ليه اليـأس .. و ربــك رحيـــم :(

سبق حطيت موضوع حكيت فيه اللي حكاه قلبي
تثبَّت الموضوع ..
و أسأل الله أن يثبِّت عند السؤال من ثبتته بإذن الله
..
ذكرت أني صادفت ناس كثير .. وشفت من القصص عجب ..
كثير منها آلمني .. وقليل ما سرَّني ..
هذا شي طبيعي .. دامنـا في دنيا .. دار إبتلاء ..
..
سبحان الله ..
صدق عايشين مع بعض .. نصادف بعض كثير ..
و كل منا يقابل الآخر .. ومن نظرات العيون نفهم أحاسيس البشر..
كثير من عيون البشر تحمل آلام كثيرة و هموم كبيرة ..
هذا وربي آلمني كثير .. حتى حملت هموم الخلق ..
أشوفهم أخوة لي .. أخوان و أخوات ..
إن ما عاونَّا بعضنا .. ما أظن إن عيشنا هنا سيسمى عيشاً ..
نحمد الله أولاً و أخيراً على كل شي ..
..
ما راح أطول بالمقدمات ..
أعرف إن القصص و التجارب الشخصية الواقعية .. تفيد كثير ..
أبذكر لكم قصة بنت كانت زميلة لي أيام الثانوي ..
لو تبون تعرفون معنى الحزن تلقونه بعيونها ..
للأسف .. اللي فيها ضايقني كثير ..
و ما حبيت أتركها بلحالها .. حسيتها عانت كثير ..
رغم صغر سننا في ذاك الوقت .. بس الهم ما يعرف عمر ..
هذه البنت برغم حزنها .. ووحدتها ..
ضايقني كلام البنات عنها .. ما أحب الغيبة ..
أو ذكر إنسان دون حضرته ..
كنت في يوم جالسة مع صديقاتي في الفصل بأيام الثانوية ..
أنا كنت تعبانة شوي في ذاك اليوم .. عشان كذا بقيت ساكتة ..
و يمكن بعد من طبعي ما أحب أتكلم كثير ..
في ذاك اليوم .. كطبع البنات .. لازم يتكلمون و يهذرون واجـد ..
هـ المرة تكلموا عنها .. عن البنت اللي ذكرتها لكم ..
بنت بانت معالم الحزن في وجهها ..
اذكروها .. بس بإسلوب نرفزني كثير .. وضايقني ..
وتعبني على تعبي .. و هدّ حيلي ..
و الله يا خواتـي ما أحب أحد ينذكر بسوء ..
بس اش نسوي و هذا طبع البشر ..
اذكروا عنها كلام ما يسرّ أبـد ..
أنا ما أبي أذكره كله .. أبي أستر على خلق الله ..
بس أبذكر أشياء ثانية غير ..
إنتوا تعرفوا البنات اللي أهلهم ما اهتموا فيهم كثير ..
و افقدوا الحنان بالبيت ..
تعرفون إنهم يدورون اللي فاقدينه عند غيرهم ..
وعشان كذا ..
ممكن ينجروا خلف أشياء في ظاهرها الحب ولكن في باطنها الآلام ..
صدق تضايقت .. بس ما قدرت أسكت ..
حاولت أبيَّن أي جانب إيجابي فيها ..
بس مشكلتي كنت أنا وحدة و اللي قدامي كثير ..
أنا أقول رأي .. وهم يقولون رأي ..
أحاول أشيل الفكرة اللي ماخذينها عنها ..
بس ما قدرت .. ولا فاد ..
حاولت أخليهم يذكروها بخير .. ما قدرت ..
المشكلة إن حكيهم كان صحيح ..
و الله تضايقت .. و انسدت نفسي عن كل شي ..
تذكرتها .. تضايقت عشانها ..
و المشكلة إن الكل تركها ..
صدقوني هم معهم حق .. تدرون ليه ..
لأنها .. ما عاد تبي أحـد .. تبي تقعد لحالها ..
و اللي جـد خلاَّني أتضايق بشدة ..
إن البنت قالت كلمة .. اذكرتها لي صديقتها ..
البنت هذه دقتها بكتفها يعني اسكتي ..
بس ما اسكتت .. قالت لي: تدرين اش قالت لي فلانة اليوم
أنا شفت ارتباكها .. خصوصاً أنا مادري ليه تستحي تكلمني ..
أنا حسيت فيها ..
قلت لها: دام فلانة ما تبي تقول .. خلاص ما يحتاج ..
قالت: لا .. بقولك .. أبيك تنصحينها ..
قلت: إذا هي رضت .. خلاص ..

استحت البنت شوي .. ولفت وجهها.. وما ردَّت ..
قالت لي: تقول خاطرها لو تسكن في القبور ..
أنا تعقدت حواجبي .. ما عجبني حكيها ..
قلت: ايش ..
قالت: تبي تعيش لحالها .. خاطرها تسكن في القبور ..
عصبت شوي .. بس كتمت غضبي ..
مسكتها ولفيت وجهها قدامي ..
قلت: من جد هـ الكلام ..؟!
و الله يا بنات شفت الدموع تجمعت بعيونها ..
و الله أنا اللي تضايقت مو هي ..
اقعدت ساكتة .. خاطرها تروح .. بس أنا مو راضية ..
اش هالكلام .. أبي أسكن قبور .. ومادري ايش ..
اش هـ اليأس اللي حطمها كلياً ..
ردت عليّ بإسلوب شخص حالم يعني قاعدة تقول هالكلام من قلبها:
قالت: عادي .. خاطري أسكن في الفضا ..
كوكب آخر .. أبي أكون لحالي ..
و الله على حزني لحالها ابتسمت قلت: تبين تعيشين لحالك ..
قالت: ياليت ..
هزيت راسي قلت: طيب ..
و الله يا بنات غصباً عني سكت .. و الله من الضيق ..
المشكلة دق جرس الحصة ..
ودخلنا .. أنا في عالم .. والأستاذة في عالم آخر ..
رجعت البيت و أنا متضايقة على حالها..
تذكرت كلام البنات عنها ..
و المشكلة إنها من نفس قبيلتي..
و اللي نرفزني يوم قالت وحدة أعرفها: أحس صرت أكرههم ..
تقصد أصل البنت يعني قبيلتها ..
أنا ابتسمت على خفيف .. قلت: حتى أنا ..؟!
استحت قالت: لا .. بس مادري أحس صرت أكرههم منها ..
قلت: لا تجمعين الكل .. حرام عليك ..
المهم ..
كل ما أشوفها .. أقرأ الحزن بعيونها ..
و يوم بعد يوم تتعب البنت نفسياً و جسدياً ..
و الله حالتها ما تسرّ ..
في يوم من الأيام .. و بوقت مراجعات..
جت البنت هذه .. ما كان فيه بنات كثير بالمدرسة ..
قلت في نفسي هذه أقوى فرصة ممكن أكلمها فيه الحين ..
خليت صديقاتي مع بعض ..
رحت لفصلها ..
هي كانت بمثل عمري ..
بس من الحزن و الآلآم للأسف ارسبت مرتين ..
لدرجة كانت تبي تفصل .. بس و ربي ما خليتها ..
مستحيل أخليها تضيِّع نفسها .. لدرجة عصبت عليها ورفعت صوتي..
صدق ندمت .. بس الحمد لله افهمتني وقدَّرت موقفي..
في ذاك اليوم..
دخلت عليها الفصل..
و كالعادة كانت لحالها ..
بس القعدة ما سرتني..
كانت سادحة على الكراسي..مصففتهم جنب بعض..
و مغطية نفسها بعبايتها .. ورايحة عالم آآخـر..
ناظرت بصديقاتها اللي كانوا في الفصل معها..
كانوا 2 بس ..
ناظرت لهم بنظرة اش فيها ..
ابتسموا بحزن .. وما ردوا .. يعني يا خلود شوفيها ..
رحت لها .. حست فيني و جلست ..
و الله يا بنات ضايقني حالها ..
تنهدت شوي .. سلمت عليها .. وسألتها عن أخبارها..
و أكيد و كالعادة بتقول: بخير .. ولاَّ في الحقيقة مو بخير أبـد ..
هزيت راسي قلت: طيب ..
مادري اش أقول .. أحسها تعبانة كثير ..
قلت: باجيك بعد الفسحة .. أبي أكلمك ..
قالت: طيب ..
طلعت .. لأني أبي أكلمها لحالنا ..
تعرفون .. إن كنتِ إنتِ و أي شخص لحالكم ..
راح تقدر تحكي براحتها ..
خصوصاً إذا كان اللي قدامـك يسمعك بقلبه وعقله..
جت الفسحة .. و ما كان عندنا مراجعات ..
يعني من الصبح لنهاية الدوام .. فاضين ..
و لهذا الشي .. أخذت هـ الفرصة .. أبي أغيِّر تفكيرها الغلط..
دخلت عليها الفصل .. كانت جالسة لحالها كالعادة..
سلمت و جلست قدامها ..
ردَّت السلام ..
سكتت..
ما عندها شي تقوله .. بس أنا اللي بديت ..
سألتها: أخبار قلبـك..
اضحكت بس بحزن: قالت بخير ..
ناظرت بعيونها بقوة شوي قلت:بخير ..؟!
اضحكت قالت: إيه ..
قلت: لا .. عيونك تحكي كلام ثاني ..
اضحكت قالت: ليه .. عادي ..
قلت: اش اللي عادي .. ما تبين تقولين لي ..
قالت: اش أقول ..
قلت: ليه هـ الحزن كله ..
قالت: ما فيه شي ..
قلت: و إنتِ كل كلامـك ما فيه شي ..
اضحكت قالت: اش أقول يعني ..
أنا فهمت من كلامها .. إنها ما تبي تقول ..
بس مستحية مني شوي ..
قلت: ترى ما نسيت اللي قالته صديقتك فلانة ..
قالت: وشو
قلت: تبين تسكنين في القبور
اضحكت و قالت: عادي ..
قلت: لا و الله مو عادي ..
تنهدت و الله يا بنات إذا تبون تشوفون منبع الدموع تلقونه بعيونها..
قلت: اش فيك .. ممكن تحكيلي..
و الحمد لله بدت تحكي .. وقالت لي قصتها من الأول للأخير ..
و الله واهي تحكي حسيت إن جبل و انزاح من صدرها ..
بس لسَّى الهم بداخلها..
بس يا بنات ..
كلامها و اللي صار معها ما يسرّ ..
اللي صار معها نتيجة عدم إنتباه الأهل .. وقسوتهم ..
هذه نتيجة اللي صار و قاعد يصير معها..
سكت شوي..وتنهدت شوي .. وتضايقت كثير ..
..
المهم ..
بعد ما تناقشنا أنا و هالبنت ..
واسمعتني و سمعتها .. تمنيت يكون لكلامي صدى بقلبها ..
أحيان أحس إني مقصرة معها ..
أحس المفروض أتعامل معها بحدة شوي ..
بس أفكر و أقول ما يصلح الحدة و القسوة هالأيام ..
الرفق و اللين و الكلام الطيب ينفع ..
بس لأنها أحيان جد يوصل يأسها لدرجة كبيرة ..
تحطمني أنا كليًّا .. ولا كأني تكلمت معها ..
خواتـي..
أنا ذكرت هالموقف .. مو عبث و لمجرد قصة و بس..
لا ..
أنا ذكرت شعورها اللي مو فيها هي و بس..
لا .. أنا صادفت كثيــر مثلها .. كثير بالمرة ..
أنا مو بس ذكرت القصة هذه لمجرد ذكر .. أو تسلية ..
لا أنا في قلبي شي ثانـي .. أبي أوصله ..
و الأهم .. و اللي أبي أوصِّله للقلوب ..
هو رحمة رب العالمين ..
أكيــد ..
اليائس له رب رحيم به .. لا يرضى له باليأس و القنوط ..
البعيد عن رب العالمين .. بعيد عن رحمته ..
قال ربي:..(( لا تقنطوا من رحمة الله ))..
هذه كلام الرب سبحانه ..
رحمة ربنا توصلنا .. ولو تعذبنا سنين ..
رحمة الرب سبحانه .. وسعت السماوات و الأرض ..
ليه اليأس و ربـك رحيـم ..
ليه القنوط .. وربك كريم ..
ليه هالوحدة اللي اذبحت زميلتي ..
و اذبحت كثير من البنات ..
محد عايش وحيـد و قلبه مؤمن بـالله ..
قسماً بـالله إن الواثق بـالله وبرحمته .. ما أتوقع بيسكن بقلبه ضيق ..
إذا رب العالمين رحمان رحيم .. بـالله بيسكن الحزن بقلوب المؤمنين..
..
خواتـي..
أنا ما أكتب موضوع هنا في هذا القسم ..
إلاَّ و ورائي هدف من كتابته ..
ولا أكتب قصة تصادفني..
إلاَّ و عندي هدف و هدف كبير بعـد ..
خواتي ..
يعلم الله مقدار حبكم بقلبي ..
و الله حتى لو ما جمعنا إلاَّ ذا المنتدى الطيب ..
يعلم سبحانه أني ما كذبت بكلمة تمنيت توصل للقلوب ..
يعلم سبحانه .. أني حكيت من كل قلبي ..
ما أحب أشوف حزين بالدنيا ..
ليه الحزن .. ؟!
هو ربي خلقنا للألم .. ربي خلقنا للعذاب ..
رب العالمين أكبر يا بنات ..
الله أكبـر ..
ما خلقنا ليعذبنا .. ولا خلقنا و نسينا ..
تعالى الله ربنا عن كل شي ..
رب العالمين ما ينسى أحـد .. ولا خلقنا للعذاب و بس ..
ربي خلقنا لعبادته .. وعدنا بجنة عرضها السماوات و الأرض ..
أُعِدَّت للمتقين ..
فهل نحن منهم .. ؟!

الصبر على الأقدار .. الصبر على الأقدار .. الصبر على الأقدار ..

خواتـي ..
أتمنى كلامي يوصل للقلوب ..
أتمنى ألقى تفاؤل بالحياة ..
صدقوني اليأس يقصر العمر ..
خاطري ألقى حياة يملؤها التفاؤل ..
لا حياة خالية من أي روح و سعادة ..
..

أدري طوَّلت عليكم ..
بس أحس نفسي باقي مقصرة ..

ربي يسعد قلوبكم .. وعساكم ما تلقوا إلاَّ الخير بقبالكم ..

أختكم .. و راجية رحمة الله لها و لكم:
خوخة