عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم
دي أول مشاركة ليا في الركن ده
و طبعا بما اني من البنات السمبتيك فعملت لازانيا منخفضة السعرات عشان تبقي صحية و الكل ياكل منها يا رب تعجبكم
ياللا نبدأ باسم الله
أولا مقادير عجينة اللازانيا
2 كوب دقيق أبيض
1 كوب دقيق اسمر
2 ملعقة زيت زيتون
5 بيضات
ملح
فلفل
نحطهم علي بعض و نعجنهم بدون اي اضافات تانية لغاية ما تتماسك و يبقي شكلها كده
نحطها في التلاجة حوالي ساعة عشان تستريح و هي متغطية ببلاستيك عشان مش تنشف
و بعد ما تخرج نقسمها اتنين و نبدأ في فردها
بعد ما نفردها نبدأ نقطعها بالرول
ولما نقطعها نحطها في طبق و نكون مجهزين ماء بيغلي علي البوتاجاز
نسلقها لمدة من 8 – 10 دقايق في ماء و ملح
انا حطيتها في صينية عشان اشوفها و مش تلزق
بعد كده نخرجها و نصفيها في مصفاة و نتركها ترتاح بس وهي متفردة
نجهز بقي البشاميل الدايت
المقادير
كوب و نص لبن خالي الدسم
كوب و نص لبن كامل الدسم
4-5 ملاعق دقيق
1 ملعقة شاي زبدة
بيضة
ملح
فلفل
بهارات
الطريقة
في حلة تيفال
نحط الدقيق من غير اي اضافات عشان يتحمص و يتغير لونه شوية
بعد كده نضيف اللبن و الملح و البهارات و نقلب بمضرب سلك عشان مش يكلكع
لغاية ما يستوي نطفي النار
بعد ما يبرد نحط بيضة و نضربها معاه كويس
ياللا بقي نعصج اللحمة دايت
المقادير
1/2 كيلو لحمة مفرومة
1 ملعقة زيت زيتون
بصلة متوسطة مبشورة
ملح
فلفل
شطة
بهارات
الطريقة
نحط المقلاية التيفال علي النار لغاية ما تسخن و بعدين نحط الزيت
نحط البصل و الملح و الفلفل
بعد البصل ما يحمر زي الصورة كده نحط اللحمة
كده كله تمام
نعمل بقي الصينية
نجيب الصينية و نرص فيها شرايح اللازانيا علي شكل طبقة
بعد كده نحط طبقة من البشاميل بس مش كتير و فوقها 1/2 اللحمة المفرومة
انا حطيت شوية زيتون أخضر مقطع مع اللحمة
و نحط كمان طبقة لازانيا و بعد كده بشاميل و لحمة و بعد كده لازانيا و فوقها باقي البشاميل
نسيت أصورها في النهاية قبل ماتدخل الفرن
معلش بقي
هنا لما طلعت من الفرن
بالهنا و الشفا
