عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم
اخباركم فراشات
عندي مشكلة يمكن بعضكم يشوفها بسيطة بس والله منكدة علي كثييير وصرت شايلة هم زواج اخويا بدل ما افرح فيه
انا من زمااااان و ودي ان اخوي يتزوج و افرح فيه و اكون اخت العريس و بعدين اصير عمة ان شاء الله
المشكلة انه بنت خالي حاشرة نفسها في الموضوع و تخطط و تسوي كأنه زواج اخوها و لاغية وجودي تماما لدرجة انه حتى البيت بتأثثه على كيفها في البداية امي سمحتلها تأثث غرفة وحدة بس لما شافتها اتحمست و صارت تتدخل في كل شي قالت خلاص بلاشي لانه تخيلو لو العروسة عرفت بعدين مين اللي مأثث بيتها نقولها بنت خال زوجك .. طيب و احنا فين رحنا!!
و بتسوي زفة شوكولاتة في الزواج و زفة عصير(و اصلا احنا حركات زي كذا ما نبغى في الزواج لانها صارت قديمة ) و كمان تلمح انها تسوي حفلة تخرجها مع الزواج يعني نزفها بثوب التخرج مع انه الجامعة سوت لهم حفلة يعني خلاص يكفي
مع انه انا متخرجة معاها و كليتي ما سوت لنا حفلة بس ما فكرت ابدا اني اسوي حفلة تخرجي في زواج اخويا لانها ليلة العروسة و ما ابغى اتدخل فيها..
و امي تقولي انتي اتصرفي معاها انا ما اقدر اكلمها لانه انها توها امها متوفية و هيا حزنانة عليها و ماتبغى تجرح مشاعرها
وطبعا هيا ماتسمع مني ابدا لما اقولها لا ما نبغى كذا
و ماني قادرة اقولها هيا على بلاطة ” لا تتدخلي في زواج اخوي”
و زواج اخوي باقيله شهر و هيا جالسة تخطط لشيء لانها قالتلي في مفاجأة راح اسويها قريب مفاجأه كبيره و حاولت اعرف منها ايش هيا بس مو راضية تتكلم و انا اخاف انها تكون مخططة شي لزواج اخويا زفة من زفاتها اللي تلف و تدور عشان تعملها في الزواج
حتى انه فكرنا نكلم المشرفة انه ما تشغل زفة او اي حاجة الا لما تسأل ام العريس و العروسة اول شي
بس انا ما ابغاها توصل لكذا
اللي ابغاه منكم كيف اوصلها انه احنا ما نبغاها تتدخل في اي حاجة تخص الزواج بدون ما ازعلها
و للمعلومية: بنت خالي معروف عنها انها تحب الوجاهة يعني تحب الناس يقولو فلانة هيا عملت ذا و سوت ذا و يمدحوا فيها وانا عارفة انها بتسوي ذا كله عشان الناس مو لأي شي ثاني وانا اكره حركات الاستعراض و ما ابغاها تصير في زواج اخويا
ساعدوني و اسفة على الإطالة
