للي عندها خبرة في اللولب تساعدني انا محتارة

سؤالي عن اللولب

انا يا طويلات العمر بعد ولادتي بأربع شهور رحت اركب لولب

لمن جات تركبه الدكتورة قالتلي في مشكلة جدار الرحم عندك لسه لين وما ينفع اركب اللولب

لانه ممكن يدخل اكتر وبعدين تحتاجي عملية ومنظار عشان يخرج

قلتلها انا رحت عند دكتورة ثانية وكشفت وقالت لي الحمد لله الرحم طبيعي ورجع لوضعه

قالت ايوا طبيعي حجمه وكل شي لكن جداره لين وهذه حاله طبيعية لكن اللولب غير ممكن دحين

قالتلي تعالي لي بعد 3 شهور يمكن الوضع يصير طبيعي

واعطتني حبوب جينيرا استخدمها

استخدمت الحبوب شهر وجننتي وجابت لي آلام في صدري وتركتها

وكمان انا ارضع وما ابغى الحبوب لانها ممكن تنشف الحليب

سؤالي

مين صادفتها نفس حالتي؟؟

لاني انا دحين ابغى ارجع اركبه عند دكتورة اسمها ميرفت فاضل في الصفوة في مكة واستغربت من حكاية

جدار الرحم وقالتلي حتعطيني حبوب تنزل لي الدورة وبعدها حتركب لي هوا

طبعا انا ماني عارفة ليش استغربت ما اابغاها تركبه وهو ما يناسبني لان اللي قالت لي في الاول انه ما يتاسبني

د. سحر في فقيه و احس انها فاهمة.

وعشان برضع ما بتجيني دورة وعلى اساسها ما اقدر استخدم طريقة الجدول. واللصق أفتوا انه ما يجوز بسبب الغسل

وانه في طرق غيره ممكنه لمنع الحمل

والله احترت وتعبت وانا افكر في هذا الموضوع

واحس انه ممكن اللولب ما يناسبني عشان ضهري يتعب لمن اشيل اي شي شوية ثقيل او اقوم بمجهود

اتفاعلوا معاي الله يسعدكم.