ولآدتي بعملية قيصريه غير متوقعه ,تعالوا اقروا قصتي

السـلآمـ عليكمـ
..
اخبآركـــمـ!.؟ إن شاءالله بصحه وعآفيه
..
بقولكم قصة ولآدتي بعمليه قيصريه اللي ماكنت متوقعتها ابداً بس الحمدلله ع كل حال
لما صارلي بالتاسع يومين واروح لدكتورتي شافت وضعي كله تمام وطمنتيني ان شاءالله ولآدة طبيعيه
ووضع البيبي تمام بالحوض ورحت وانا مبسوووطه وفرحانه وبعد اسبوع يجيني مغص وانا انواع البكى
اقول لأمي ابولد امي تضحك تقول لالا مو هذا دلع وياربيه يخف المغص وهذا اانا كل بعد يومين كيذا
المهم لما كنت بالاسبوع الثالث كنت اتسوق وحنا نمشي نزلت مني مويا دافيه انا وقفت ويسألني زوجي وش فيتس ؟ وماقلت له عن سالفة المويا قلت مغص ورحنا لبيت اهلي المهم ومن بكره كان معي مغص ونروح انا وامي للمستشفى وتكشف علي الدكتورة قالت الرحم مسكر وسوت سونار وضع البيبي تمام المهم قالت الحوض صغير عاد وقتها كان معي التهابات مو راضيه تروح الالتهابات بداخل الرحم قالت ابنادي استشاري يشوووف انا شاكه بشي واذا كان صح راح تولدين عمليه انا بكيت ع طوول قلت لالا رفضت يكشف علي الاستشاري وطلعنا وانا ميته بكى وامي تقول لالا احسها ماتعرف تطمني ومن بكره رحت لمستشفى خاص وقالت الدكتورة نفس الكلام التهابات لو اولد طبيعي يتضرر عيون البيبي طلعنا وانا ابكي ابكي واكلم زوجي واقوله انهبل ويهديني وابوي وامي يهدوني بس ماقدرت ابكي وبعد يومين رجعت للمستشفى معي مغص لما شافوني قالوا تنوووووويم ع طووول انهبلت ورفضت قالوا مافيه واتنوم 4 ايام وانواع المضاد بالوريد والحبوب والأدويه ومره تعبت نفسيتي ابغى اطلع جاء الدكتور اللي بيسويلي العمليه وحدد يوم العمليه جلست ابكي وقال وضعتس مايسمح ولادة طبيعيه وعطيناتس فرص علاج بس الاتهاب لازال موجود كلمت امي وجت وقلت للدكتور بطلع نفسيتي تعبانه رفض قال لا انتي نعطيتس علاج ونتابع تخطيط البيبي ومررررره رافض وامي كلمته ورفض وبكيت عنده تكفى دكتور بطلع نفسيتي تعبانه ابرتاح قبل العمليه وياالله بالموت وافق بس يومين طلعت وانا ضايقه وحالتي حاله كان يوم الاربعاء يوم الجمعه رجعت للمستشفى وانا طفشاااااااااااااااانه ومعصبه مابي ارجع واجلس ع السرير وتجي ممرضه بتحط مغذي بالوريد قلت لا مابي قالت دكتور يقول قلت لا العمليه الاحد ليش الحين تحطينه روحي وتروح وتجي مره ثانيه قالت دكتور قول لازم ابره وتحطها وانا يدي تعبت من الابر مره تعور
واكلم زوجي وانواع البكى تعبوووني ابطلع وهو زعلان ليش تطلعين اسمعي كلامهم خلاص قرروا عمليه المهم من بكره اللي هو يوم السبت جت امي يارب تخليها لنا وتحفظها ورافقت معي وبالليل عجزت انام نامت امي وانا بس افكر وش راح يصير لي بكره المهم يوم الاحد الساعه 10 الصباح جابوا السرير ولبس العمليات وحطولي القصدره مره تعووور ولبست وانا شعوري مدري شلون ساكته وحالتي حاله وانسدح ع السرير وتبوسني امي وتدعيلي وتستودعني ربي واخذوني ودخلنا غرفة العمليات ويسألوني ويحطون بيدي ورجلي سوارة معلومات عني وبعدها دخلوني غرفة العمليات يمممه مرعبه النور قوي واللمبات فوقي كبيرررررررررررره شالوني وحطوني بسرير العمليات الا فجأه يدخل رجال انا انصدمت وعلى طول غطيت وجهي بيديني استحيت وكلمني قال انا دكتور البنج راح احط لتس بنج نصفي عاد انا من قبل ابي نصفي بس خوفوني يقولون خطير واحتمال شلل لاقدر الله المهم قلت لا ابي كامل قال ليش مافيتس مرض ولاشي المهم اقنعني وراح واشوف ممرضات كثار رايحات جايات بلبس العمليات الازرق يخوف الا فجأه ينفتح الباب ويدخلون رجال كثار انا ع طووول نزلت راسي استحيت كاشفه ولبسي قصير للفخذ ومتفتح ويجلسوني ويعقمون ظهري وانا ابكي خايفه ومستحيه وربي ابكي حيا فشيله عاد فيه سعوديين كانوا منزلين روسهم ولايناضروني وتضمني دكتورة وتهديني وطول يعقم ظهري كله بدا بالابره الاولى من تحت العمود الفقري لما دخلت ظهري فزيت وبكيت اقوى وهم لاتتحركين ويمسكوني وانا ابكي ياربي ساعدني لاتناظروووني خخخخخخ وكانت اكثر من ابرتين وكل ابره ابكي واضم الدكتورة اخر ابره مااتذكرها ع طول رجولي بدا البنج فيها احس انشليت وربي ابكي اقولهم انا انشليت رجولي ماحس فيها وعلى طول سدحوني وحطوا الستاره اذكر لونها زيتي ويفردون يديني ويحطون حق الضغط وع صدري حقات القلب وبدوا يفتحون بطني وانا احس كأني بحلم وبديت ابكي وتمسك يدي دكتورة سعوديه فديتها وربي للحين ادعي لها وتهديني وتقول استغفري ماشاءالله الحين بتشوفين البيبي وانا احس فيهم يضغطون بس ماحس بأي الم وبديت الله يكرمكم استفرغ عصارة المعده لأنهم مصوميني يومين لااكل ولا شرب وتعبت من الاستفراغ وكنت اقول ياربي مابي امووت والدكتورة تهديني واحس نبضات قلبي تسرع واحس بحر ويسألوني وش تحسين فيه المهم الا اسمع صياح حبيب ماما طلعوة وربي لحظتها بكيت من الفرحه قالوا بيبي بوووي فديته وربي ضحكت وانا تعبانه موووت ويلبسونه ويجيبونه وابوسه واخذوه وخلصوا العمليه واخدوني غرفة الافاقه وجلست انتفض احس ببرد مو طبيعي جابولي دفايه وبطانيه بس لازلت ارتجف وبعد ساعه اخذوني لغرفتي وتشوفني امي وتضمنه وتحبني وتشوف زيزو وتبكي وتبوسه قالت تأخرتي مت خوف عليتس المهم وقت العمليه نص ساعه بس ماطلعت من العمليات الا بعد 4 سااعات الساعه 2 الظهر وتكلم امي زوجي وابوي وتبشرهم وهي مبسووطه لما جاء وقت الزياره جاء زوجي وسلم علي خاف من شكلي اسووود وعيوني تقلب وربي يغمى علي ثم اصحي من شدة الم بطني قلت يمه الحقيني بمووت بطني وتنادي الممرضه وتعطيني ابره الحمدلله هدتني ونمت وجوا ناس وانا ماادري عنهم واليوم الثالث شالوا اللزقه وعقموا الجرح ومن بكره طلعت للبيت والحمدلله ارتحت ومستانسه مع حبيبي وسمينا انا وزوجي يزيد والله يحفظه من كل مكروة ويطول بعمره ويخليه لنا يارب وهذي قصتي بولادتي والحمدلله ع كل حال …