عالم البنات النسائي كل ما يخص المرأة العربية من ازياء وجمال والحياة الزوجية والمطبخ
في هادا الموضوع حاولت بقدر ما استطيع اني احصر كل الأسئلة عن البويات و اسعارها و اماكنها وراح تفيدك أنت وزوجك لأني جمعت عن السيارات وعن المنازل
اتمنى أفيدكم
راح نتكلم في هادا الموضوع عن :
:: أنواع البويات .
:: اسعار البويات .
:: أماكن رش البويات .
:: أسعار رش البويات .
:: كيف تعرف إذا كانت الرشه سليمه و نظيفة .
:: متطلبات السمكرة السليمة .
:: المتطلبات اللازمة لعمل البوية في المنزل .
:: طريقة رشة البوية في المنزل .
نبدأ بسم الله ..
:: أنواع البويات ::
نقسم البويات إلى قسمين رئيسيين و هما :
أولاً / البويات العادية ” أبو 5 ريال ” :
و هي معروفه لدى كثير بهالإسم ” أبو 5 ريال ” و هي في الحقيقه ذات أسعار متفاوته حسب الجوده و النوعية .
فيوجد منها 4 أنواع :
1- النوع المعروف اللي يكون بـ 5 ريال و متوفره له ألوان عديده ساده .
2- نوع من شركة ديوقاتي ميتاليك ما ينباع إلا في المراكز و المكتبات الكبرى زي ” جرير ” و يكون سعره على 25 ريال و له ألوان معينه ” أزرق – موفي – أخضر زيتي – أسود ” .
3- أيضا من شركة ديوقاتي و لكنه مختلف عن اللي قبله بأنه حجمه نصف الحجم العادي و أيضا لمعته كتير و يسمى النوع هادا بالـ ” ميتال فليكس ” أو ترتر و متوفره له ألوان معينة و هي ” أزرق – موفي – أخضر زيتي ” .
4- النوع الأخير و هو أيضا من شركة ديوقاتي و هوأيضا ميتال فليكس و على قولهم ” ترتر ” و يكون سعره أيضا 25 ريال و لكنه بنصف حجم العلبه العادية و له أيضا لونين فقط و هي ” فضي – ذهبي ” و هادي لمن تنرش بس تعطي ترتر لحاله مو زي النوع اللي قبله ترتر مع لون .
و هادا النوع من البويات ” البخاخ ” بسيط جدا جدا من ناحية الرش , ما عليك إلا انك تفكفك المجسم و تبدأ ترش من بعيد و ممكن أنو أي أحد يرشه في بيته عاد ما يبغالها الهرجه ^_^ .
و ما أنصحكم انكم ترشوا بيها داخلية السيارات و خاصة المقاعد لانها بتدبق ” تلصق ” بعد الرشه .
ثانيًا / النوع الثاني :
بويات السيارات الحقيقية , و ما تنباع إلا في محلات بويات السيارت في الصناعية , و لها عدة أنواع :
1- بوية سادة .
2- بوية ميتاليك .
3- بوية لؤلؤي .
4- بوية ميتال فليكس ” ترتر ” .
5- بوية ماجيك .
..: البوية السادة :..
و يجي بدون لمعه زي اللون الأبيض حق التاكسي و باقي التكاسي و زي كدا .
طريقة الرش : توضع مع مجفف و تنر و تخلطهم و تبدأ ترش .
..: البوية الميتاليك :..
أو ما تسمى بالـ ” معدني ” و تجي في أغلب السيارات من بلدها و تكون على شكل حبيبات لمعه صغيره جدا .
طريقة الرش : توضع مع التنر و تخلطهم و تبدأ ترش بس راح يطلع اللون مطفي و راح نوصل لدي النقطه بعدين .
..: البوية اللؤلؤي :..
من أروق الألوان , تقدر تختار أي لونين و تخلطهم مع بعض عند المحل و عند الرش يطلع لونين حلوين زي اللوز , و لكن ما تقدر تزود عن لونين .
طريقة الرش : أول شي تنرش البطانة زي طريقة رش البوية الميتاليك , و بعدين ينرش فوقها اللون اللؤلؤي .
..: البوية الترتر :..
معروفه بلمعانها الشديد , و تباع عند العمودي في جده .
طريقة الرش : بصراحه طريقة رشها صعبه , و ما اعرفلها , و هي أيضا بوية غالية , فيفضل أنو اللي يبغى يرش من دا النوع انه يروح عند مختص يرشله هيا زي مودا كار .
..: البوية الماجيك :..
ما يحتاج شرح معروفه لكل و هي تقلب لأكثر من لونين إلى 8 ألوان , تجي البوية جاهزة من هولندا بالطلبية , و تكون في علبة وحده بعكس اللون اللؤلؤي اللي يكون بعلبتين .
طريقة الرش : تخلط مع التنر و تبدأ ترش , و بصراحه من أغلى البويات , فلو بغيت ترش روح لمختص يرشلك هيا , و مو لأي ورشه عشان لا يعدملك هيا .
:: المتطلبات اللازمة لرش البوية في المنزل ::
1- كمبريسور هواء و هو موجود عند ساكو و سعره 300 – 400 ريال و في أغلى لو تبغى , من الممكن أنك تستفيد منه في غير رش البوية مثلا تنظف سيارة الوالد من جوا تنظف الحوش تنفخ كورالجيران بريال ينفعك و أيضا بامكانك انك تستأجر كمبريسور من محلات مواد البناء , و سعره يوصل 30 ريال لليوم الواحد .
2- لي بالطول اللي تبغاه سعر المتر بـ 5 ريال مانع لتسريب الهوا مجرب و مضمون .
3- مسدس بوية سعره بـ 70 ريال صناعه اسبانية ممتازة مجرب و مضمون بس لازم تحافظ على نظافته بعد كل رشه مثلا ” تفكفك الراس و تنظفه , تنظف الخزان بالتنر , تنظف المجرى ” .
:: طريقة رش البوية في المنزل ::
كما ذكرت لكل بوية طريقة رش خاصة بها , فدحين خليني أوضح لكم بالتفاصيل و الصور إيش لازم نعمل قبل و أثناء الرش :
أول شي هادي صورة توضح المسدس و توضح الأشياء الضرورية فيه :
* حاول قد ما تقدر تخلي الهوا الخارج و البوية الخارجه على أقل شي , يعني تخرج بكميات قليلة , عشان تشكل طبقات و تنظف رشتك أكتر .
* ممكن إنك تعمل منصة أو ستاند تحط عليه المجسم وقت الرش من أي شي , مثلا : سلة القمامة ” الله يكرمكم و يعزكم ” ممكن إنك تلفها بعدد من الجرايد و تلصقهم بالشطرطون و ترش المجسم فوقها , و بصراحة هي أفضل منصة رش استعملتها إلى الآن , و بعد ما تخلص رش شقشق الجرايد و أهلا و سهلا بأحلى سلة .
* اللكر مادة لزجة ثقيلة دبقة , يضاف لها التنر عند الرش عشان يخففها و يسهل طلوعها من المسدس , الله يعينك لو جا على يدك تحس نفسك سبايدر مان ! , تنباع بالنص الكيلو كأدنى كمية , و يكون سعرها 20 ريال , و تكون في علبة حقت سوبر شل , فأحسن انك تشتريها بالعلبة اللي بـ 35 ريال , لانو اللي بـ 35 لها جالون خاص بيها و غطا فتضمن انو ما تنعدم عليك مع الزمن , و أيضا كميتها أكتر , و بالنسبة للمجفف فسعر العلبة الصغيرة منه بـ 25 ريال , و هادي الأسعار يا شباب تختلف من محل لمحل و صناعه لصناعه وهادا شي طبيعي و معروف , ممكن تكون أغلى أو ارخص من كدا , بس هادي الأسعار اللي اتعامل بها مع المحل اللي اشتري منه .
* ملاحظات تفيدك *
<> بقدر استطاعتك عزيزي القارئ , حاول انك ترش المجسم في مكان مفتوح , مثلا : زي حوش البيت و هو أفضل مكان للرش , و إذا ما قدرت ترش في الحوش رش في مكان جيد التهوية حاول أيضا انك تلبس كمامات تباع في محلات مواد البناء و بالتحديد ” ساكو ” بسعر 15 ريال للكمامة , لانو ريحة المجفف و استنشاقه بكثرة تؤدي إلى أمراض الربو و الكحه البعيد عنكم .
<> اختر ظروف الهواء المناسبة .. كيف ؟ .. يعني اختار وقت ما يكون فيه الهوا قوي , عشان لو رشيت و في هوا , الهوا دا بيشيل معاه اتربه و غبار , فلو رشيت اللكر و جا هوا شايل معاه غبار و لا تراب قول لتعبك سلام عليكم . << انفهمت النقطه و لا ؟ ^__^ .
<> أفضل أوقات للرش من الساعه 4 عصر إلين المغرب , و خد في بالك انك لو بدأت ترش 4 عصر ما حتخلص إلا 8 عشا , ما أدري امكن الشغله المفروض ما تاخد الوقت دا كله , لكن كل ما حاولت إني أبدّر و استعجل في شغلي تطلع النتيجه 3 أو 4 ساعات من العمل المتواصل و طبعًا لازم الدقة في الرش و الدقّة تتطلب التركيز و الوقت مع بعض.
<> قبل ما ترش مجسمك جرب الرش و تعود عليه على أي شي عندك ” قطعة خشب – حديد ” أي شي .. أهم حاجه تتعود انك تتحكم في كمية البوية الخارجة و تتمرس عليها .
<> نظف مجسمك تماما من أي غرا أو زيوت و غبار قبل الرش .
<> إذا رشيت مجسمك من قبل فلا ترش اللون الجديد فوقه عشان لا يسويلك طبقات من البوية ما لها داعي , باستطاعتك انك تزيل البوية القديمة بطريقتين :
الأولى / اشتري مزيل بوية من محلات مواد البناء و فكفك المجسم و صب فوقه شويه شويه , راح تزول البوية في ظرف ربع ساعه لكنه متعب , انتبه لا يلامس جلدك تراه يللللللسسسسع << مجربها ^__^ لها طعم و الله ! .
الثانية / جيب قدر يكفي حجم المجسم و عبي القدر تنر حار , و غطس المجسم في القدر بالكامل و خليه حق ساعه , و بعد كدا شيله و نظفه بفرشة أسنان قديمة , و بصراحة هادي الطريقة أحسن من اللي قبلها .
<> خد في بالك انك بترش مجسم , يعني الشغله ما يحتاج لها وقفه و تعب زي ماهو حاصل عند رش السيارات الحقيقيه , بس الشغله كلها دقة و تركيز و صلى اللهم عليه , يعني لمن تجي بتجهز العدّة , خد لك كرسي + طاولة قصيرة + المنصة اللي حيوضع عليها المجسم لمن ينرش , بعدها قول بسم الله و أبدا أشتغل و انتا مبسوط و مرتاح .
<> لمن تجي تصب البوية في الخزان لازم تصبها من خلال الصفاية الورق , عشان تضمن أنو ما يكون في أي اتربة و شوائب لمن ترش
<> اللكر ينرش طبقات خفيفه بحيث انو يكون الرش طبقه طبقه و زي كدا و شويه شويه , بس ها ! .. لا ترشه كلو مره وحده عشا لا تطلع في الرشه حبوب و هادي الأشياء , و كمان على حسب ضغطتك على المسدس إذا ضغطتك خفيفه بيطلع معاك قليل و إذا ضغطت بالقوه عاد الله يعين المستعين .
<> عند الانتهاء من الرش , و في اثناء انتظارك للمجسم انه ينشف من اللكر , حطه في مكان معزول عن الهوا , عشان الهوا زي ما قلنا انو بيشيل معاه غبره , و المجسم لسا ما نشف فحتلصق فيها الغبره و لا عاد تطلع بحيث انو اللكر حيكون زي الغرا عالسيارة و يمسك في أي شي .
<> نظف مسدسك بالتنر , ابتداءا من تنظيف الراس بدقة و احكام , و تنظيف الخزان , و تنظيف المجرى , و يكون تنظيف المجرى بإنك تصب شوية تنر في الخزان و تبدأ ترش عالهوا عشان البوية اللي في المجرى تخرج و يسير بعد كدا نظيف تماما باذن الله .
<> لا تلمس المجسم مررره لين ما تتأكد أنه نشف تمامًا ! .. كيف تتأكد ؟ .. روح عند أي منطقه وصلها اللكر مثلا عند الحديده اللي تكون فيها مفصلة الكبوت و أيضا يوضع عليها الطبلون و عاد الشباب كلهم عارفينها و ما يحتاج توضيح بالصور , هادي المنطقه المناسبة عشان تتأكد هوا اللكر نشف و لا لسا , و كمان على حسب كمية المجفف اللي حطيته فلو كتير نشف بسرعه و لو قليل نشف بوقت طويل شويه .
:: أسعار البويات ::
بالنسبة للأسعار فلكل بوية سعرها و لكل شركة سعرها الخاص بها , فالسعر عادة يكون على حسب النوع و الجودة , و بصراحة أفضل شركة أتعاملت معاها هي شركة ” سيكنس ” الهولندية اللي يوردها العامودي فرع مكة المكرمة و و كمان في نوع طيب إللي هو ” أكزو “.
و توجد أيضا بويات مختلفة تبدأ من الهولندية نزولا إلى الأردنية و المصرية و الصينية ووو .. بلا بلا بلا .
في نوع من البويات و اللي افتكر انه صيني , أعوذ بالله ريحته عفنه بشكل ! ..
بس هناك أنواع ريحتها خفيفه و تروح بسرعه .
دحين حاتكلم عن البوية الهولندية ” سيكنس ” اللي اتعامل معاها :
1- البوية العادية : 15 ريال للربع الكيلو .
2- البوية الميتاليك : 20 ريال لربع الكيلو و 10 ريال للـ 100 غرام .
3- البوية اللؤلؤي : و زي ما ذكرت لكم أنه يجي بعلبتين مقسمه ” بطانه و لؤلؤي ” تجي تقريبا 40 ريال للنص الكيلو و 20 ريال للـ 200 غرام .
4- الميتال فليكس ” الترتر ” : سعرها بالكيلو بـ 1400 و ربع الكيلو حقها بـ 350 ريال .
5- البوية الماجيك : و ما تنباع بربع الكيلو , لكن تنباع بالكيلو , لأنها تجي علبه وحده و مقفله من بلدها , و هي أصناف كتير لكل صنف عدد معين من الألوان و مختلفة الأسعار من 1200 للكيلو إلى 1700 .
* زي ما قلنا .. لكل شركة لها سعرها , هناك أسعار أرخص من هادي بـ 5 و بـ 10 , لكن هل هي بنفس الجودة ؟ الله و أعلم ما قد جربت .
:: أماكن رش البويات ::
بالنسبة لأماكن الرش .. في أي صناعيه تروحها في أي منطقه من مناطق المملكة تقدر تروح و تدور على محلات السمكره و البوية , و الصناعية مليااانه وِرَش على قفا مين يشيل , و عاد انتا و حظك إذا كان فاضي رشلك و إذا كان مشغول أرسلك على واحد غيره .
:: أسعار رش البويات في الورش ::
تبدأ من 30 ريال إلى 100 ريال و أكتر و بصراحه في ورش ترش بـ 30 ريال رشات أفضل من أبو ميه لأنو على حسب المعلم و شغله و انت و حظك .. ^__^ .
و عاد انت و شطارتك لو كاسرته في السعر و زي كدا , و يفضل انك تجيب البوية بنفسك عشان لا يرشلك درجة لون ما تعجبك فتروح تتمشكلي معاه قدو هوا يالله الخراج و بالعافيه رشلك ^__^ .
و مو شرط انو السعر هو اللي يحكم نظافة الرشه .. و هادا شي معروف .. لكن على حسب شغل المعلم , أيضا شغل السمكره ” مسح المسكات – مسح الجلود – مسح الشنطة – ,, ” هادا ما يكلف كتير يعني إزا ضربت الحمّى و ضحك عليك زوّد 40 ريال فوق سعر الرش .
و بكدا نكون خلصنا كل شي عن ما يتعلق بالبويات
أن نقلت وجمعت أكبر مجموعه من المعلومات لأجل عيونكم
………………………………………….. ………………………………………….. ………………………………………….. ………………………………………….. ….
