أنا وأخوي وزوجته..هع

فراشاتي الجميلات.. 😈 😛

اليوم ودي أستشيركم بموضوع من فترة وهو يقرقع بقلبي…هع..

بقولكم السالفة من أولها لتاليها عشان تقدرون تتفهمون وتحكمون وتشيرون علي زين..

السالفة هي ان لي اخ اكبر مني مباشرة… يعني هو أكبر واحد ببيبتنا.. المهم أخوي هذا يدرس بالخارج عسى الله يوفقه ويسهل عليه..

طبعاً بحكم سفره للخارج قررنا نزوجه… وأمي قالت: يـــــالـــــــــــــورا.. ترانا بنزوج أخوك.. ساعدينا نشوف له عروس..

بصراحة أنا أنسانة أنطوائية.. مب راعية خرجات وهرجات وعلاقات… ولا لي معارف واجد..

لكن والله يشهد ان من ساعة ماكلمتني أمي وأنا متشققة من الوناسة..وأخيراً بيصير ببيتنا عرس مثل الناس..هع

المهم.. قمت أرز الوجه لزميلاتي بالجامعة وأسألهم إذا حولهم بنت بالمواصفات اللي اخوي طالبها.. وتكون طيبة وبنت ناس وتخاف الله<<<< وعاد هذه تهمني واجد.. بصراحة اخوي هذا أناني حيل.. ومستهتر حيل ولا راعي مسؤولية عشان كذا بغينا له واحدة بنت ناس وتخاف الله عشان تركده وتعقله وتميل قلبه لنا..هع..

المهم.. بعد جهود ومساعي ورزة هالوجه للي تسوى ويللي ماتسوى هع.. قدر الله وسخرني للتوفيق بين هالراسين.. وتجهزنا وتكشخنا وفرحنا واستانسنا.. وتم الزواج على خير بفضل الله..

كان زواجهم ببداية هالسنة الهجرة… وبعد الزواج جلسوا هنا بالسعودية حول الثلاث او اربع اسابيع.. الاسبوع الاول قضوه بفندق.. وتالي جو عندنا البيت هنا وقضوا باقي الاسابيع الى ان سافروا..

يوم انهم معنا بالبيت عطيناهم غرفة بالاسفل يجلسون بها.. و من بداية الزواج لاحظنا كيف انه كان مسلم نفسه لها تمااماً.. مع انها بزر صغيرة.. والله انها بعمر آخر العنقودببيبتنا ويمكن اصغر شوي.. ومع ذلك هو مسلم نفسه لها بشكل استفزازي..يعني كانت تمر ايام وليالي ولانشوفهم بتاتاً والله العظيم.. مع انهم معنا بالبيت… لاياكلون معنا.. ولا نشوفهم.. ماغير كل النهار نايمين.. واذا صحوا بالليل لبسوا وقامت تخليه يوديها تزاور اهلها وقرايبها… وحنا يللي معهم بالبيت مانشوفهم.. ولا تطلع تسلم على الوالده والوالد.. وهو ولا همه شئ غير رضااها..

بصراحة بالمررررة تصرفات مالها داعي.. مدري كيف بنتحمل تالي.. خصوصاً انهم اذا انتهوا من الدراسة وعودوا للوطن راح يسكنون معنا بنفس البيت!!

هالحين المشكلة اللي تقرقع بقلبي هي.. انهم من يوم سافروا.. لليوم.. يعني لهم حول 7 او 8 شهور.. والله العظيم ولا اتصال واحد منهم ماجاني!!

يعني بالاول كانوا قاطعين الكل.. بعدين حنا شكينا لخالي وخالي كلمه.. وصار يدق على امي من مدة لمدة..

بس أنا شخصياً.. ولا اتصال.. والله ولا كني موجودة بهالحياة.. ولايسأل عن اخباري.. ولا تهمه علومي.. لا هو ولا زوجته!!

والله انها حاازة بنفسي.. حتى قمت أفتشل من الناس يوم انهم يسألوني عنهم..مدري وش اقول لهم؟؟ اقول لهم مدري عن اخبارهم؟؟ اقول لهم خلاص تزوجوا وقاطعوننا؟؟؟ وش اقول بالضبط؟؟

اللي قاهرني.. انه هو بالاول قبل يخطب.. كان اذا انه اتصل يكلم الكل ويسأل عن الكل.. وكنا نتحادث معه بالمسن.. وبالكام…الخ..

ويوم انه خطب.. كان يدق عليً انا تحديداً بكثره… لان العروس من طرفي..

يوم يطلب رقمها.. ويوم يقول كلمي اختها .. ويوم…الخ الخ..

هالحين.. من تزوج خلاااص؟؟؟ نسى كل شئ؟؟ ماعاد تذكرني؟؟؟

ماعدت اهمه؟؟ والله قمت اشك انه فاكر ان له اخت اسمها لـــــــــــورا..

حتى يوم يكلم امي مايسألها عني وعن اخباري..

هالسنة انا تخرجت من الجامعة… وهو ولا اتصل ولا بارك ولا هناني لا هو ولا زوجته الموقرة..أساساً.. ماأظن انه درى بتخرجي!!!!

المهم… هالحين اللي ودي شوركم فيه.. ودي اعرف كيف تنصحوني اعاملهم واتصرف معهم؟؟

واذا جوو عندنا للبيت كيف ممكن اتصرف معهم عشان احسسهم بغلطهم..واني زعلانة منهم بدون لا اخسررهم؟؟

انا ماودي أخسرهم.. وبنفس الوقت ماودي اخذ موقف سلبي يخليهم يتمادون بتصرفاتهم السخيفة…

والله اني فكرت وفكرت لين تعبت.. ولا لقيت لي حل مناسب.. فقلت خل اشاور الفراشات وهم مابيقصرون باذن الله.….هع هع هع،،