يا امي انتظريني برى لاتدخلين علي
وكرهت هاالدكتورة اللي مافقلبها ذرة رحمـة
واحس بطني يتحجر واصرخ لاني مو حاسة بنفس فصدري واحس بالدكتورة تشق توسع المنطقة ويطلع الراس بعدين تجيني طلقة ثانية وتطلع بنتي الحمدلله وأسألهم ايش جبت يطنشوني هههههههه حالة
ومابكيت بنتي يا قلبي عليها وشالوها يشوفها الدكتور بسرعة حتى انا مالحقت اشوفها
بعدين تجي ممرضتين ويطلعوا فوق بطني عشان المشيمة تطلع واحس فيها برضوا كأنها ولادة ثانية بعدين يجيبوا لي كمام وقبل ما يركبوه تبدا الدكتورة تخيط وانا اتألم واحلف لها والله يادكتورة ماتبنجت
وتعصب الدكتورة وتخيطني بقوة وانا اتألم وابكي حتى ماقدرت اثبت فمكاني
والحمدلله لما خلصت شالوني ع السرير الثاني وجلسوني فالملاحظة ساعتين كانت صعبة علي من الم الخياط والغثيان من البنج وبعدها طلعوني لغرفتي وروشتني الممرضة ولبستني وغيروا لي ملابسي وارتحت شوي
وما انسى احلى لحظة لما جا زوجي يجري مستعجل خايف علي ومتضايق يبي يشوفني ويتطمن اول ماشافني باسني وجاب بنتي وحطها جنبي وكنت اول مرة اشوفها وكان احلى شعور بحياتي لانها كانت قمر لا قوة إلا بالله
وقالي شوفي بنتنا وسماها بالاسم اللي انا ابغاه وفرحت كثيير
الله يخليه لي ويسخره لي ويصلح جميع ازواج المسلمين ويخليلي امي تعبت معي ويجزاها خيـر
والحمدلله الحين بنتي عمرها سنة وثمان شهور وانا حامل فالشهر الخامس ودعواتكم لي بتيسير الولادة الثانية
وكتبت لكم القصة عشان يستفيدوا البكريات ويعرفوا ان الولادة ممكن تجي فجأة ومو شرط على تخطيطك
وان المهم يركزوا على الطبيبة تكون طيبة وترحم ومو مهم المستشفى يكون فخم او جديد مثل ماحصل معي..
وآسفة ع الإطالة
