خطبتني مطلقة .. وصار للقدر كلمة ..! اثرت فيني كثير بنات

بسم الله الرحمن الرحيم
ببداية الموضوع يشهد علي الله ان ما بقولة صحيح وحصل لي بوقت قريب وماكن ببالي اطرحه هنا بالمنتدى لإنه ماراح يضيف لا لكم ولا لي شي لكن نهايته فيها رسالة لأي بنت مطلقة او ارملة او متأخرهـ عن الزواج او بنت مالقت راحه والسالفة من والى :
جار لنا اتواصل معاهـ دائماً بالمسجد واحياناً ببيته او ببيتي الرجال ماشفنا منه الا كل خير واقصد بشفنا
انا وجيراني جميعاً رجل معروف بالصلاح والرجولة كان دائماً وابداً يكيل المدح لي وللوالد رحمة الله عليه
كنت اعتبرها مجامله مثل كثير من المجاملات اللي تتداول بين الناس وبمجالسهم وبلقائاتهم
يثق فيني الرجال ثقة عمياء لدرجة انه طلب مني وبمرتب عالي جداً اتكفل بنقل بناته وبنات بناته للمدارس والجامعه بحجة انه رافض مبدأ السواقين وبنفس الوقت
مايقدر على مشاويرهم ورفضت باعتذار لإني مو متفرغ .. ولدرجة انه ايام كثيرهـ بحال سفرهم يعطيني مفتاح للبيت بحال اي طارىء لا سمح الله يعني باختصار وببساطة الرجال يثق فيني ثقة عمياء
ويقدر الوالد ويعزه معزهـ مايعلم فيها الا الله
الشاهد .. من فترهـ طويلة وهو يروح ويجي على سالفة بنتي فلانه بنتي فلانه لدرجة اني مليت هالموال والسالفة مع الوقت عرفت مغزاهـ وهدفه من تكرارهـا بس ماصرحت له بأي شي ولا بأي ردة فعل
لين زاد الرجال العيار وبدأ بالتلميح اكثر واكثر بأكثر من مناسبة لين حصل فعلاً انه قال ابو البنت .. واشهد الله على ذالك حرفياً .. خذها والله موجودهـ البنت والله ان تركب معك الحين ..
يقصد السيارة قلت له برد مباشر
والله والف نعم فيك وفيها يابو فلان بنت رجل واخت رجال بس الله يرزقها بمنهو احسن مني دار بيني وبينه كلام طويل بعد هالكلمة المهم دخل بأطباع الرجال الحادهـ المباشرة قال كانك تعزني وانا ابوك
فلاتخلي بنتي بيد غيرك وان نويت خل زينك وشينك لبنتي مو لغيرها وما اعطيته كلمة ولا رد راح بحال سبيلة
كتمت على الموضوع تماماً يعني ما احد يدري الا انا وابو البنت تفاجئت الصباح وانا رايح لشغلي اتصال من الوالدهـ الله يحفظها تقول خير ان شاء الله وش سالفة فلانه وابوها دار بيني وبينها كلام طويل
وانا استغربت فعلاً ان المسئلة اخذت طابع الرسمية وانتشرت قلت لها السالفة كذا وكذا وكذا وان من فترهـ هالموضوع يطرحه ويلمح فيه وانا اساساً يدري عني اني حالياً ما اقدر اتزوج لأسباب كثيرهـ
قالت الوالدهـ ان ام البنت متصله وتدعي ان الله يوفقكم وجلست تمدح فيني[[ هي تمدح الوالدة ]] وتمدح بالوالد … الخ
لين قالت لها الوالده ماشاء الله ولدي خطب وانا مدري تفاجئت ام البنت وقتها وقالت ان الوالد امس دخل علينا وقال يافلانة ان شاء الله انك لفلان ادعي انك لفلان.
انهت المكالمة الوالدة وطلبت منها تنسى هالموضوع لين ارجع من شغلي وبجلسة العصر نشوف الوضع فعلاً كلمت الوالدهـ العصر وقلت لها السالفة ان الرجال دايم يحرجني بهالموال وانا فاهم ومقدر انه
رجل يهمه بنته تتزوج ويبي يرتاح الكل يعرف الوضع الآن البنات مالين البيوت بس انا أكثر من مرهـ المح له وابين ان زواج ما اقدر حالياً عليه ولازال عندي امور لازم احققها قبل الزواج قالت الوالده
الله يحفظها وام البنت دايم تردد وتلمح ببناتها قدامي وتجيب طاريك وطاري اخوانك وتسئل عن اللي يدور او مايدور …
وقالت انا لإني عارفه وضعك ماسبق وفتحت لك هالموضوع وردي لها رسمي دايم وكوني ام عندها عيال تمر علي هالسيرهـ كثير
فمابلغتك لا انت ولا اخوانك
حسمت الموضوع وقلت لها اذا قيل لك عن هالموضوع مرهـ ثانية قولي لهم انه يدعي لها بالتوفيق وانه مايفكر الحين بالزواج وخليها تشوف نصيبها ولاترد احد وان شاء الله ان خيرها مع غيري وانا بروح الآن لأبوها
وبقول له كل شي فعلاً رحت للوالد قلطني وبعد قهوهـ وكم سالفة عاتبته انه كبر الموضوع وحسمت له مباشرة وقلت له عن وضعي وبنتكم الف رجال يتمناها وان شاء الله انها بتلقى اللي هو احسن مني
حاول قد مايقدر يعطيني حلول عن كل شي قلت له انه ممكن يأثر على زواجي فبداية بدراستي برا اللي قربت قال اكيد تبي لك حرمة تهتم فيك وشغلي ومسؤوليتي مع اهلي قال انا اعرف بنتي
واطباعها ماراح تأثر يعني كل ماحاولت بلطف اكنسل الموضوع يعطيني اقتراحات او حلول لين حط يدهـ على كفتي وقال انت تحسبني ابي الفكه من البنت انا مثل ما انا شاريك تراني لإني اعرف
بنتي اقول لك هالكلام بعد تعبي مع تربيتها مايستاهلها الا انت ومثل ما اني اعرفك ترا ان ااعرف بنتي زين وخل نتايج صلاح وتربية بنتي تصير من نصيبك وانك بتدعي لي وبنتي ماراح تضيع
ان شاء الله ومن هالكلام ..
قال لا تعطيني رد توكل على الله وفكر على اقل من مهلك والله يكتب اللي فيه الخير جيت بنطق حرف قال سكر هالموضوع واشرب فنجالك
عدت الايام ولإني ما ابي اعيشه لا هو ولا البنت ولا اهلي بأوهام واحلام رجعت له للمره الثانية بقصد حسمي للموضوع فعلاً ونهايته وهالكلام بالمسجد كالعادهـ بعد ماسلمت على جماعة المسجد وصلت له حبيت راسه تقبل الله
و هلا ابو فلان كيف حالك قال بقرا لي كم صفحة وابيك تروح معي للبيت قلت ابشر
دقايق رحت معه للبيت قال ابيك تشوف البنت اذا قلت انصدمت فهو شوي قلت يابو فلان عدل بدل حلف علي مااطلع من مجلسه الا وانا شايفها
حاولت بكل شي اني انسحب وما اخليه يدخل البنت لإني ادري وش معنى رفضي للزواج من بنت بعد شوفتها [[ للبنت هذا شي مزعج جداً ]] وقلت له هالشي وقلت لا تجني
على بنتك يارجل وانه مايحق لي اشوفها بدون طلب مني ومايجوز
لزم بشكل مايتخيل صار اللي صار دخل البنت طبعاً كانت البنت غرقانه حيا بشكل كبير اولاً لإن من طلب الشوفه ابوها مو انا وهذا شي مزعج الشي الثاني
خجل البنت معروف ومايحتاج تذكير لكن وللأمانة فوق ما انا كنت متضايق الا اني شفت ملاك دخل علي وهذا اللي راهن عليه ابوهـ بالعربي عرف وش ممكن يأثر على الرجال
راهن على جمال بنته اللي بيخليني اتنازل عن امور كثيرة واتركها واتزوج .. البنت اذا قيل عنها جميلة فهذا شوي ماشاء الله تبارك الله لاحول ولا قوة الا بالله امنية كل رجل
طبعاً كلنا بوقتها انا وهي وابوها ساكتين سكوت رهيب وكأن البشرية كلهم ساكتين هدووووء لين حس الوالد اني شفت وانتهيت
قال لها توكلي على الله طلعت البنت وانا شرهت على ابوها وطلعت من مجلسة متضايق
تكلمنا بعدها بكم يوم لإني ماصليت بنفس مسجدنا مثل العادهـ قبل.. وطبعاً وصل للوالده واخواني هالموضوع وعند بعض جيرانا كلمني اخواني طلبوا مني افكر واوافق البنت معروفة بجمالها
وباخلاقه وبتربيتها ومن هالكلام [[ وبعد وقت عرفت انه ابو البنت طالب منهم ]]
رفضت ومو رفضي للزواج بذاته ولا لعيب بالبنت رفض بسبب عادهـ فيني مستحيل تتغير وهي اني صعب جداً اوفق بين شغلتين كبار وهذا لمنهم امثالي ضرب من الجنون فمثلاً انا من
النوع اللي مايقدر يشتغل شغلتين اطلاقاً
واذا اشتغل شغله ركز تركيز كامل وتام فيها وما ارتاح الا اذا انهيتها تماماً وهذا اللي خفت منه ان زواجي يعرقلني بدال ما يضيف لي يعني اذا تزوجت فانا اعطي الزواج حقه بالكامل وكوني اشوف نفسي ما اقدر اوفق ب
ين الزواج وشغلي واهلي والولدة ومسؤوليت اعمال اخواني حالياً وارجع واقول حالياً لإن اتوقع البعض يقول يعني بتستمر على هالوضع لا هو حالياً لإني بهالمرحلة لابد احقق امور
ابي احققها على المستوى الشخصي فهذا كفيل بانه يكنسل زواجي مؤقتاً وانا ماني من النوع اللي يربط الزواج بس بوظيفة او برغبة .. الزواج بالنسبة لي مثل مافيه احضان وحب
وحنان فيه مسؤوليات والتزامات تتعارض مع وضع حياتي حالياً ويا اني اكون مرتب وضعي بالكامل او ما اخطي هالخطوة المفصلية
يعني انا على وجه دراسة برا بعد ما خلصت جامعة وعندي على مستوى دخلي وشغلي امور لازم اتابعها اول بأول تحتاج ادارة ووقت كبير وفوق هذا لأخواني مكتب ومحل ولعدم تفرغهم انا اديرهـا ولا تتفركش امورنا
فعلاً واحاول اوقف على رجولي فما ابي انقز لإني بطيح بسرعه ولا ابي اتخذ قرار جزافي..!
وبكذا لو فكرت بالزواج حالياً ماراح اكسب لا زوا ج ولا حققت اللي ببالي وكل اللي بنيته بـ سنيني اللي راحت يروح بغمضة عين
النهاية صارت مع ابو البنت وقلت له ان هذا قرار نهائي وبنتك نصيبها مع غيري والله يوفقكم جميع .. ناظرني بعد ماسكت شويات وقال ياوليدي
والله اني فوق ما انا شاريك ترا فشل منك ومنحرج وانا ادري اني زودتها معك بس البنت هي اللي خطبتك وانهها هي اللي مصرهـ باستغراب قلت له هي اللي قالت لك قال ايه .. ثم قال بتقول قليلة ادب
ولا بتقول ماربيتها لا وانا اابوك بتغير رايك اذا قلت لك
انها قالت لي بنتي يبه ابي اللي اشوفه كل ماطلعنا من البيت رايح للمسجد احسن من اللي ما اشوفه الا اذا جا وخطب بمجسلك هالكلمة صراحه جت بصميم قلبي وفوق ما انا اعرف عن البنت الآن عرفتها اكثر واكثر
وكبرت للامانة بعيني وعرفت وش هي من بنت سكت قال والله يا ولدي ان يجيها خطاب لو تعرف مناصبهم ووضعهم الاجتماعي ماتصدق ومع ذالك ترفضهم انا طول الوقت اللي كان يكلمني فيه كنت سااااااكت وفعلاً
حسيت اني
نسيت كل الكلام اللي تعلمته ضليت ساكت وابوها مسترسل بالكلام وقال ان بنتي مرت بتجربة طلاق وانت عارف هالشي مع رجل تزوجها ما اراد ربي لهم يستمرون
وتطلقوا يعني الآن بعد كل ما اقرب من النهاية يطلع لي علم جديد الأول سالفة طلب ابوها مني اتقدم لبنته الثانية يدخلها علي الثالثة يطلب من اخواني الرابعه يقول لي ان البنت هي اللي طالبه
وما اخفيكم اني انشغلت بسبب هالموضوع حتى عن شغلي وجلست وقت طويل وكبير افكر وافكر وافكر وماسبق لي بحياتي اني اسستشرت احد بأمر مفصلي بحياتي لإني تعودت اتخذ قراري بنفسي واتحملي مسؤوليته
ولكن بما
ان الموضوع متشعب وطويل اشركت من استشرتهم الوالدهـ اخواني وناس اثق فيهم .. وكلهم اجمعوا على انك تستخير وتشوف وضعك فعلاً استخرت واشترطت قبل اي خطوة اني اجلس مع البنت وابوها واجلس مع امي
وهي اخذ العلم من راسها وابين لها نظرتي للزواج ووضعي قبل وبعد واثناء الزواج وصار هالشي
بعد ايام طويلة رجعت لأبو البنت وقلت انا ماجيتك لا اوافق ولا جيتك رافض انا بقول لك اللي عندي وبقولها اللي عندي اذا تسمح وهذا اول شرط من شروطي اني اجلس معك ومعها واسمع منكم وتسمعون مني
وافق الابو وقال لي خلاص تعال بعد المغرب اليوم ورفضت قلت له خل البنت ترتب وضعها وبعد كم يوم جايكم حددت اليوم وفعلاً تم هالشي دخلت مجلسه
وقلت انا الآن عندي كذا وكذا وكذا وكذا واني ملزوم بكذا وكذا وكذا وبعد فترهـ وضعي بيكون كذا وكذا وكذا وانا رجال فيني وانا وانا وانا قلت له عن امور كثيرهـ ضروري تسمعها البنت قبل يسمعها الابو
قال الامر بيد البنت نادا البنت وطبعاً طلبت انها تكون متغطية لإني للحين غريب عنها فعلاً البنت جتنا متغطية بعد ترحيب جلست اتكلم معها وردودها جداً جداً جداً رسمية وانا راعيت هالشي وقلت لها منتي ملزمة
تردين بس وضعي وحياتي لازم تعرفينها مثل ما اني لازم اعرف وضعك وحياتك واللي تبين تقولين وماتقدرين تقولينه وصليه للوالد انا ماني من النوع اللي ياخذ الزواج اكشط واربح مع اني واثق فيك وبأهلك
وبترتبيتك لكن علشان تكون النهاية سليمة وصحيحة لابد البداية تكون سليمة وصحيحه
عطيتها اللي عندي وبعد يومين كلمت ابوها عن اللي عندها وقالت لي امور كثيرة ما اعرفها وكل شي سليم ومايتعارض قالت لي عن سبب طلاقها من زوجها انه كذب عليها كذبة ماتغتفر اطلاقاً قال لها انه ضابط باحد ا
لقطاعات العسكرية
واللي حصل انه ضابط بالاستخبارات وكان يتغيب عن البيت ا وعادي جداً يدخل البيت خمس دقايق ياخذ شنطته ويطلع يقول عندي مهمة ما اقدر اتأخر وايام
مايشوف فيها زوجته فطلبت الطلاق لإنه كذب عليها اولاً + الرجل مقصر جداً من ناحية كثير من حقوقه الزوجية يعني العيب من الرجال مو من البنت مع انه مقتدر ماديا وبشكل كبير جداً واللي اتضح ان شغلتها اقرب
للاستخبارات
الحساسه (( دبلوماسية )) او استخبارات قطاع حساس يعني حياته شغل في شغل وفوق هذا اكتشفت انه متزوج بالسر من زوجة من احد الدول العربية
تقول اني طلبت الطلاق قبل ننجب اولاد لإني ما ابي ارمييهم على هالدنيا وابوهم هذا وضعه وقالت كلمة رسخت براسي وللآن قالت وانا ماني من النوع اللي يقرر بعدين يفكر >> هالكلمة خلتني اتأكد اني انا
وياهـا نشترك بصفة نجتمع فيها ثنينا
وهذي اول صفة عرفتها فيها بشكل مباشر وزادت قالت واذا تبي تتأكد من هالشي شف قراري بالزواج مابي اتزوج ثم احلل او افكر انا فكرت وحللت قبل اتزوج ولقيت انه من الانسب اشتري رجال اعرفه ويعرفه ابوي
ماسبق وعشت ايام مثل هالايام ولا سبق ان احترت بحياتي مثل حيرتي بهالموضوع وبدأت تتغير نظرتي لها للأفضل انو بنت بهالتفكير والمنطقية والواقعية بتساعدني بأمور كثير واللي كنت اخاف ان زواجي يعيقه
احتمال كبير يزيده ويضيف له واللي زاد اعجابي فيها انه برغم تدينها والتزامها الا انها منطقية ومتفهمه وتحس فعلاً انها بنت تعرف وش تسوي
جلست مع ابوها جلسات كثيرهـ واحمد الله ان ابوها طلع انسان متفهم جداً رغم تدينه الا انه متفهم بشكل ماكنت اتخيله بيوم من الايام على اب [[ بمجتمعنا ]] المحافظ جداً
تناقشنا اخذت مني امور كثير واخذت منها امور كثير وببعض الجلسات جبت امي بدون ابوها قلت يمكن فيه امور ماتقدر تقولها لأبوها ومن كثر ماهي ماشاء الله محكمة تخطيط كل شي قالت لي
ان عندي مرتب قوي جداً لكنه ما يستثمر ومايروح لشي يرجعي بالفايدهـ واختياري لك كزوج من ضمن اهدافه ان زوجي هو من يستثمر فلوسي بما ان لك تجارب وتدير اعمال اهلك واخوانك ونحقق اللي ببالنا انا وياك
يعني بنت ماشاء الله تبارك الله كل الصفات اللي ممكن الرجال يبيها بيلقاها جميلة متفهم متدينة ماعندها حدود مليانة طموح واثقة من نفسها خلوقة ..

منقول