الحقو اخر اخبار العقار

السلام عليكم يافراشات

عندي لكم خبر حلو
اليوم وانا ادور لي عقار الا واشوف الاسعار نازلة شوي عن قبل اسبوعين وكل مالهم ينزلون ان شاء الله خاصة بعد دخول سالفة البيوت الماليزية والالمانية بجدة
يعني العقار عن قريب بيلحق سوق الاسهم

انا زي ماقلت لكم ا
دور لي بيت ودرت اكثر احياء الرياض كل الناس ودة تبيع
الحمراء نصه للبيع ونصة فلل والباقي اراضي وحي العقيق والصحافة والملقا والوادي والربيع ……الخ
من الاحياء وزادت العروض والطلب قليل
واكبر دليل ادخلي للمنتديات وشوفي للبيع فلة وللبيع فلة مفصولة وللبيع دوبلكس وللبيع شقة
واتصلي على العقارت وماتدرين الا ودة يمسكك بايدية ورجلية وماعندكم احد يشتري
عندي كذا بكذا وعندي ……
الناس دجت وماعندهم يشترون وذولا الجشع مالي عيونهم الا ياخذون الارباح دبل
ينطبق عليهم المثل من امن العقوبة اساء الادب الا من رحمهم ربي
ولا ازيدكم من الشعر بيت يقولون ان شاء الله على العطلة العقار بيطيح لانة كل مالة وينزل
امس اعجبتن فلة انا وابو الشباب وسالنا واحد من العقارات اللي يسوقلة وانا قاريتة من النت
مسيومة بمليون وسبعين ومكتوب بالنت السومة بمليون و100 وقالة الهاسبند تبعي انا فوق المليون مااقدر يالة ادبر المليون وتبين ازيد صعبة قال بشوفلك احاول اسال المالك واعلمك

على فكرة هذا الكلام عل الساعة 8 او 9 وانا الفلف بهالمنتديات
حصلت نفس مواصفات الفلة الي شفتها من عقاري ثاني قلت خلين ادق اجس النبض ورد علي وقالي
مسيومة بمليون و100 الف
قلت شف يالطيب انا رحت وشفتة وكل واحد يعطين من راسة مبلغ وش هالتلاعب
قالي ان راعي العقار قريبي ومسيومة الصدق بمليون و50 الف
قلت خير ان شاء الله
ورجع اتصل وقال اني كلمت قريبي وبكرة بيبعة وانة اللي سايمة بيجيب الشيك بكرة تبون تسومنة
ولا
قلت لا الله يرزقكم ماتلزمنا لان واضحة انة السالفة نصب ويوم شافن حرمة قال خل العب علية شوي
مايدري انا 😡

المهم يابنات انا من رايي تمسكون فلوسكم لين مايهدى العقار

او انكم ماتتسرعون بالشراء دوروا ودورا لين ماتدور روسكم بعدين اشروا
وترا الحين هما العقار بينل بعض الناس تقول نبي نبيع فلتنا الحين ونسكن ايجار واذا نزل العقار ناخذ فلة احسن
واكثر الملاك ماسكين بيوتهم الا يبيعة بالسعر الفلاني ولا لا
وانا اقولة استرح لانة عقب مايتعب من تسديد فواتير الانوار الصفراء ويقعد لة كم شهر يطيح الحب اللي براسة يقول هاتوا ماعندكم بس خلون افتك من الفواتير اللي على ظهري ويدبسة بالمشتري
هههههههه
اعجبكم تحليلي صح 😆 🙂

وبعض الملاك مستعجل ولا مزنوق ويمشية لاني الاحظ بعض البيوت تنعرض وهي بحي زين باقل من الاسعار اللي حولة ومااسرع ماتطير ماشاء الله

والله يسهل لنا واللي تبي بيت ملك تكتب لي اللي تبية ومابي منكم الا الدعاء
بس تراي لانيب عقارية ولا يحزنون بس لاني ادور لي بيت ملك بشوفلكم معي يمكن افك زنقتكم وتدعولي وربي يسهل لنا ونشتري بيت
امين والمسلمين اجمعين
بس ترا بالرياض انا ادور
اتمنى ما اكون طولت بهذرتي معكم وانكم فهمتو كلامي واذا مافهمتم قولولي عشان اترجم لكم

وسلامتكم