طريقة عمل السمن … بالصور

كيفكم ؟
ان شـــآء الله تمــآآآم 😆 hy:

هاليومين كنت مسويه سمن ولما بديت فكرت أنزل لكم طريقة تحضيره

وطبعاً طريقــة تحضيره تختلف من بلد لبلد

وتختلف حسب نوع الزبد المستخدم

زبد بقري أو زبد غنم

لكن اليوم حبيت أنزل لكم طريقتنــآ في عمل السمــن … بالصور 🙁

ممكن بعضكم ما تعجبهـآ لأنهــآ متعوده على طريقه ثانيه

لكن مثل ما تقول أمهاتنــآ في المثل:
( كل شيخٍ له خطبه )
😡
يعني كل ناس لهم طريقتهم اللي يرتاحون لهــا

عمومـآً
هــاذي طريقتنا كالتالي:

أولأً احنا نستخدم زبده جاهزه مو اللي تنعمل يدوياً مثلاً [ المراعي ، نادك ، الفرسان ] اللي يعجبك
لكن طبعاً نوعية الزبده اللي تستخدمينها تأثر في الطعم والنكهه
أنا شخصياً أستخدم المراعي ممتــآزه

ما ألتزمت بمقدار محدد لكن بنحتاج لـ :
1/ طبعاً الزبده (مثلا المراعي) <<< البنت تسوي دعايه 😈

2/ وكميه من دقيق البر حسب كمية السمن اللي بتسوينهـآ وحسب عدد الحجر
أنا استخدمت ملعقتين تقريباً
لكن مقاديري كانت قليله حتى ما احتجت إلا لحجر واحد

3/ والحجر ويفترض يكون من نوع صلب ومسطح
مثل الصوره

لأن هالنوع بيسهل عليك تحميته واستعماله

نجي للشغل :
أول خطوه
نضع الزبده في القدر على نار متوسطه إلى هادئه
(أعذروني ما صورت الزبده قبل الذوبان بس أتوقع أنها واضحه)

وفي نفس الوقت نكون مجهزين الحجر ونضعه على النار
كما في الصوره

نترك الحجر هكذا
وننتبه للزبده
لما تسيح الزبده كامله نهدئ النار عليها جداً
ونتركها على النار تغلي بهدووووووء

ونلاحظها جيداً
لما تشوفي أطراف الزبده بدأت تأخذ اللون البرتقالي أو بدات تتحمر نوعا ما
مثل الصوره هنا

وهنا أقرب شوي

في هاللحظه طفي النار
وتكونين مستعده بالدقيق البر اللي مجهز عندك قريب
والأفضل يكون في إناء معدني
لأنك بتقلبين فيه الحجر الحااااار
فإحتمال يوصل لطرف الإناء ويحرقه

لما طفيتي النار مباشرة خذي الحجر بملقط أو ملعقه من على النار

وقلبيه في الدقيق البر
بشكل سريع

معليش الصورة مو واضحه لأني كنت مستعجله
➡
ثم نزليه في القدر على الزبده المطبوخه

لاحظي أنه لما نزلناه في القدر بدأت الزبده تغلي من جديد
بسبب حرارة الحجر

بعدها غطي القدر واتركيه نصف ساعه تقريباً
بعدها بتكون خفتت حرارته
وأصبح هكذا

بعدها نصفي السمنه في العلبه اللي مجهزينها

نشيل الحجر منها طبعاً أنا أنظفه وأحتفظ فيه للمرات الجايه
لأني ما أضمن ألاقي الحجر المناسب دائماً إلا طبعاً إذا كان متكسر مره ما ينفع
بعدها تبقى في القدر بقايا السمنه والدقيق لاترميها لأنها ممتازه مع التمر
لكنها دسمه
أنا هنا غلفتها لأني مسويتها متأخره ما راح آكلها بآخر الليل فخليتها لبكره

نغطي السمنه وندخلها الثلاجه للحفاظ عليها

أو في مثل هالوقت
ما تحتاج ثلاجه الجو يكفي ما شاء الله
بعد فتره بـتـلاقينها صارت كذا

لكن أنا إحتياطاُ أدخلها الثلاجه حتى في البرد حتى أضمن بقائها أطول مده محافظه على نكهتها

وبكذا تكون السمنه جاهزه للإستعمال
طبعا يا بنات لا تستغربون من الصور الكميه قليله
لأني ما سويت الا كميه قليله على قدنـا
➡
كل اللي استعملتها أربع أصابع زبده بس

يالله هاذي طريقة عمل السمنه عرفتوها
أبي أشوف كل وحده تسوي بها طبق شعبي حنيني ومحلى ومرقوق
شدو حيلكم

الموضوع مجهود شخصي فأتمنى إذا وحده بتنقله
على الأقل تكتب منقول من باب الأمانه

مع أعذب وأرق تحيــة
من محبتكم شـوآقــــهـ