عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
لاحظت كثيرا أن الكثير يخلط بين بعض الأجهزة الرئيسية المستخدمة في الشبكات والانترنت فقررت أكتب موضوع خفيف يوضح الفرق………….بس عاد برمس عامي عشان البدو يفهمون ^_^
أول شي المودم…………….المودم جهاز ماله خص في الشبكات أصلا ! المودم عبارة عن جهاز يحول الإشارات الهاتفية التماثلية (Analog) إلى إشارات رقمية (Digital) والعكس. أي كمبيوتر مشبوك في الانترنت لازم في النهاية يوصل لمودم بس اللي يخربط في الناس إنه في أحيان كثيرة المودم يكون مدمج مع الراوتر اللي بنشرجة تحت. يعني يكون مودم وراوتر في نفس الجهاز. أحيانا بعد تزيد الخربطة ويكون المودم والراوتر والأكسس بوينت في نفس الجهاز……….بس الفكرة هيه هيه.
الراوتر
عاد اهنيه ركزو شوي عن تتخربطو! الراوتر شغلته بالضبط انه يشبك شبكة مع شبكة(connects networks) وعشان ابسط الفكرة انت تقدر تستخدم الراوتر مالك عشان تبني شبكة صغيرونة عندك في البيت، هذه الشبكة مربوطة مع الشبكة العودة اللي هيه الانترنت ! شوي شغلته تشابه السويتش فوايدين يخربطون بينهم.
السويتش
هذا الجهاز عجيب وشغلته بسيطة. شغلته انه يربط أعضاء الشبكة مع بعضهم البعض. يعني اذا مديت كيبل كات5 من راوتر لين مبني معين واريد اشبك المبني كله في الشبكة مع الراوتر بشبك الكيبل هذا بسويتش ومن السويتش بمد كيبل كات5 ثاني لكل كمبيوتر تريد تشبكه. طبعا السويتش يكون فيه بورتات(Ports) تروم تشبك كمبيوترات على عدد البورتات ! وضحت الفكرة؟
الأكسس بوينت
الأكسس بوينت من اسمها هيه نقطة وصول للانترنت يعني اشبك وياها بتصير مشبوك بالنت. طبعا هيه اتكون أداة لاسلكية. يعني الكمبيوترات تشبك عليها وايرلس وتتصل بالنت. طبعا الأكسس بوينت تكون مشبوكة براوتر أو مودم أو سويتش.
اممممممم شوي يلخبط الموضوع صح؟ بقولهم شو اكثر شي يلخبط بالناس. عندنا في الامارات معظم الناس تستخدم شي يسمونه Wireless Gateway وهذا الجهاز باختصار عبارة عن ثلاث أجهزة في واحد ! هو مودم وراوتر وأكسس بوينت ! طبعا المودم ياخذ النت من واير الاتصالات سواء كان خط تلفون او مثل الحين فايبر والراوتر تشبك فيه الكمبيوترات بوايرات كات5 وبنفس الوقت تروم تشبك كمبيوترات لا سلكيا يعني يشتغل نفس شغلة الأكسس بوينت!
طبعا شي بعد أجهزة عبارة عن Wireless router فقط يعني ما فيها مودم. في هذه الحالة لازم يكون عندم مودم خارجي تشبكه معاه عشان تتصل بالنت.
زمان لما كنا نشبك بالنت عن طريق المودم فقط(أيام الدايل أب مثلا) كنا نشبك كمبيوترنا بشبكة الأنترنت ونصير جزء منها……..يعني ما تكون هناك شبكة داخلية في البيت.
هل واضح كلامي؟
للاستفادة أكثر أنصحكم بالويكيبيديا طبعا:
السويتش
Network switch – Wikipedia, the free encyclopedia
الراوتر
Router – Wikipedia, the free encyclopedia
الأكسس بوينت
Wireless access point – Wikipedia, the free encyclopedia
وفي النهاية المودم
Modem – Wikipedia, the free encyclopedia
وهاي صورة الأجهزة كلها مع بعض للتوضيح …………..أحلى شي الإشعاعات اللي طالعة من الأكسس بوينت كخ كخ كخ
وأي سؤال أنا حاضر………وسامحونا الموضوع كان على عجالة
