حكاية عشق …. بقلمي

روايتي راح تتكلم عن حياتنا بشكل عام وبما اني فتاه في العشرين من العمر فأكيد راح تتضمن روايتي اشياء انا اعيشها كل يوم وتجارب مرت علي اتمنى انقلها بطريقه ممتعه ومفيده وخفيفه على قلوبكم … راح اتكلم عن الحب والصداقه وكل شي حلو او مر في حياة فتاه في العشرين من عمرها ….

الجزء الاول
ترررن ترررن … مدت ايدها بكسل لجوالها تطفي المنبه و بعد ان تمت مهمتها المزعجه بنجاح رجعت ايدها تحت اللحاف تدور ع الدفا وتسترخي لثواني حتى تفتح عيونها وتستعد ليومها الجديد …
قامت بكسل وفتحت عيونها ببطء وراحت تتروش وتتجهز للجامعه … بطلتنا دارين البنت الهادئه المجنونه بنفس الوقت خفيفة دم لكن وقت الجد عاقله ومتزنه
طالبه في كلية ادارة الاعمال بجامعة الملك عبد العزيز بجده في العشرين من عمرها عايشه حياتها بروقان ماتحب تضيع يومها بدون ماتستفيد منه وتكتب تجربه جديده في كتاب حياتها
تتميز بملامحها الهاديه عيون جميله بمعنى الكلمه مرسومه بطبيعتها سوداء او بنيه داكنه بمعنى اصح وخشم صغير وحلو مع شفايف حلوه وعذبه يميزها شعرها البني الطويل مع حبها للقص لكنه يرجع يطول لانها تعشق الاعتناء فيه جسمها حلو لاهو النحيف بزياده ولا سمين وطولها متوسط تقريبا 165 ….
نرجع لبطلتنا خلصت تجهيز للجامعه وانا اعرفكم عليها … نزلت دارين تحت للصاله شايله شنطتها وعبايتها بيدها لقت امها كالعاده تشرب الشاهي وتتابع الاخبار
عاده عند امها كل صباح تتابع قنوات الاخبار على قولتها تشوف ايش الجديد في الدنيا … باست دارين راس امها وهي تقول ::صباح الخير :: صباح النور اتأخرتي ع الجامعه :: دارين وهي تجلس جنبها :: لا اليوم محاضراتي متأخره :: امها وهي تطالع الاخبار :: طيب افطري قبل لاتروحي :: دارين وهي تلبس عبايتها :: لا مافيني يلا باي السواق بره :: في امان الله …. طلعت دارين متوجهه للخارج لقت السياره وفيها السواق وصاحبتها وصديقة عمرها رغد :: دارين وهي تدخل :: صباح الخير ياهبله :: صباح النور يابقره الناس تصبح بشي عدل وانتي تبدي يومك بسب وشتم :: هههههه يابنت كم مره اقولك هذا من الحب الزايد اسبك ياهبله :: اللهم طولك ياروح اصلا مافي هبله غيرك :: اكيد هبله زيك ههههههههههه وجلسو ينرفزو بعض ويمزحو كالعاده حتى وصلو الجامعه ..
.. نرجع لبيت اهل دارين بيت ابو محمد كانت ام محمد لسه جالسه عند التلفزيون لما رن جرس الباب … فتحت الشغاله ودخلت عليهم دلال اخت دارين الكبيره والوحيده والمتزوجه من ثلاث سنين وعندها ولد صغير يجنن بس يشيب الراس بشقاوته … دلال وهي تسلم على امها :: صباح الخير ماما كيفك :: صباح النور ياقلبي انتي اللي كيفك وكيفو حبيب جدتو الصغير فديتو ياناس القمر ده :: ههههههههه ماما سلمي عليا اول بعدين اسألي عنو وربي انو مجنني ومطلعلي قرون :: ام محمد وهي تشيل ماجد الصغير ::فديتو حبيبي خليه يجننك براحتو يستاهل :: يممممممه ترى اغار انا من يوم جا هذا الفصعون وانتي نسيتينا :: امها وهي تبوس ماجد :: من جدك انتي تغاري وبعدين يحقلي ادلعو حفيدي انتو اتدلعتو وشبعتو يكفي كده ::: هههههههه حاضر ماراح اعترض …
في مكان تاني وفي مكتبه كان جالس بشموخ برغم الملل جالس يطالع الاوراق اللي قدامه بتركيز يحاول قدر الامكان يسرح في عمله بعيدا عن ثرثرة عقله المزعجه واللي قربت توصله للجنون
… من يوم صار اللي صار وهذا اصبح حاله صار يلجأ لعمله يحاول يشغل عقله المتمرد عن التفكير في الموضوع لكن تمرده يتغلب عليه دائما ويرجع يثرثر في داخله صوت عالي ….
عبد العزيز شاب في التاسعه والعشرين من عمره متزن وعاقل جاد للغايه صحيح انه يحب المزح ويحب يعيش حياته مثله مثل اي احد في سنه لكن وقت الجد مايعرف المزح شاب اهمل او بمعنى اصح دفن حياته العاطفيه وتجاهلها لانه ببساطه مايعترف بالعلاقات خارج اطار الزواج ماراح اقول انه شخص ملتزم لكنه يعرف ربه ويخافه في اعراض الناس
…. يتميز عبدالعزيز بطوله الفارع واكتافه العريضه هيئه رجوليه بحته ووجه ذو ملامح حاده قد تكون مرعبه للبعض لكن اللي يتعمق في شخصيته يعرف ان مافي شخص بطيبته وحنانه وطبعا يملك الوسامه وتغلب عليها الجاذبيه والرجوله الطاغيه …. نرجع لعبد العزيز اللي كان منهمك في التفكير في المصيبه اللي حلت على راسه ومايعرف كيف يخرج منها بأقل خسائر ممكنه … يعرف ان قدامه حل من الاثنين أحدهم راح يخسره اعز اصدقائه ويعيش عمره تعيس والثاني راح يخسره عمه وراح يقطع العلاقه بين العائلتين … دخل يده في شعره وشده بقوه بيتجنن من التفكير :: ااه يارب ساعدني ياأرحم الراحمين
… استغفر ربه ورجع يناظر في الورق اللي ع المكتب يحاول يلهي نفسه ويرجع لعمله ….
الساعه واحده ظهرا داخل محمد البيت وقبل لا يسكر الباب دخلت ركض وهي تصرخ اخته دارين :: حمووود وجع يعني مو شايفني كنت بتسكر في وجهي :: محمد وهو مو طايق احد ويحس هموم الدنيا فوق راسه ::داريييين لمي لسانك واقصري الشر اليوم احسنلك ولا وربي لا … وقبل لايحلف بشي يغضب ربه استغفر وهو يسمع صوت امه وهي تقوله :: ايشبكم مسوين صجه كده اهدو شويه :: محمد وهو يسلم على امه ويبوس راسها :: اسف يمه بس بنتك تشيب الراس :: امه وهي تناظر في عيونه المرهقه :: ايشبك محمد جاي من الدوام بدري شكلك تعبان ياولدي فيك شي تحس بشي .. وهي تتلمس جبهته تشوف حرارته :: ابتسم محمد لأمه وحنيتها عليه :: الله يسلمك يمه مافيني شي بس صداع بسيط واستأذنت بدري من الدوام عن اذنك بطلع غرفتي :: اتغدى اول حبيبي :: لا يمه تسلمي لما اصحى انشالله دحين بروح انام مو قادر :: طيب ياولدي نوم العوافي :: الله يعافيكي … التفتت ام محمد لدارين بعيون مليانه شرار :: وانتي ياخبله ماتعقلي وتبطلي الصوت العالي ده رجيتي البيت بإزعاجك :: دارين وهي تنافخ :: ماما وربي ولدك ده مدلع هذا اولا وثانيا انا ماصرخت ولا شي الا عشانه كان بيسكر الباب في وجهي وانا داخله ومو منتبه عليا :: ادري مابقدر على
لسانك روحي بدلي وارتاحي شويه وتعالي عشان الغداء :: من عنووووووني ماماتي …. وطلعت ركض لغرفتها في الوقت اللي جا اخوها الصغيرمن المدرسه وتسمعه وهو يتدلع على قولتها دلعه الماصخ على امه …
مرت بغرفة محمد اللي من اول مادخل وهو رمى نفسه في السرير مهموم وقلقان قلبه يعوره واول مره يعرف معني هالكلمه …. زعلان على نفسه وعلى حبه اللي دوبه نبت واللي خلاص صار مصيره الضياع وهو ايدينه مكتفه ومو قادر يسوي شي …
حاس بالظلم والقهر هو يحبها لا مو يحبها يعشقها لكن الظاهر ان حبه مكتوب عليه الموت والله يعينه على ماابتلاه … رمى نفسه على سريره وغمض عيونه يهرب من مشاكله للنوم بدون حتى لايفسخ ثوبه …. اعرفكم على محمد 29سنه شخصيه
قريبه جدا لشخصية دارين لكنه اكثر تحملا للمسؤوليه يحب الحياه ويعيش يومه بالطول والعرض عاشق مجنون لكن محكوم على حبه بالاعدام
ملامحه شرقيه بحته لكنه وسيم يتميز بغمازاته
وابتسامته الساحره طويل وعريض يحب الرياضه بشكل كبير ….

ها قد اكتمل الجزء الاول من روايتي البسيطه
اتمنى اشوف ردوردكم و تفاعلكم حتى انزل الجزء الثاني
والى لقائنا القادم اذا اعجبتكم الروايه
في أمان الله
لا ابيح ولا احلل من ينقل روايتي وينسبها لنفسه … اللهم بلغت اللهم فاشهد … وئام العشاق