عالم البنات النسائي كل ما يخص المرأة العربية من ازياء وجمال والحياة الزوجية والمطبخ
عزيزاتي أنا ألحين صار على عقد قراني سنة وثلاث شهور وعرسي بيكون إن شاء الله على الشهر إلي ياي.
مشكلتي إنه أنا متعودة على أسلوب حياة غير يعني أهلي لما باطلع مشوار السوق مثلاً أستأذن منهم وأطلع وساعات أمي ما تقدر تطلع معايه أو تكون طالعة فأقضي مشواري بروحي
هذي الأيام خاصة يكون عندي شغل ضروري للعرس وهو ما يرضى إني أطلع بروحي مع إني أحرص إني ألبس النقاب في الأسواق لأني أحس براحة أكثر. وانا آخر وحدة من خواتي وما عندي حد يطلع معاي غلا أمي في البيت.
ساعات أطلع بدون ما أخبره وأسوي أشياء بدون ما أقوله لأني أعرف إنه ما راح يفهمني من تجربتي معاه والسبب لأني إذا قلتله تفاصيل كل شي يكون فيه شي ما يعجبة ويتم يقول لي ليش سويتي وليش هالكثر صرفتي ويضايقني وبعدين نزعل.
مثال: بخصوص حجز الفندق أعرف إنه هو حجز بدون اختيار القوائم للأكل يعني دفع بس. اتصلت مرة أختي وبعدها اتصلت أنا الفندق وحددت القائمة بدون ما اخبره لأني أعرف إنه ما بيعيبه ولما كلمني قال لي سرت الفندق وقال لي اللريال إنش بتروحين الفندق وكلمتيه بخصوص القائمة بس قلت للريال أنا ما عندي خبر. قال لي أنتي كلمتي الريال ؟ قلت له لا أختي كلمته على أساس إني أنا وحددت وياه الأشياء إلي نبغيها ، فقال لي ليش ما تخبريني بهذا الشي إنتي ما تعيبيني هالأيام وايد إتزعليني قلت له ما صار شي حتى ما أكدناله على شي. حرج وقال مع السلامة وصكينا الخط وايد اضايقت منه قلت ما عليه يمكن أنا غلطت طرشت له مسج قلت له آسفة وحقك علي (مع إنه ما هانت علي نفسي) و لما اتصلت استأذن منه علشان أطلع نفس اليوم حسيت إنه لين ألحين شايل علي أو ما رد يتصل فيه إلا علشان يقول لي إلبسي النقاب وانتي طالعة.
أوكيه حسيت بالغلط واعتذرت بس الموضوع ما يستاهل شو اسوي أكثر عن شذي. اضايقت منه وايد لدرجة إني أروح غرفتي واتم أصيح. أو من قهري منه اليوم اتصل كم مرة يقومني لصلاة الفجر كنت واعية بس ما رديت على تيلفون الغرفة وموبايلي مصكر له ألحين حسيت شوي إنه الضيق خف عني لأني حسسته إني أنا زعلانه.
هل صح هذا إلي سويته؟ وكيف أتعامل معاه؟ مع إنه لما يزعلني يراضيني بنفس اليوم لكن أنا منقهرة من تصرفة على شي ما يستاهل.
