عالم البنات النسائي كل ما يخص المرأة العربية من ازياء وجمال والحياة الزوجية والمطبخ
.
.
.
السلام عليكم ورحمة الله وبركاته
كيفكم فراشات؟
..
..
بنات بالبداية بأعطيكم نبذة عن شخصيتي
انا انسانة طيبة مرة واشيل هم غيري احب اساعد اللي حولي و مساااااااااااااالمة مااحب المشاكل
ونقل الكلام او نقد الشخص اللي قدامي مااحب اجرح احد ولوجرحت احد او بس حسيت اني جرحته لو من دون اقصد اعتذر له كلامي مو كثير ولا قليل الحمدلله احسب للكلمة الف حساب قبل اقولها طبعا هذا مو شرط مع الناس المقربين لاني اتصرف معاهم بكل تلقائية
الا في حال اني انجرحت وزعلت او عصبت تضيــــــــــع كل علومي مااعرف ارد
ويبين علي اني زعلت وارد رد يسكت اللي نقدني بس مااحس اني ارد اعتباري
وكل شوي يقعدون يقولون زعولة زعولة ماتتركين طبعك ومن هالكلام !!!
مع العلم اني صبورة وبالي وسيع واتغاضى عن اشياء بس بحدووووووود
بنات انا مشكلتي مو كبيرة الحمد لله بس تعبت من الكتمان قلت مالي الا بنات الفراشة
ان شاء الله يفهموني ويحسون باللي اعاني منه
مشكلتي مع اهل زوجي (حمولتي) انا ماانكر انهم ناس طيبين ويحبونني ومايغلطون علي ويساعدوني
وانا والله احبهم مرة ودايم اساعدهم باللي اقدر عليه ولاقد شافوا مني الا كل خير ولا عمري غلطت على احد فيهم
المهم مشكلتي انهم ماخذين عني فكرة اني مااعرف اطبخ وماني نظيفة
واغلب المرات ام زوجي تنقد طبخي وكبساتي يا اما الملح ناقص هي تشوفه كذا لانها تحب الملح يكون طعمه طالع شوي او ان الفلفل كثير او انه سامج وماله طعم بس انا اطبخ لنفسي ولزوجي ماهمني رأيها هو ميت على طبخي ويشتاق له حتى مضغوطي يقول لي نفس مضغوط ريدان
واسوي المندي واسوي كبسات كثيرة ولي بهاراتي الخاصة لكن هم مايحبون البهارات ولا يحبون الملح الوسط ماطبختي نفس طبخهم او انك ماتعرفين تطبخين !!!
تخيلوا ياناس لــ درجة حتى القهوة والشاي ماتعجبهم الا اللي يسوونها صرت ما اكلف على روحي واروح بيدي فاضية او معي صينية حلى
ترى مو بس انا كذا حتى سلفاتي مايعجبهم لاقهوتهم ولاالشاهي اللي يسوونه
صح انهم يطلبون طريقة معجناتي ويمدحون طراوتها واشكالها وطعمها والحلى يمدحونه
لكن ماادري وش المشكلة يمكن بعض المواقف هي اللي خلت هالفكرة عندهم لاني مرة سويت بيتزا واخذتها معي لهم وماطلعوها الا مع العشى وشكلها ماتغطت زين فصارت جافة وباردة مالها طعم بصراحة
ومرة سويت كيكة واخذت عند سلفتي والله انها تحمرت ودخلت العود وطلعته كل شئ اوكي بس مشكلة فرني ناره حامية بزيادة والكيك يبغاله نار هادية فلما قطعوها طلعت ماستوت من الوسط
واااااااااااي يالفشلة تعالوا دوروني وقتها واخت زوجي الله يهديها لما قعدنا نتقهوى قالت الكيكة مااستوت من الوسط يعني اللي مادرى صار يدري
مع اني قبل اتزوج كانوا جماعتنا يسمونني طباخة البيت ماشاء الله
والنظافة يابنات انا حملت بعد شهر من زواجي وتوحمت وحم كرهني بالدنيا وكل شئ فيها
اتذكر مرة برمضان ماقدرت اغسل المواعين وتعرفون انتم الفطور كيف مواعينه وتراكمت مواعين يومين
وانا والله مااقدر اوقف لاني على طول ادوخ واستفراغ واحس مافيني قوة لاو المطبخ مافيه مكيف ذيك الايام
المهم اخت زوجي جت دخلت بيتي وانا مو موجودة تبغى غرض من المطبخ ومن بعدها احس النظرة تغيرت
وهي يمكن مرتين بس اللي قد صارت معي
وكنت انا وزوجي نسهر للصباح ومااصحى الا قبل المغرب احس اني كنت خبلة وكنت استحي انام واخليه فأضطر اني اسهر معه لحد ماينام وننام مع بعض وهم كانوا يدرون ويعلقون علينا ويطالعونني بنظرات ماادري كيف اوصفها بس وقتها اكره نفسي واقرف من كل شئ
بس بعدها الحمدلله تعدلت وصرت سنعـــــــه
حتى امي درت مدري كيف وصلها الكلام وعماتي وهاوشتني وقالت ضحكتي عليك الحريم ومدري وشو
نفسي اعرف من اللي كبرت الموضوع وقالت الكلام لكن الله يسامحها وبس وامي من حقها تنقهر لاني من اولى متوسط وانا اطبخ واعرف انظف واوسوي كل شئ الله يجزاها كل خير علمتني وربتني
ومرة جتني وانا كنت حاطه الغسيل بالحمام وباقي ماخلصته ومرة وانا مابعد نظفت الفرن والغلط منها تجي بأوقات اكون لسى ماخلصت شغل بيتي فــ ايش تتوقعون تكون النظرة؟
خاصة البنت هذي تصير لي معها مواقف تفشل مدري وش هالحظ !!
اتذكر مرة تونا واصلين من سفر وتعبانين وخليت الشناط بالصالة وبعد ماصحيت قعدت شوي دقت الجرس وفتحت لها ورحبت فيها وشافت الشناط بالصالة
بنات انا مابأمدح نفسي لكن والله انا مو نظيفة ومرتبة بس لا انا مهتمة حد الجنوووووون
اول ماينكب شئ على طول امسح وتلقيني منشفتي جاهزه لاي طارئ بيتي مكنس مرتب ويلمععععع ومبخر حتى الشبابيك انظفها واهتم بأدق التفاصيل
ملابس زوجي اكويها بالبيت ولي طريقتي في تعطيرها وتسفيطها
لكن مدري وش هالحظ؟!!!!!!!!
مدري كيف اغير نظرتهم لي ونظرة الناس اللي وصلهم الكلام اكيد انها قالت لامها عن اللي شافته عندي
حتى لما يجون يسولفون عن الطبخ او التنظيف وجيت بأقول لهم طريقتي مايعطوني ذاك الاهتمام
مع العلم كل المواقف اللي راحت اول زواجي والحين لي سنتين من تزوجت
حتى لبسي البس شئ تقول لي ام زوجي دولابك مليان ملابس حلوة مالقيتي الا هذي !!
وانا الحمدلله بشهادة الجميع ذوق وكشخة لكن هل النقد هذا لمجرد النقد وبس
لازم تنتقد يعني !!
ومااظلمها والله اوقات تمدح بعض الطبخات وتمدح اهتمامي ببنتي و تمدح لبسي ومن تشوفني ما شاء الله وش هالشياكة والكشخة وذوق ومن هالكلام
يمكن اكون انا حساسة ؟!! :0148:
او ان فعلا نقدهم لاذع !!
طبعا ماارد على النقد واسكت وارد بإبتسامة
اتضايق يومين بعدين اطنش بس مع كل مرة تنتقدني ارجع اتضايق واتذكر كل شئ قديم :ب1:
وغير كذا اختهم الصغيرة تجيني دائما وتعرفون الوحدة تبغى تاخذ راحتها ببيتها ولبسها اضطر اني اغير ملابسي عشانها ومرة برمضان قعدت عندي للساعة 4 وعليها وتسحرت عندنا !!:0144:
تعبت والله وانا اكتم مااحب اقول لزوجي اي شئ بيني وبينهم وبنظره علاقتي بأهله علاقة مثالية جدا
ووالله مو هين علي اني انزل موضوع عن الشئ هذا واكشف المستور ماابغى ازعله لان علاقتي به شئ وعلاقتي باهله شئ ثاني وماابغى اي خلاف بيني وبينهم يأثر على بيتي وعلاقتي بزوجي
وفيه اشياء كثيرة تنتقدها بس هذا اللي مضايقني اكثر شئ
بنات بصراحة انا غلطانة بشئ؟!!
والا اسلوب ام زوجي غلط وايش تنصحوني كيف اتعامل مع النقد
اطنش او ارد برد مااغلط عليها بس ياخذ لي حقي
وفي النهاية انا موانسانة كاملة ولي عيوب مثل اي انسان
وانا بكلامي مااقصد اني امدح نفسي لا بس عشان تقدرون تحكمون على الموضوع
وهذا عيبهم والا هم مرة حبوبين ومايتدخلون بخصوصياتي ويحبونني الحمدلله
ادري اني كثرت كلام بس احسن خلني افضفض ههههه
اذا كان موضوعي يعتبر غيبة اسأل الله المغفرة
انتظركم بنوتاااااااااااات
:ق055:
