عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
اول شي يابنات رجاء خاص الردود للمسانده والوقوف معاي
اللي لسانها طويل توفره ماني بحاجة ردها
واللي ردها يفتح النفس حياها ربي مليون
ابحكي لكم قصتي واحاول اختصر
قبل 6 سنوات وعمري 19 سنه
1-
دخلت عالم النت وبدت دجتي فيه وولاسف الشيطان جرني رغم اني كنت بمنتدى اسلامي
لكن بعفويه تعرفت على واحد وكان مركزه مغري شوي ( اعلامي معروف )
ماكنت اعرف هالسوالف ابد
جيت ارسلت له عالخاص رساله اعتذار لان موضوعه انحذف بسبتي
ورب المصحف ماكنت اقصد شي لكن انحرجت لأن ردي بموضوعه كان فيه ذكر شخصيات معروفه فحذفوه الاداره
واعتذرت لمجرد الاعتذار وكنت متردده قبل ارسل له بس ارسلت له
وبعدها قام يرسل لي ويسئلني وش المواقع اللي احبها وحبه حبه
لين قال انا بترك المنتدى وابي اتواصل معاك برا النت
وعطاني رقمه
انا الشيطان لعب لعبته واخذت الرقم بس مادقيت عليه الا بعدها ب 4 ايام ( يعني تراني مو خفيفه )
وانا الصدق كنت متلهفه للحاجه هذي لانها جديده علي وحسيت اني راح ابدأ حياة مليانه رومنسيه وحب
وبعدها كلمته لمدة سنه كامله بس بالبدايه اهتم فيني بعد 3 شهور صار يهملني
انا خلاص تعودت اتكلم واتجراء بالكلام مع الرجال من خلاله
ويوم اهملني صرت ادخل الشاتات واتعرف على الشباب
ما اكذب عليكم كنت العب لعب مو صاحي
(على فكره ما اخذوا مني ولا شي غير الصوت ولله الحمد ربي رحمني )
كنت اكلم واحد اذا عجبني صوته استمريت معاه شوي واذا ماعجبني سحبت عليه بنفس اليوم
واحيان يكونون يبغون بنت تطلع او ترسلهم صور انا مو من هالنوع حدي تلفون وبس
اسحب عليهم
المهم الاول هذاك كل ماله يهملني لين مرت 3 شهور وما اتصل فيني وانا مع كثرة الدشير نسيته
2-
وتعرفت مره على واحد قال يبي يقابلني وقلت له اسفه انا مو من هالنوع
كانت سوالفه حلوه بس ما ابي واحد يبي طلعات وخرابيط
احترم كلامي وتركني
بس اتصل فيني بعد اسبوع وقال ماقدرت اتركك اعجبتيني لانك ثقل مو راعيه طلعات وعجبتيني لانك حريصه عالصلاه ( كان اذا يكلمني والمسجد يصلون اقوله بروح اصلي وبعدين اكلمك ) مدري شلون كنت اجمع بين الشر والخير الله المستعان
المهم انه استمر معاي لمدة سنتين وحسيت اني طحت في حبه
حاول انه يطلع معاي بس مافيه فايده .بس للاسف ارسلت له صورتي الحمد لله مافضحني ولاشي
خطب وكنت مرره ضايقه وهو اهتم فيني زياده على حساب خطيبته .حسيت بقوه مالي داعي داخله بينهم
قلت له خلاص نترك بعض من الحين .كنا متفقين اي واحد يتزوج منا يعني ينتهي اللي بيننا
وبافعل بدينا نخفف علاقتنا
ويوم زواجه قفلت جوالي بس افتحه بين الفتره والثانيه
لين لقيت له كم اتصال قلت اخليه مفتوح .اتصل علي مغرب ليلة زواجه وودعني وقفل
انا طحت بالفراش لمدة اسبوع
3-
بس الشيطان باقي يلعب بمخي
قلت عشان انساه لازم اتعرف على غيره
وبالفعل تعرفت على الثالث
الثالث هذا ليل نهار ادعي عليه الله لا يتمم فرحه وجعل عيونه العمى
راح اقولكم ليش .هو كمان تعرفت عليه من الشات
كان له حبيبه بس تركته .وجاء يتعرف علي وعطيته اللي يبغاه وتعرف علي عالجوال
المهم فيه واحد كان بيخطبني وخبرته اني راح انخطب .هو بغى ينجن وقال ارفضيه وانا بخطبك
انا طرت من الفرحه .يعني شخص اعرفه ويحبني على قولته ويبي يتزوجني
انا ماكنت احبه بس تعرفت عليه طقطقه
بس بعد ماقال انه بيخطبني تعلقت فيه بجنون
يابنات صرت مريضه بحبه .ليل ونهار اتخيل متى يجيني
وكل يوم اسولف معاه عن عرسنا وفستاني والخ
وهو يدور وظيفه غير وظفته ام 2500 عشان يفتح بيت
وخبر اخواته انه بيخطبني ووافقوا ( على كلامه ) وانا كنت اصدقه بكل شي
كنت مثل العمياء وراه .وصلت لدرجة اني اصرف عليه
مايدق علي انا ادق عليه .وادبر له بطايق شحن وبطايق دي اس ال
وارسلت له هديه بالفيديكس .لدرجة انه راح الاردن ويقول انه تعبان من عيونه
وخلى صديقه يتصل علي يقولي الحقي حبيبك مره تعبان وانتي ماتدرين
لازم يسوي عمليه بالعيون وقيمتها بالاردن 6000 ريال
بس باقي للحين 1000 ريال مدري من وين ندبرها .قلت انا بدبرها
وتهاوشت مع اهلي تخيلوا عشانه الله لا يوفقه
ومارضوا اهلي يعطوني ( قلت لهم صاحبتي بتسوي عمليه )
المهم جمعت من مصروفي 700 ريال وحولتها له
بعدها باسبوع يابنات .رحت لملف التعريف حقه بالمسنجر
واشوف سوالف حبيبته الاولى في التعليقات
كلام اثنين ميتين في بعض .جيت سئلته تعرف حبيبتك الاولى قال لا
ورحت ادور من وراه ولقيته بمنتدى هو وياها على علاقه قويه
يتغزل فيها وتتغزل فيه .سئلته وانا مفجوعه قلت له انت تحب فلانه صح؟
قال ايه صح وش بتسوين يعني
واياني وايك تسوين لها زحمه او تاذينها
انا من قوه الصدمه كأن واحد عطاني كف وبغى قلبي يوقف
قلت له طيب وزواجنا؟ وعرسنا
والعريس اللي رديته عشانك واحلامي
والفلوس اللي عطيتك وتهاوشت مع اهلي عشانك
كل هذا نصب؟
قال لا مانصبت عليك
قلت الا نصاب لاعاد اسمع صوتك على كثر ماحبيتك كرهتك
الله لا يسامحك لادنيا ولا اخره
ورميت الجوال من قهري
جلست مصدومه 3 ايام ما اكلم احد
وامي خافت واخواني انتبهوا اني مثل المجنونه
اخوي طلعني برا البيت وسئلني شفيك قمت بكيت عنده وقلت له اخو صديقتي اتفقوا انه يخطبوني له بس اكتشفت انه خطب وخلص
واساني وقام يهديني
4-
وبرضه الشيطان ماخلاني وقال اذا بتنسيه تعرفي على غيره
بعده باسبوع تعرفت على واحد
بس عشان افضفض له عن سالفتي مع اللي قبله ولا انا خلاااص عفت كل الرجال
قال ماعليك وحاول انه ينسيني ويعيشني شي ينسيني به الماضي
وجلست معاه سنه ونص
ماحبيته لاني حرمت سوالف الحب بعد اللي صار لي من الصدمه
بس قلت له احبك من باب خلاص تراني واثقه انك ماتعرف غيري
وهو مشى معاي للاخر بكل حب واخلاص ( وشويه نصب )
شكاك بقووه وسوا لي مشاكل بالنت وبرا النت مع صاحباتي كله بسبة غيرته
وبالاخير زادت مشاكلنا
تدرون متى انتهينا؟
اليوم
ايه اليوم
وانا معزمه اني ما اعرف احد بعدها
تدرون ليش؟
لأني دعيت ربي برمضان انه يبعدني عنه
بس الشوق ذبحني ورجعت له بعد رمضان
والحين هذي اللحظه هي تحقيق لدعوتي برمضان
تصدقون يابنات ماحسيت بألم الفراق
كأن انصب على قلبي مويه بارده يوم قال خلاص انتهينا
هو تركني لأنه شاك اني اعرف غيره وقال: خلاص بتزوج لاني تعبت كنت ابغاك تتزوجيني بس انتي رافضه ( قبيلتي وقبيلته مايواطنون بعض )
انا قلت دامك بتتزوج الله يستر عليك انا ما اتعرف على متزوجين ابد
وقلت له اني بتعرف على غيره ( بس عشان ارفع ضغطه ومايحسبني ميته على فراقه )
وانا والله اني فرحانه ان ربي فكني من هالطريق واستجاب دعوتي
لأني بصراحه يابنات حياتي واقفه
25 سنه حياتي واقفه
محد خطبني وربي مو موفقني لا في وظيفه ولا زواج ولا رضا امي
وحياتي كلها كأبه رغم اني تركت الاغاني واقرا قران بس برضه حياتي ما انعدلت
قلت اكيد انه بسبة علاقتي الحرام معاه
ودعيت برمضان من قلبي ان ربي يبعدني عنه ويبعدني عن الشباب ويسترني بالحلال
وكمان دعيت لبنت خالتي لانها مثلي وسبحان الله هي تركت حبيبها بعد العيد على طول
واليوم هو يوم استجابة ربي لدعوتي
ادعوا لي يابنات ان ربي يثبتني على الطاعه ولا يردني لطريق الحرام
ادعوا لي ان ربي يشغل وقتي مع ناس قلوبهم علي
مثلكم وشرواكم
ادعوا لي وربي اني بحاجه للدعاء ان ربي يثبتني وان ربي يغنيني بالحلال عن الحرام
شاركوني فرحتي ان هالدرب تركته وانا مبتسمه مو حزينه
كلووووووووووووووش 😡
احبكم
😛 😳 😉
