تورتة حلوووة من مطبخي …نص كريمة و نص شوكولاته إنما جنااان :)

التورتة دي عملتها من مدة قبل الأحداث الأخيرة و مرضيتشي أنزلها الا لما الفترة الصعبة دي تعدي و الحمد لله انهارده بنزلها و انا مطمنة لان اللي جاي أحسن بإذن الله تعالى و لله الحمد 😆 🙂 …..

التورتة .. عملتها نصها بحشوة الكريمة مع الفواكة و النص التاني بحشوة الشوكولاته ..

طبعا بتبقي تغيير ان في نفس التورتة نوعين مختلفين من الحشو و التوبنج و الحمد لله عجبتهم عندي كتييير ..

نبتدي بمقادير الكيكة الاسفنجية نفسها و هي هي مش بغيرها ابدا ….

5 أو 6 بيضات ( على حسب حجم البيضات )

فانيليا

كوب سكر

كوب و ربع دقيق ( و لو شوكولاه نشيل ملعقتين دقيق و نضيف ملعقتين كاكاو خام )

ملعقة كبيرة بيكنج باودر

مقادير الحشو و التوبنج

حشو الكريمة : كريم شانتي ( كريمة خفق )

فواكة كمبوت معلبة أناناس و خوخ

شوكولاته خام

علبة قشطة

علبة شوكولاه مالتيسيرز

قليل من الفورماسيلا شوكولاته و الشوكولاته المبشورة ..

الطريقة

برضو هي هي

نولع الفرن الأول قبل ما نبدأ العمل في الكيكة .

نضرب البيض الأول مع الفانيليا كتير لحد ما يصبح كريمي الشكل و نضيف السكر ثم نواصل الضرب .

نضيف الدقيق براحة مع البيكنج باودر و الكاكاو لو حبينا و نضرب … و بعدين نصب الخليط في صينية
( بس الصينية تكون مفروشة بورق زبدة مدهون زبده من الجهتين كما في الصورة )

نحطها في الفرن …على نار متوسطة لمده تلت ساعة تقريبا لحد ما نشم ريحة الكيكة الحلوة …
( طبعا بعد ما نغرس فيها شوكة أو سكينة و تطلع نضيفة )

و ده شكلها بعد ما خرجت من الفرن …

نسيبها تبرد الأول كويس لازم … و بعدين نحضرها للتقطيع …( على فكرة جربت طريقة الخيط دي منفعتشي معايا ..مفيش غير سكينة كبيرة مبلولة مية سخنة و نقطع بيها )

و أدي الكيكة مقطعة ل 3 ديسكات

نبتدي بأة نحضر الحشو و التوبنج

الكريم شانتي ييضرب بالخلاط لحد ما يديني القوام المطلوب

و الشوكولاه الخام تذاب في حمام ماء مع القشطة و بعض من كريمة الخفق

لحد ما تدوب بالشكل ده مع التقليب طبعا

نمسك الديسك الأول و نسقية بالشربات بتاع الكمبوت أو نعمله شربات مخصوص زي ما تحبوا ( بس بسيييط يا دوب تلميس كده )

نقسم الديسك جزء نفرشو بالكريمة و جزء بالشوكولاته اللي عملناها

وبعدين نضيف الفواكة الكمبوت المقطعة للجزء المفروش بالكريمة و شوكولاته المالتيسيرز المقطعة للجزء المفروش شوكولاه

و نكرر العملية دي مع الديسك التاني طبعا بنفس الترتيب

و آخر ديسك نفرش طبقة كثيفة من الكريمة في النص الخاص بحشوة الكريمة و طبقة كثيفة من الشوكولاه في الجزء الخاص بالشوكولاه ( طبعا مش حتكون مفروشة تمام على الوش مش مشكلة … التوبنج بيغطي كويس بعد كده )

بعد كده نبدأ التزيين و هنا زينت الوجة الخاص بالكريمة و قطع الفواكة الكمبوت على الوجة و الجوانب كمان و الجزء التاني بشكولاته مبشورة و فوماسيلا شوكولاته على الجوانب مع قطع مالتيسيرز على الوجة ..

و أدي كذا صورة ليها من الناحيتين …

يا رب تعجبكم حبيباتي الغاليات ……