أنــا حبيبــي غيييييييييييييييييييير

بقول قصتي هنا….ادري طويله …..
وادري اللي فات مااااااااااااااااااات
بس يمكن عل وعسى … تمر بنت …تعتقد ان حبيبها غييييييييييييييييييييير وتقرا اللي بكتبه

كثير يعتقدون ان حبيبهم غير … اتمنى انه يكون غير
ماابغى عتب ولا ابغى نقد …
قصتي للعبره بقولها والسلام

تربيت في عايله بعيون الكل مثاليه …ام وابو مايقولون كلمة لا لاي شي نطلبه انا او اخوي او اختي
حنا ثلاث … اخوي الكبير وانا واختي الصغيره …اخوي الكبير يدرس برا ..واختي دايم مع المربيات ……………………..وانا …
الحمد لله ابوي ماقصر علينا بشي … سفر طلعه وناسه هدايا حفلات الماس ذهب اللي نبغيه يتم
بس اللي افتقدناه حنا الثلاثه … هو وجودهم …امي دايم بعزايمها وسفراتها … وابوي بأشغاله واعماله
يعني حتى لابغيت اشوف ابوي لازم احدد معه موعد حتى مايكون مشغول ويتفضى لي
كانت سفراتي وطلعاتي مع صديقاتي او اختي الصغيره او الخدم … واحيانا مع امي
نقص بحياتي شي … ابغى ام …ابو …ابغى حد اتكلم معاه
وجا هذاك اليوم اللي كنت رايحه فيه بيت وحده من خوياتي …كان وقت صلاة المغرب …نزلت عباتي
اب أتوضا بعد ما سألتها في احد بالبيت قالت لاااااا مستحيل … مافي احد حتى حماي لسه بالشرقيه
ماجا هالاسبوع .. وفعلا رحت وشفته بوجههي ..من الصدمه وقفت وهو وقف …. ليما هو راح وانا
طحت على ركبتيني مافيني قوه …جت وتعذرت مسكينه ماتدري انه خلص محاضراته وجا بدري
مرت الايام ..قالت لي بيوم حماي شكله يحبك .. دايم يسألني عنك ….
حماها هذا يصير ولد خالتها وهو اصغر منها ورابي معاهم ….يعني زي اخوها…طبعا يتكلمون في حدود الادب وهي لابسه الحجاب الشرعي ولحد يروح مخه بعيد ….
قالت دايم يسأل عنك …تجاهلت الموضوع ….هو يدرس بالجامعه بالشرقيه…وانا بالرياض برضه بالجامعه وهو اكبر مني بسنه…
كل يوم اشوفها تقول فلان زهقني يسأل عنك .. وانا اتجاهل …ليما ذاك اليوم شفت مسج بجوالي
مسج رقيق وحلو ومن رقم غريب … وظلينا كم يوم مسجات وانا مدري مين واحقر …
وجت الصدمه …ارسل لي ( عجبتيني …. انا تركي…اخذت الرقم من جوال فلانه ) بنسميه تركي انا طاح قلبي…
طبعا هزأت البنت وحلفت انها ماتدري وقالت لي حقريه ماعليك منه

ما اطول عليكم …
مرت الايام وهو مايرسل ….ولا يتصل ….يمكن كنت حزتها مفتقدته ..مدري… او مفتقده ان احد يهتم فيني ….
جا عيد ميلادي ال 19 … توقعت احد يهتم من بيتنا امي ابوي اي احد لكن مافي …
ماكنت ابغى حفله ولا هدايا بس ابغى امي وابوي ….جا السايق معاه هديه من ابوي ساعه من اغلى الماركات …وش اسوي فيها ؟؟وامي مدري كانت بأي حفله ….
وجتني رساله رقيقه من تركي…( كل عام وانتي بخير يا كل هالدنيا )طبعا درى من بنت خالته مسجله تواريخ ميلاد الشله في التقويم حقها …
حبيت الرساله …وحبيت هالاهتمام …. وبدون ماادري دقيت عليه ….دقيت دقه وسكرت من الخوف ..
شوي ودق …..تعرفنا على بعض….مع الايام حبيته ..غصب عني حبيته …الا مت فيه …كنا نعشق بعض بجنوووووووون …والله ماتصدقون …كان يخاف علي من نسمة الهوا …اذا يوم مر بدون ما نسمع صوت بعض مرتين ثلاث مرات باليوم ننجن …..كان حبنا خيااااااااااالي …
هو بعد من عايله عريقه ولها اسمها ….امه كانت الكل بالكل وابوه كان مجرد تسجيل حضور بحياتهم
يعني ماعاش الحنان ….

عوضنا عن بعض كل الحنان …وصرنا نفهم بعض من كلمه ….واحيانا قبل لا يكمل تركي الكلمه اكملها انا والعكس ..
وصرت اسعد انسانه بهالدنياااااا ..دوم فرحانه دوم مبتهجه ..ماهمني ابوي شفته والالا امي جت والا لا …اهم شي حبيبي….كان بنظري حيبيبي غيييييييييييييييييييير ..

قال لي ابغى اخطبك ….قلت اصبر شوي …بس نخلص جامعه ونتفق لان اهلك ماراح يرضون اكيد وانا بعد ابغى اكمل دراستي….اتفقنا على كذا …
انا ولله الحمد جميله وخطابي كثير كان لما يجي احد يخطبني….تجيني حالة قئ ورعشه ماتروح الا اذا ردهم ابوي…اذا علمت حبيبي ان جاووني خطاب..كان حبيبي يبكي ويحلف مااروح لغيره …وكنت كل مره اوعده اني له ومااكون لغيره مهما كان ……..ماكان في طلعات او خلوات بينا ولا كان هو يطلب ….كنت اشوفه من بعيد لبعيد بسوق والا كافي شوب والا مكان مفتوح ….من بعيد لبعيد بس….يحاكيني بقلبه واحاكيه بعيني …..

مرت الايام وحبنا يزييييييد ماينقص ولا يهتز ….
كنت اذا سمعت عن وحده خانها حبيبها اقول ( هه حبيبي غير )
او اذا سمعت د فوزيه الدريع تقول ( الرجال عنده الف عذر وعذر بس علشان مايتزوج البنت اللي متعرف عليها ) اقول ( بس احنا حبنا غير ) وصدقت ان حبنا غيييييييييير

ومرت السنين بسرعه وتخرج …. قلت له وصارحته …انت تخرجت وانا ابوي يلح علي اتزوج لسه تبغاني ؟…قال طبعا …برسل الوالده وخالاتي يتعرفون عليكم اول بحجة انك خوية مرت اخوي …
وجاو …غرووووور وتكبر …عاملتهم بكل ذوق وادب ….جا مع الحكي طاري الزواج …امه سمعتها تقول ( انا مستحيل ازوج اولادي وحده مو مقتنعين فيها …اهم شي سعادته ) انبسطت انا من ذا الحكي وتبشرت خير ….
علمته ….

رد علي ثاني يوم …يقول قال لامه وش رايك بالبنت ؟ ( اللي هي انا ) قالت ( جميله وعلى مستوى بس ماتصلح لك ) طبعا انهرت وبكيت….وبعدها انقطعت علاقتي ببنت خالته ..
مع الايام كاني قول لي ان في امل …وانه يلح على امه …وانه يحاول …بس امه ترفض …وانه اعترف لهم انه يحبني وابوه تنوم بالمستشفى وغيره كلام كثييييييييييير واصدقه
واحيانا يقول لي ان امه جايبه له عروس….كنت والله اعيش حالات الموت والاحتضار لما يقول لي ذا الكلام …
طبعا كنت اصدقه واعتبره ( غييييييييييييير ) لانه كان يبكي لي ويحلف انه يبغاني ويحبني وماراح يتخلى عني …وانا اصدقه واصبر ….مرت الايام على ذا الموال ….
و بليله سودا ….كان مر على تعارفنا سبع سنوات ….كلمني وهو يبكي …يقول ان بكره عقده
بكره بيملك ….انا اللي اذكره اني طحت ومادريت بشي الا انا بالمستشفى ….انهرت ….مابقى شي فيني مايقول آآآآآآآآآآآآهـ …رحمتك يارب ….
طلعت بعد ثلاث ايام والكل من حولي كان مستغرب وش فيني ؟
وانا بس ابكي وابكي وارفض كل شي….
ابوي هنا حن علي ….قال اوديك جوله حول العالم ..اغير لك جوك …اسوي لك حفله …لوتبين لبن العصفور بجيبه لك بس انتي امري …قولي لي وش فيك ؟؟
كنت ماارد بس ابكي واقول اطلعو بره ..خلوني بغرفتي …
بعد اسبوع كلمني ورديت ….ليه؟؟ليه ياتركي تسوي فيني كذا ؟؟؟مو حرام عليك ؟؟مو انا حبيبتك ؟؟
قال ( حبيبتي لا تشيلين هم …انا مابخليها عندي…بس كم اسبوع واتركها ..انا اكرهها واحبك انتي…انا وانتي لبعض …انا مسوي ذي الحركه بس علشان أأدبهم وبتركها وبتشوفين )
ولاني كنت منهاره صدقته …ولأني كنت احبه صدقته …ولأني كنت ابغاه بعد صدقته ….
مرت الايام وانا اراجع نفسي …
البنت وش ذنبها ؟يطلقها ليه ؟
كلمته …( حبيبي انا فكرت …البنت مالها ذنب في حبنا …الله يسهل لك ويسهل لي )…صعب علي طبعا اقول هالكلام بس الموضوع صار وانتهينا …وحرام نظلمها ….
كان يقول لااااااااااااااا مستحيل انا لك وانتي لي …..
( قلت طيب ….اجل ماراح اكلمك ولا تكلمني الا لما تطلقها وتجي تخطبني …)
يمكن قلبي كان حاس ….
ظل يوميا يتصل ويرسل مسجات وايميلات احبك وابغاك وذا الكلام ….كان قلبي يتقطع بس لازم يصير حل ….بيوم ارسل لي ( طلقتها …ردي علي ) ارسلت له ( باب بيتنا مفتوح حياك اخطبني)قال( اصبري علي شوي ) قلت ( اوك بس ليما ذاك الوقت مافي مكالمات )

مرت الشهور وهو يحاول يرجع …
قسم بالله بنات كنت اشوفه الساعه 3 الفجر من نافذة غرفتي بس يناظر ….
كنت اذا اروح المعهد ( دخلت معهد تجميل ) اشوفه بالسياره يلحقني
كان يرسل لي هدايا وورد ورسايل مع الحارس حقنا …….
كنت اموت لما اشوف الدمعه بعينه من بعيد ……
وكل يوم يرسل( طلقتها حبيبتي رجعي لي) وانا حدي اني اضم قلبي بين يديني واكتم الغصه واصبر
صار بعدين يلح ( انتي خاينه ..انتي كذابه ماتحبيني…انتي وانتي …طلقتها علشانك ..الخ )
مرت الايام وجا ذو الحجه قبل اللي راح ….فقدت مسجاته ورسايله …غريبه مو عوايده ..كان قلبي ناغزني في شي…والله خفت عليه وينه …بس قلت مستحيل اتصل …..
بعدين ارسل لي ( رحت الحج ودعيت رب العالمين يجمعنا …. للحين احبك ومقدر انساك )
يحليلي بريئه …انبسطت وقلت بقلبي راح يحج بعد عمري( الله يجمعنا ياااااااااارب )
بعد يومين من مسجه جاووني خطاب …ابوي يلح بقوه ..وامي تحن علي ….انا بين نارين…نار قلبي ونار اهلي ….للحين احبه وش اسوي……
احترت وبكيت كثير..وبعد الاستخاره وافقت على اللي خاطبني …بشرط واحد …
ما نملك الا بعد 5 شهور ….كنت اقول لنفسي بعطي حبيبي فرصه ..واذا تقدم لي حبيبي بقول للولد الله معك …
تفكير سطحي وسخيف …..
درى حبيبي وطارت زيرانه …جن جنونه ….كيف تتركيني وانا اللي طلقت خطيبتي علشانك ؟
كيف تروحين لواحد غيري …؟؟؟ كيف ؟ وكيف ؟؟؟؟
قلت له لسه الفرصه قدامك ( هذا كله بإيميلات ) ….قال استنيني …..
مرت الايام يابنات ….وجا جمادى اللي فات ….وماجا حبيبي….وبيوم جاني ابوي وقال لي العقد الخميس الجاي …..قمت ابكي من القهر ..وش اسوي ….؟؟خلاص ماابغى اتزوج ….ماابغاااااااااااااااااااااهـ صاح ابوي بوجهي ( الزواج لعبه يابنت ؟انتي وافقتي من قبل وعطينا الرجال كلمه وترى مايعيبه شي) ابوي كان يعتقد انه بالزواج راح ترتاح نفسيتي ويهتم فيني زوجي ويعوضني عن غيابه هو وامي ….
وصار الخميس ….
لبست الفستان اللي من اشهر المصممين ….اشترطت ان الملكه تكون بقصرنا …مابغى زحمه ..ماابغى شي زايد عن الحد ..كل شي ابغاه عالضيق ويتم بسرعه ….ابغى ارجع غرفتي بسرعه ماابغى اجلس مع الانسان اللي بيصير زوجي ….
اذكر يوم امي تناديني ( يلا ياعروس المعازيم تستناك ) اذكر صوت الدفوف ..اذكر تهاليل امي وخالاتي وخوياتي ….
حضنت خويتي المقربه قبل لا انزل وطاحت مني دمعه ….قلت لها ( تمنيت هالليله غير … تمنيته يكون حبيبي مو احد ثاني) قالت لي ( ادري يالغلا … وترى حبيبك شفته بسيارته برى القصر)
نزلت وانا كني نازله لساحة اعدامي …..كئيبه ..حزينه ..مكسوره ….افكر بحبيبي وبس ..وش حاله الحين ؟ …كيف تلقى الخبر؟ …ياترى اخبار قلبه ؟
جلست ودخل خطيبي بعدين وهو متشقق وتمت الاحداث بسرعه ….حتى ان بس فضى المكان سويت نفسي تعبانه وفيني نوم وابغى ارتاح ..مسكين حس وراح بيتهم ….
هالكلام كان يوم خميس …..
يوم السبت من القهر رحت المعهد ابغى اسلى …..
عرفت ان في بنت جديده جايه تدرس معنا …..يامحاسن الصدف…..عايلتها نفس اسم عايلة حبيبي
هذا اللي كان ناقصني ….حبابه بس حقدت عليها ……حسيتها اجتماعيه تبغى تتعرف عالكل …….
جيت جنبها وانا ابغى اكلها بأسناني…
دار بينا هالحوار …..بنسميها العنود

انا .. هلا
العنود ..هلا والله
انا : جديده اجل ؟
العنود : يس زهقت من جلسة البيت وذا المعهد ماشاء الله على مستوى قلت اتسلى
انا : انتي من بيت فلان ؟
العنود : ايوه .. تعرفين احد منهم ؟
انا ( وبتكهم ) : ايوه كنت … كنت اعرف فلانه ( بنت خالة حبيبي ) مدري اذا تعرفينها والا لا ؟
العنود : بالله ؟….اي ذول يقربون لنا من بعيد يعني مو عيال عم درجه اولى بس امي وابوي متواصلين معاهم
انا : ايوه ايوه انا رحت زواج فلانه مره كان حلو
العنود : ايوه اذكر..انا مارحت كنت مسافره بس حضرت زواج حميانها قبل كم شهر
انا : ايوه ..تقصدين خالد ؟ ….لان تركي سمعت انه فسخ خطوبته
العنود : لا اقصد خالد وتركي برضه
انا وبثقه : هه لا مستحيل انا اللي اعرفه انه فسخ خطوبته
العنود : الا متأكده حتى اخوي ماخذ جوالي ومصور معهم بالزواج لانه يعرفهم عدل ولان جواله كان انسرق بنفس اليوم وانا كذا كذا بتركه علشان تفتيش الجوالات
انا : اتحداك …
العنود : شفيك ؟ ليه التحدي ؟ …. حتى الصوره عندي للحين شوفيها

شفت الصورهـ …
آآآآآآآآهـ يا يمه
آآآآآهـ ياقلبي

شفتك ….وربي شفتك
ناس وبشت يلفك
وابتسامه … نامت بفرحه بشفاتك
مبرووووك
مبرووووووووك
مبروووووووووووووك
ألف مبروك التخرج وبشرف
إيه دكتور بعيوني بس دكتور بالخيانه
( تستحقه وبقرف )
تعتقد هذي رجوله ؟!
والا تنطقها بطوله ؟
وللأسف نسلك أصوله من نباله ومن شرف

آآآآآآآهـ ياقلبي
ظليت يمكن 3 دقايق كامله اناظر بالصوره وهي تناديني وانا مو حاسه
هذا هو
نفس الطول
نفس الحلا
نفس الابتسامه
نفس النظره
ياترى ليه هالابتسامه ؟
مبسوط ؟
ياترى كلامك وين كان

ياترى قلبك وين راح ؟
فكرت فيني قبل لا تسوي كذا ؟
ليه؟ لييييييييييييييييييييييه بس؟؟
ألف سؤال وسؤال يدور ببالي وأولهم لييييييييييييييييييييه ؟

لما شفت اني ممكن انهار بأي لحظه رميت الجوال عليها وتماسكت اعصابي وقمت
قمت بكل شموخ واخذت عباتي وبدون مااتكلم نزلت وركبت السياره مع السواق وقلت له
روح البيت ….
البيت فاضي كالعاده ….دخلت غرفتي وسويت مناحه فيها ….
كني ام وفاقده ولدها …..حسيت بكل خليه بجسمي تنهاااااااااااااااااار
على اني الحين على ذمة رجال ثاني … بس آآآآهـ ….هذي احلى هديه اهدانياها حبيبي بمناسبة عقدي
ليه اجل ماخليتني اكمل حياتي؟؟؟ليه تلاحقني؟ليه اقلقتني؟؟خليتني اسيره لك …حرااااااام عليك
كنت اهذي بروحي ….شفت غصة الموت تخنقني …….
زحفت للجوال ودقيت رقم بنت خالته ….فتره طووووويله ماكلمتها بس كنت ابغى اتأكد ….
ردت علي.. ( هلا فلانه )
انا : ( مها تكفين قولي لي … صحيح ذا الحكي؟ )
( اي حكي)
( تركي تزوج ؟ )
سكوووووووووت
( يرحم والدينك قولي قبل لا اموت )
( ايوه تزوج …..بعيد الاضحى اللي فات ) …………………

فعلآ …..
حبيبــــي غييييييييييييييييييييييييييييييير