عالم البنات النسائي كل ما يخص المرأة العربية من ازياء وجمال والحياة الزوجية والمطبخ
مرحبا خواتي الفراشات!!
يتني فكرة يديدة! :de43r
كل وحدة فينا تقول شو الألعاب اللي كانت تلعبها مع اخوانها أو عيال خوالها أو عيال عمومتها أو عيال الجيران في أيام الطفولة.. :fhgfdhagi
بهالطريقة نسترجع ذكريات طفولتنا الحلوة و نتعرف على الألعاب المختلفة من بلد لآخر…
:de11
أنا متأكدة بتعجبكم اللعبة لكن لااازم الكل يشارك و يتفاعل….
أنا ببدأ أول…بسم الله..
يوم كنا أطفال كنت العب ويا اخواني “كوك” و أعتقد بنات الامارات اكيد يعرفونها..لازم في اللعبة الكل ينخش أو يتخبى في مكان و يتم شخص واحد يعد لين رقم معين و يوم يخلص يقول “كوك” عشان يروح يدورهم…
كنا نلعب بعد “شرطة حرامي” و هذي يمكن الكل يعرفها…مجموعة يكونون شرطة و مجموعة حرامية و الشرطة يلحقون الحرامية و يمسكونهم..
و كنا بعد نلعب “حار بارد”..في هذي اللعبة لازم شخص يخبي شي في مكان و الباقيين لازم يلقونه..اللي خبا الشي لازم يقول حار أو دافي اذا كانو مقربين على الشي و يقول بارد أو مثلج اذا كانو بعيدين من الشي..و بعدين يجي الدور على اللي يلقاه..
كن نلعب بعد لعبة اسمها “شمس قمر”..هذي لازم تكون على الدري (الدرج)..أول درجة فوق نسميها”حدائق” و اللي بعدها “شمس” و “قمر” و “نجوم” و “كواكب” و جنة” و “نار”…لازم الكل يكون فوق في بداية اللعبة و شخص واحد يكون تحت يقول أسامي الدرجات يعني يختار مثلا ً كواكب و بعدين قمر و لين ما يوصل آخر درجة..و أي شخص يلمس أي درجة ثانية غير اللي سماها يطلع برع اللعبة..الباقيين في اللعبة و يوصلون لآخر درجة لازم يركضون لين مكان محدد من قبل و يرجعون بدون ما يمسكهم الشخص الموجود تحت..و اللي ما ينمسك يفوز…
كنا نلعب بعد لعبة اسمها “تشوكليت”..هذي يمكن تعرفونها..لازم يكون شخص واحد في مكان بعيد عن الباقيين…
لازم يعطيهم ظهره و يعد كل شوي لين عدد معين في باله..لما يعد..لازم الباقيين يتقدمون شوي شوي و لازم ما يشوفهم..لما يوقف من العد لازم يصد وراه و يشوف اذا حد كان يتحرك يطلع برع اللعبة..و يكملون جذي لين ما يوصلون الباقيين قريب عند اللي يعد..لازم يلمسونه و يقولون “تشوكليت” و يركضون و يلحقهم لين ما يوصلون المكان اللي كانو فيه في البداية..اذا مسكهم قبل يخسرون..
يلا الحين دوركم…حاولو تتذكرون أي لعبة لو بس لعبة وحدة..أبا تفاعلكم وياي..
انا بنتظار مشاركاتكم!! :frahtgydd
