زميلتي مجروحة ,,, تكفون أعطوني رأيكم

كيفكم يا أحلى نسوان

الله يكتب لكم السعادة في الدارين

هذي أول مشاركة لي وماكنت أتمناها تكون بهالشكل لكن أحياناً الظروف تحكمنا

ببدأ بموضوعي مباشرة

أنا لي زميلة غالية على قلبي كثييييير بريئة وتشرح القلب لكنها هالفترة متضايقة كثير

القصة ان في ناس كانوا ناوين يتقدمون لها لأن فيها مواصفات البنت اللي يبغاها ولدهم

المهم طلبت الأم إنها تشوفها وقالوا عادي هم موافقين عليها بس الأم تبغى تشوفها

ووافقوا أهل زميلتي وحضرت الأم والشهادة لله تقول زميلتي الأم طيبة وملتزمة حتى ماكانت من النوع اللي

تتفحص البنت بالعكس كأن الزيارة للأهل مو للشوفة وابداً مافتحت عن موضوع الخطوبة شيء وانتهت الزيارة

وزميلتي حست براحة كثيييير وارتحت للمرأة لكن اللي صار بعدين إن الناس ماعاد كلموهم ولا ردوا لهم جواب

وزميلتي صارت محرجة لأن اللي حولها يسألونها وش صار على الموضوع وهي ماعندها جواب 😐

تقولي أحس إني مجروحة بالحيل ومتضايقة لأنهم ماردوا علينا بشيء يعني لو ماعندهم رغبة يقولوا ماصار

نصيب لكن مسألة إن الموضوع يصير معلق كذا لتقريباً شهر ضايقها كثير وأتعب نفسيتها

بالله عليكم مو من الاحترام لو الناس ماصارت عندهم رغبة يتكلمون يتصلون يحترمون الناس اللي فتحوا لهم

الباب وضيفوهم ورحبوا فيهم مو يتركوهم كذا ولا يعبرونهم رغم إنهم قالوا إنهم موافقين عادي من قبل

ما أدري وش رأيكم ؟؟

أنا ما عندي خلفية عن هالأمور وهل عدم اتصالهم أو ردهم بأي جواب معناه ماعندهم رغبة وبطلوا

بس لو بطلوا ليش ما بلغوا أهلها من أول أسبوع وريحوهم ليش يخلوهم ينتظروا كل هالفترة

رغم إني أقولها يمكن عندهم ظروف أو شيء شغلهم خاصة إن مالهم فيهم علاقة أو معرفة فما يعرفون

بظروفهم وهم قالوا لهم إن الرجال راح يجون بعد فترة ..

الله يخليكم افيدوني خلوني اخفف عنها شوي لأني متألمة عشانها 😛 خاصة و إنها متضايقة كثيير

رغم إنها ماتحب تتشكى وتطلع اللي بداخلها وتفضفض لكن أنا اضغط عليها لأن الكبت مو زين على الأقل اذا

تكلمت ترتاح شوي

وعلى فكرة زميلتي بسم الله عليها نعومة كثير وحلوة بس خجولة حبتين