أموت من الشوق ولا من تأنيب الضمير .. أحب واحد متزوج :(

شلونكم خواتي .. مبارك عليكم الشهر

انا من زمان اقرأ بس بعمري ماتوقعت اني أكتب مشكلتي واحد يقراها

انا اختككم ومحتاجتكم حيييييييييل

الله يعلم بحالي والله يا اخواتي اني من داخل دماااار احس قلبي ذايب من الحزن وروحي تتفتت من الهم

بقولكم سالفتي وبحاول اختصر

انا عمري 25 سنه الله ماكتب اتزوج يعني ماجا النصيب مع اني والله العظيم مزيونه وطيبه وروحي حلوة لله الحمد بس هذا شي بيد الله .. والحمدلله على كل شي ربي يكتبه

مرة وانا قاعدة اقرأ بالنت جتني رساله من واحد المهم هو يكتب وانا ارد بالاخير صرت اكلمه ماسنجر

ليت الايام والشهور ترجع والله ماكلمه ولا ارد على رسايله

هو من اول يوم كلمته فيه والله انه كان مثالي

يعني تعرفون كل وحدة فينا كان لها حلم بمراهقتها عن فارس الاحلام

انا حسيت انه نموذج والله كل مافيه عجبني

اسلوبه صدقه صراحته حنانه .. حسيت انه مميز

والله انه صج كان مميز

كان يقولي عيوبه ويتكلم عن نفسه وانا كل مافيني منجذب له

ومن اول يوم قالي اني عاجبته بصدقي واني مامدح نفسي مثل كثير من البنات

المهم هو قالي انه متزوج وانه ابو لبنيتن ……. ماكذب عليكم حسيت سهم الغيرة انغرس بقلبي

وحسيت اني تضايقت مدري شكو ……. يعني الي يسمع بتزوجه انا الحين

بس والله يا خواتي مادري ليش حسيت كأن أحد اخذ مني شي لي :(:(

المهم انا مابعدت عنه قلت يالله على الاقل انسان يحس فيج وانتي وحيده ومهمومه جذي

وقعد الشيطان يسهل الموضوع بعيني ويحليه

وانا والله من اول يوم كلمته مادري شلون يعني حسيت اني اعرفه عدل

كنت اقول بنفسي مستحيل تتطور العلاقه اكيد لانه هو متزوج حتى لو انا ابي هو مايرضى

اثاري الولد طلع يقول لنفسه مثل هالكلام

ادري اني غلطــــــــــــــــــــانه والله من غير لا احد يقولي بس شسوي

انا غلطت ومحتاجة احد يساعدني

بيوم طلب تلفوني ومن غير شعور عطيته قام يراسلني وبعدين كلمني

وانا احس بضياااااااااااااااااااااااع

حبيته والله ياناس حبيته .. كل يوم اقول خلاص هو اكيد ماراح يدق وبينساني وينتهي كل شي

لقيته يوم ورى يوم يتعلق فيني اكثر

ويشوف فيني الي كان يتمنى يشوفه بزوجته بنت عمه

كنت اقوله شكثر انا متضايقه وخايفة اني قاعدة اخون ربي واهلي واثر بحياة انسانه مالها ذنب

واني مابي احطم حياته لان وجودي بحياته غلط

كان يقولي انه مايبي يسمع هالكلام وانه مايتخيل شلون ابعد عنه وانه شنو فايده تلفونه اذا انا ماكلمه

ولما واجهته لو درت زوجتك

سكت

وقال مراح تدري

فهمته منيه مناك انه ماكو شي يظل سر لابد قال انها ماتقرب صوب ديوانيته الي فيها لاب توبه والي يقعد طول الليل يكلمني فيها

سألته سؤال صريح

شكثر تحب عيال عمك ؟ قال اكثر من روحي مثل اخواني تربيت معاهم

قلت تظن لما تزعل اختهم وتخونها بيظلون يحبونك

سكت

قلت له تظن انا استاهل تفقد اهلك عشاني ؟؟

مهما كنت تحبني انا بنت غريبه عنك .. فقالي انه يحبني ومتعلق فيني مثل ما انا احبه

انا والله يا خواتي حسيت النار بصدري

يوم ورى يوم احبه اكثر واتعلق بكلامه واسلوبه وطيبته

وهو كان فاهمني لما انا اتكلم هو يسكت ويقولي كل كلامج صج بس شسوي انا لو ادري ان كل هذا بيصير ماحبيتج ولا عرفتج بس الحب مو بيدي

سافرت فترة وسكرت تلفوني

ماقدرت اتحمل والله اني مثل الي كان قاعد على نار ماقدرت اتحمل ورجعت مرة ثانيه وكلمته وخلاني اوعده مابعد عنه لو اكلمه بالاسبوع مرة

وافقت .. بس بعدين ماقدرت اتحمل تأنيب الضمير

دزيت له ايميل وقلت له انت لازم تساعدني ترى هذي حياتك الي راح تتحطم وانا ماقدر اخذ شي مو لي وانا ندمانه لاني غلطت بحق زوجته واتمنى الله يسامحني

كلمني لاخر مرة ومكالمته قطعت قلبي ماقالي لا تبعدين بس صوته يااااااه يا صوته حسيت ان هموم الدنيا فيه ولما سألته قال انه مريض سكت وانا مابيدي شي اسويه

ادري اني حبيت اهتمامه فيني وهو لقى فيني شي فاقده

انا قلت له ان شهر رمضان فرصه نتوب عن ذنوبنا بس خايفة يا بنات خايفة اضعف

والله ماتتصورون شكثر احبه واشتاق له

انا كاسره خاطري زوجته وكاسر خاطري هو لانه بين نارين

حسبي الله على الشيطان

تكفون لحد يلومني زيادة انا الي فيني كافيني

اذا على حبه انا حبه راح يظل بقلبي طول عمري

بس الله مايحاسبني على الي في قلبي

انا مابي اضر احد

هالرجال مو من حقي اكلمه حرام علي شنو ذنب زوجته

انا قبل اعرفه كنت اكثر انسانه بالدنيا تكره الي تتدخل بحياة رجال متزوج لان ابوي متزوج ثنتين وهالشي حيل اثر على نفسيتي من وانا جاهل وطول ما كلمه وصورة بناته ماتفارقني

الله يخليكم ساعدوني انا محتارة الشوق ذبحني وادري انه ناطر مني اتصال او مسج وهو حاس فيني يحاول يساعدني بس مو قادر

ياربي والله انا تعبت من هالدوامه

استاهل الموت ادري ان المتزوجات راح يكرهوني لانهم مايتخيلون وحدة تدخل بحياتهم وتكلم زوجهم بس والله يا بنات انا غلطت وندمانه وربي ندمانه انا تركته وانا واثقة ومتاكدة انه يحبني عشان بس ماستمر بالغلط

خايفة ينتصر علي الشوق واضعف