عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
يا بنات مشكلتي مشكلة عويصة ما عندي أحد أشكي عليه غير الله ثم أنتم
أنا متزوجة من 25 سنة من عمري 16 سنة
بناتي كبرو وعيالي أصغرهم أبو 5 سنوات
ولو شفتو شكلي كأني أم 25 سنة ولله الحمد بسم الله علي
مهتمه بشكلي وبوزني وببشرتي وبشعري وبلبسي من فضل الله وأخاف الله وأرجيه
مخلصة الجامعة قسم شريعة ومتخرجة وقاعدة في البيت لزوجي وعيالي
بس بعد ما حملت بولدي الأخير اللي هالحين عمرة 5 سنوات
بدأت مشكلتي مع زوجي لأنه ما وده إني أحمل سبحان الله اللي كتب لي ها الحمل مع إني كنت ماخذه حذري بس المكتوب ما أطول عليكم ..
بدأ زوجي يتضايق مني وبديت أكره ريحته لأنه يدخن بس ما يعلمني بس أنا كاشفته
مع الأيام يسهر ويجي يقومني ويطفشني لين أقوم وبعدها النوم ما يجيني بسهوله يجيني أرق وأقعد لين الصبح ما نمت وإذا خلاص جاني النوم بدت سا عته ترن على
رأسي وأقوم من جديد وتبدأ مأساة الأرق ….
المهم أستمرينا على ها الحال لين طفشت خلاص ما عاد أتحمل وهو ما فكر فيني ولا همه !!
قررت أعقد صلح معه قلت له وش رأيك نجيب سريرين منفصلة وكل واحد ينوم بالحاله عشان ما أحد يضايق أحد في النوم لأنه كل ما تحرك يخبط بطني وهو نيم وأنا أقوم من الألم أخاف على نفسي وإلي في بطني .. قام هو زعل وسوى لي مشكلة وش كبرها وتزاعلنا لمدة شهر وهو ينام في غرفة ثانية ..
بس والله إني أرتحت جسميافي النوم لكن نفسيا ما ودي إنه زعل علي
مرت الأيام وتراضينا ورجعنا لبعض ..
ولدت بعدها وجاني البيبي .. والحمد لله .. ورجعت حليمة لعادتها القديمة
سهر وإزعاج وقرقعة عاد صرنا إثنين اللي يتأثرون أنا والبيبي ..
ولا همه ولا مفكر فينا نقوم حنا وهو ينام ما يحس لو قنبله تجيه ما درى …
المهم راودتني فكرة إنه كل واحد يصير له غرفة بالحاله وقلت بتشجع وأقوله بالفعل قلت له وقلت الأسباب وهو ما صدق جت مني وعلى طول أثث غرفة له ونقل فيها
طبعاً الأيام الأولى أو بالأصح الأشهر الأولى كان يجي ويقيل في غرفتي ويسولف
وينام .. لكن بعد سنة بدأ الحال يتغير على شوي شوي لين صرت ما أشوفه إلا إذا أصبحناوبعض الأحيان ما أشوفه لين يرجع من الدوام ..
تطورت الحالة بعد 3 سنوات ما عاد يجي للغرفة إلا إذا بغا ذاك الشيء
وبدون مقدمات .. نص ساعة وهو طالع وأنا صرت بس أفكر وش أسوي
وإذا عاتبته قال أنتي اللي تبغين كذا وإنتي اللي وصلتيني لذا الحال
ومرت الأيام لي ها اليوم اللي أكتب لكم فيه معاناتي بعد خمس سنين ونص
وحنا على ها الحال لكن الأمور تطورت أكثر صرنا ما ننام مع بعض إلا كل إسبوع إسبوعين ما يدخل غرفتي
بس قاعد في غرفته وإلا طالع وإذا جاء ما يفكر حتى يطل علي ويدري إني ما أنام
لين أصلي الفجر ويروحون عيالي للمدرسة ..
حاسة إنه مراهق في الخمسين لأن عمرة هالحين 48سنة بالضبط
وصار يمدح الحريم عندي ويسأل وش رأيك في ها المذيعة زينه وإلا لا ما صار يراعي شعوري مثل أول ..
ما أدري وش أسوي ذبحني بحركاته وبصدة عني …
تكفون قولو ا لي وش أسوي معه طفشت من العيشة معه …
دلوني الله لا يخليني منكم يا خواتي في الله وجزى كل من ترشدني الفردوس الأعلى يارب
