عالم البنات النسائي كل ما يخص المرأة العربية من ازياء وجمال والحياة الزوجية والمطبخ
..
السلام عليكم ورحمة الله
مســآئكم / صبــآحكم .., جــوري
..
آخبااااركم يارب تكونو بخير
..
من كنت صغيره ماكان فيه بنات من عمري بالعايله وان كان فيه اللي هم بنات خالتي اهلهم كانو مشددين عليهم ونادر مااشوفهم او اجتمع معهم.. اخواتي كانو اكبر مني بكثير .. وتدرون الطفوله لزوم
احد تلعبون وتنبسطون معه .. ماكان لي الا عيال خالي { خالي هذا عنده ثمان اولاد بس والبنات اكبرهم انا اكبر منها بخمس سنوات } و عيال عمتي { وبرضوو عمتي نفس الشي بناتها كلهم اكبـــرررر
مني الا وحده وماكنت اشوفها الا قليل لان دايم تروح عند عمانها} .. كان اغلب الايام العيال يكوونو مجتمعين في بيتنا من المغرب الى اخر الليل وليومكم هذا المجلس يكون مفتوح عندنا 24 ساعه وشباب العايله فيه …
وبالنهار اكون عند خالي لان بيتهم جنب بيتنا ووقتي اقضيه مع العيال
.. اما بالخميس والجمعه اكون بالمزرعه مع عمتي تمر علي وتاخذني معها وطبعا هناك التقي مع الشباب ونلعب .. واغلب رحلاتنا وطلعاتنا تكون مع بعض
المهــم .. كبرت وكبرت وكبرت وانا معهم..وصلت لحد ثاني متوسط عيال عمتي خففت يعني صرت اروح عندهم من اسبوعين او ثلاثه ..قالت لي اختي الكبيره .. خلاص كبرتي تغطي ولا تروحين
قلت لها طيب.. بحكم اني مغلوب على امري واختي الكبيره واحبها .. مره اتصل علي ولد خالي اللي اكبر مني بسنتين ( وهذا سبب مشكلتي واللي معقدني الحين ) قال يلا تعالي بنطلع البر .. قلت مابي تركته ونزلت
حديقتنا العب.. شوي الا يدق الباب ويجي ويمسك ايدي ويوديني غصب رحت معهم .. ونسيييييت كلام اختي كله … وكذا كانت طفولتي كلها لحد ماوصلت اول ثانوي وتغطيت.. خلاص عقلت
…
ولد خالي هذا متعلق فيني بالحيل بس انا ماكنت ادري عن هوى داره يعني قرابة 3 سنوات الثانويه تقريبا مااشوفه الا بالمناسبات .. صارت بيني وبينه مواقف دايم تحطني بإحراج
انا على النيه ببالي انها صدفه لكن هو كان يتعمدها ولا كنت اعطيه اهتمام.. اخرها قبل فتره كنت اكلم اخته واسولف معها قلت لها عن اسم كتاب ان كان موجود في مكتبتهم احتاجه بالجامعه قالت مدري بسأل اخوي.. راحت سألت
اخوها قال ماعندنا .. تخيلو يابنات والله راح منطقه تبعد من عندنا حوالي ثلاث ساعات علشان يجيب الكتاب وانا كنت اقدر اجيبه بالساهل من اي دكتوره..المهم انو راح وكان بالمغرب وجابه ورجع
على الساعه وحده بالليل.. قالت لي اخته.. انا عيوني صارت كذا
وبرضوو قلت ولد خالي ويمكن مايبي ابوي يتعب ويروح يدوره لي براا ..الولد هذا دخل العسكريه وتخرج وتعين والحمدلله.. قالت له امه يلا بنخطب لك تبي وحده معينه ولا انا ادور لك قال لها لا في بالي وحده بس مو الحين..بنفس الوقت انا خطبني قريب لي بس من بعيد
الخبر وصل له وش سووووى.. الدنيا قامت عنده .. مسجات على جوالي .. ياسرمديه والله وانا حلفت لك ان اخذتي غيري راح يكون اخر يوم بحياته انا ابيك وانتي عارفه ومدري ايش ..
رديت عليه وقلت (هذي حياتي وانا حره فيها) .. قلت لا مايسويها اكيد بس كلام.. ثاني يوم سمعت من اخوي ان سياره اللي خطبني متكسسسره حدها وداخلها ورقه مكتوب عليها هذي بدايتها
وقتها تأكدت ان هو.. بس مشكله لو تكلمت خالي معه السكر والضغط وبرضو ابوي معه الضغط اخاف اتكلم تصير مشاكل مالها نهايه..بلعتها وسكت ومجبوره رفضت الولد اللي خطبني
على ان ماشاءالله عليه طبيب واخلاق.. بس اقنعت نفسي وقلت قدر ومكتوب..ولد خالي اخذ له قرض من البنك
بـ 150الف ..امه قالت له والعرس قال لا بعدييييييين قالت له طيب خلي لك جزء تملك فيه قال مابي واخذ له مبلغ منه وسافر فيه والباقي لعب فيهم{ يعني حاط بباله اني راح انتظره على كيفه وعلى مزاجه وهو عمره الحين تقريبا 24}. مرت على هالسالفه قرابة اربع شهور …
..
قبل شهرونص..كنت في تمايم في بيت عمتي..البنات كلهم مجتمعين وكذا..رحت مع بنت عمتي المطبخ نجيب القهوه.. الا يجي اخوها ( اللي هو سبب مشكلتي برضو الحين ) دخل شافني وقف
قال من هذي؟ انا على طول طلعت وجلس يتناقش مع اخته ويسألها.. مر اليوم وخلص وانا مافكرت اصلا باللي صار .. قبل اسبوع تقريبا جات لي مكالمه من رقم غريب رديت
.الو .. قال هلا فلانه .. قلت مين معي .. قال انا ولد عمتك … ( ولد عمتي هذا بيني وبينه تسع سنوات ) قلت وش فيكم صاير شي؟ قال لا بس انا ابيك بسالفه .. خير وش فيك..قال سالفه تخصني وتخصك .. وقتها انقبض قلبي
قلت له آمرني وش بغيت؟ ..سكت شوي و قال .. انا احبك وصوته كان مخنوووووق حسيت دموعه تنزل .. انا وش كان موقفي وقته الله يعلم به.. انصدمت – انصعقت – استغربت – خفت .. كل شي ..
واكتفيت بالسكوت.. تكلم هو قال والله كنت فاقد الامل اني اشوفك مره ثانيه والحين بعد هالسنين نلتقي من شفت الشامه اللي بوجهك عرفتك وعرفتك من عيونك فيها نبرة حزن ماعمرها تتركها.. من تركتينا وانتي في بالي حتى صورتي وانا معك وحنا صغار معلقها بغرفتي وكل يوم اناظرها
رحت تبوك قبل خمس سنوات يمكن انساك ودخلت الامن لكن صارت لي ظروف وتهاوشت وطردوني ماقدرت ورجعت .. والحين ناوي بداية الشهر الداخل اروح امريكا عند اختي .. بس يوم شفتك
كل افكاري تلاشت هونت وسحبت..
وانا ساااااكته .. ماكنت متوقعته يذكرني لحد الحين..ولا كنت متوقعه انه يحبني بالاساس قلت له والمطلوب؟
قال انا ابيك لو اخطبك توافقين ؟ مااتوقع انك نسيتي ايام قبل لعبنا وسهرنا وطلعاتنا ولاتفكرين اني ماكنت ابيك ولا كنت اغار عليك من عيال خالك خاصة فلان(ولد خالي المقصود) اللي للحين كل ماشافني ولا كانه شايفني ليه ماادري
.. وكل شي صار يقوله لي من اروح عندهم الى روحات البحر الى ركوب الخيل بالمزرعه وهو يمسكني عن اطيح الى نحشاتنا للبقاله اخر الليل..
برضوو ظليت ساكته.. قال لي انا ماابي اضغط عليك .. بس بقول لك حاجه.. انا اخلص دراسه بداية شهر خمسه واول مااخلص عارفه ان وظيفتي جاهزه تنتظرني
بجي اخطبك واعرفي انك اذا رديتيني راح تموتيني اوكي .. فمان الله يالغاليه
وقفل ………. ومن وقتها وبنات عمتي زياراتهم ودعواتهم لنا عندهم صايره كثيره.. السبب مدري ….
……… حالتي من بعدها حاله مرات ابكي خوف.. ومرات افرح يعني احساسي ماكان على وتيره وحده… فكرت وفكرت قلت خلاص بوافق عليه بس طرى علي ولد خالي..قبل امس
يوم الاثنين قلت لاخته اني انخطبت بس ماعلمتها مين على اساس اعرف وش ردة فعله وعارفه انها راح توصل له الخبر..هو عرف وقال لها: قولي لها الـــف مبروووك هذا اذا تم الزواج .. وانتي عارفه(يكلم اخته)
ان مالها غيري.. انا اقنعتها تسأله ليه يسوي كذا.. جات معه بالسياسه لانه مرره ماياخذ ويعطي الا قليل .. قال بنت عمتي واحبها وابيها ومحد راح ياخذها غيري
واللي يقرب منها عارف مصيره حتى لو بعد مية سنه وبكيفي…!!!!
….
بنات انا والله ماافكر بالزواج الحين ابد ابد.. لكن اذا احد ذول تقدم لي ابوي مااااارااااااااح يرفض وانا اعرفه زين بيقول لي هذا نصيبك وبيجبرني..
الاثنين ولد خالي و ولد عمتي اخلاق وشغلهم تمام وحالتهم فوق الممتازه بس .. والله محتاره وخايفه وقلقانه .. النوم ماعرف انام الا قليل ولا آكل ولا شي
….
ساعدوني بنات وش الحل مع ولد خالي احس انه واقف عقبه بطريقي ومااقدر اكلم احد من العايله عنه لان حتى اهله شخصيته ورايه هو اللي يمشي عليهم..؟
خايفه اخذ ولد خالي وبكذا ادمر ولد عمتي .., وخايفه اخذ ولد عمتي او اي احد غيره و ولد خالي يدمر حياتي 😐
وربي ترددت كثير قبل انزل الموضوع خفت من ردة فعلكم
وياليت بدون ردود جارحه
..
آنتظركم بالغوالي
