سلفتي…شــر ماله حدووود

ضاقت بي الدنيآ بما رحبت في زمن قل فيه الخير والأصحاب

واحتار فكري لمن أفضي بمكنون قلبي الذي يكاد يمزقني فَ إنتهى بي الحال في احضان اخواتي في الله ❗

اولا حبيباتي سهل جدا علينا انتقاد من تكتب مشكلتها في منتدى حتى ولو كان تحت اسم مستعار

ونبدأ بتوبيخها ان لم يكن بالرد امامها يكون الإنتقاد بداخلنا ولكن صدقوني والله انه لإحساس لا يوصف

قهر,ظلم,ويأس فظيع…عندما تقفل كل الأبواب في وجهنا لانعلم الى اين نسير الى الصواب ام الخطأ

ولكن من فضل رب العباد علينا ان خلق من منا يحمل الحكمه وحسن الإقناع وخلق لديه القدره لِ يزيح هموما كالجبال عن اخوانه ضعيفي الحيله

أعتذر على هذه المقدمه الطويله ولكن لإحساسي بالخجل لطرحي لمشكلتي التي والله ارهقتني

........

يابنات الله ابتلاني بسلفه يااارب لاتبلا مسلمه بمثلها آمين آمين 😥

من تزوجت وانا اعاني منها والله ما اذوق طعم الراحه تلحقني بمشاكلها لو اني على سطح القمر

اولا غيرتها فظيعه بشكل يشبه المرض وهالشي سبب لي تعب وضيق ومشاكل مع زوجي

عينها حاره والله يابنات ماتحط عينها على شي الا وقضت عليه

أشتري شي راحت اشترت مثله جبت شي لبيتي راحت جاب مثله وليت بأدب؟؟؟ لا المشكله تفضح عمرها

تسوي مشاكل مع زوجها وكل شوي فلانه وفلانه<الي هي انا لدرجة ان زوجها صار يدعي علي صبح وليل

وانا والله مالي ذنب وبس اشوفها اسكت ولا اتكلم اخااااف منها صرت اتهرب من الجلسه الي تكون فيها

سوت لي مشاكل مالها اول من آخر تتكلم بظهري بكلام والله مايتحمله صخر حتى بشرفي تكلمت

واني البس واكشخ عشان زوجها يشوفني !!! يارب سترك ورحمتك

سكت لها ولا كأني سامعه شي اساسا ما اقدر اكلمها لو كلمتها صرخت بصراخ انا ماتحمله

شي مو طبيعي يابنات احس خلاص بنجلط قريب 😆 🙄

حتى بعبايتي يابنات تقلدني اشتريت عبايه راحت سوت مشكله مع زوجها لين شرالها مع ان فرق كبير

في عمري وعمرها وجسمي وجسمها شي موطبيعي حتى بالعبايه

وزوجها مسكين مغلوب على امره كل ماشتروا اخوانه شي يجلس يتحسر ويقول الله يعينني على زوجتي لذي الدرجه يالطيف قويه

خلاص انا حاسة بشي فظيع حاسة بضغط المصيبه اننا ساكنين مع بعض كلمت زوجي كثير يبعدني عنها

لان والله المشاكل بدأت تأثر على حياتنا وعينها وحسدها مو مخليه شي

اخر شي قطعتها وانقطعت انا بعد عنها ايش سوت !!

صارت تحرش عمتي ام زوجي علي وتقول فيني كلام وعمتي مصدقتها ياويلهم من ربي

والله يابنات تبلتني بكلام وعمتي ام زوجي تصير اخت ابوها وام زوجها بنفس الوقت والمشكله ان ام زوجي

الي اشوفه انها تصلي وتخاف الله وتصوم بس الي سوته والله مايسويه كافر

صارت ام زوجي ماسكه تلفونها وتسب فيني لين وصلني الكلام كله,يسألونها طيب انتي سمعتي هالكلام منها بإذنك تقول لأ بس فلانه تقول 🙂

حتى اتصلت على زوج سلفتي الي اصغر مني تحرشه علي تقوله انتبه على مرتك منها والي يحرق بالموال هذا كله اني مظلومه والله العظيم

الله المستعان ان كانت كبيرة القوم الي المفروض تنصحنا عن النميمه والقيل والقال تسوي كذا

يابنات انا فاض فيا الكيل وخلاااص للصبر حدود سنين وانا متحمله وساكته والحين مادري شسوي

ابي اتصرف ابي اسكتها بس محد يقدر عليها الا الي خلقها فكرت اكلم زوجها واقوله يابن الحلال زوجتك خليها تمسك لسانها عني ابيها تتركني بحالي بس قلت قبل اسوي اي شي استشيركم

المشكله ان الناس كلها تشتكي منها حتى اخوان زوجي وزوجي معاهم يشتكون منها بس محد يقدر يسوي لها شي !

لاتقولون طنشيها وربي اني مطنشتها ولايمكن اعطيها وجه اصلا