دخلت على أمي المطبخ …. وليتني مادخلت

صارتلي سالفة امس المغرب , مدري هي بداية عذابي ولا بداية الفرج

السالفة باختصار , امس كنت مخططة اطلع السوق عشان عندي اغراض ناصقتني
دقت علي امي وقالت لازم نطلع المغرب بدري عشان بنمر على اختك الوالدة اول
اختي توها والدة في المستشفى , قلت طيب

نزلت المغرب قبل الاذان بشوي واسمع صوت امي تشيل وتحط بالمطبخ
قبل ما ادخل المطبخ حسيت بضيقة , وكانت امي مشغلة شريط بالمسجل
دخلت وتكلمت معها كلمتين عن الطلعة وجلست ع الارض وظهري للجدار وانا اتكلم
قالتلي امي اسمعي شريط الرقية الشرعية انا مشغلته , وقامت تسولف
انا ركزت شوي بالشريط يعني شوي مرة ولا يجي ولا خمس دقايق

ويوم قال الشيخ ولايفلح الساحر حيث اتى , قمت اصارخ بقوة بقوة مرة
ورفعت يديني شوي بس كاني بامسك احد واحركهم يمين ويسار حركة متوسطة
واتنفس بسرعة قامت امي تصرخ وتسمي علي وتبيني انتبه واسكت
وانا ابد للحين مستمرة, راحت فتحت الدريشة وصرخت تنادي اخواني
لانهم قاعدين بالملحق وهم ثلاث كلهم اصغر مني وجو يركضون
ويمسكون يدي ويقولون وشفيك انا اشوفهم واسمعهم بس مدري وش فيني
ما ارد ولا اتكلم بس اصرخ واحس كانهم حلم قدامي او ذكريات

قعدت على هالحال سبع دقايق تقريباً واسمع اخوي اكبر واحد يقول لامي
وش فيها قالت ما ادري سمعت الشريط وصار فيها كذا
قام اخوي بقوة سحب الفيش اول ما اسحبه هديت مرررررة وقمت اتنفس الهث بقوة
وحسيت بدوخه وكان ودي انام

هذا اللي صارلي , اول مرة يصيرلي بحياتي , ولاقد صار لاحد من اهلي ابد
حنا ناس قبايل من اعرق القبايل من نجد وبيضان
وانا في بداية موضوعي قلت ما ادري هاللي صار فاتحة خير او بداية عذاب
لاني اعاني من مشاكل كثيرة في حياتي , وكنت ابحث عن السبب
ويمكن هالموقف اللي صار فتح عيوني على السبب
,ومن جهه ثانية ممكن يكون بداية عذابي مع رحلة طويلة بدون شفاء

بنات انا نزلت هالموضوع ابيكم تعلموني وش اللي صار لي بالضبط
وابيكم تنصحوني وش اسوي
علما بان شريط الرقية الشرعية كان للشيخ السدحان بس ما اذكر وش اسمه الاول
وانا قد سمعت الرقية من اللاب توب قبل هالموقف ولاقد صارلي كذا الوضع كان عادي
بس كان الشيخ القارئ للرقية مختلف مهب السدحان
كان واحد ثاني دقيت عليه افسر حلمي عندة وقالي اسمعي الرقية حقتي لان فيك شي

وانا ساكنة بالرياض , انا جميلة جدا ماشاء الله وبيضاء
لكن بالفترة الاخيره بديت اعاني من مشاكل التكسيات في المبايض
والهرمونات واورام حميدة بالثدي , وشعري قام يتساقط بكثرة
وفقدت اغلب شعري الاسود الطويل وبياضي بهت وخف كثير
حتى ان قريباتي اللي كانوا اسمر مني بكثير صاروا الان ابيض مني ماشاء الله
وبشرتي تعبت وخربت باختصار تغير شكلي كثيررررررررر

عمري30 متاخرة بالزواج , انخطب كثير وتوصل لان المهر يصير بيدي ولا يتم الزواج
مقصرة في الناحية الدينية يعني مب مطوعة ولكن عادية
وهذا موضوع ثاني لي فيه قصه غريبة صارت لي قبل فترة بسيطة

http://satfrequencies.com/girls/alfrasha28/thread1448835/

انتظر ردودكم ودعواتكم باسرع وقت
لونت الموضوع عشان يسهل عليكم قرائته

بنات اللي يقولون روحي لشيخ
انا قتلكم سمعت الرقية قبل مافرقت معي
بس يوم سمعت السدحان صار اللي صار
يعني الموضوع يفرق من شيخ لشيخ, يمكن على حسب تدينه وقوه ايمانه
عشان كذا ابيكم تنصحوني بشيخ مجرب