عالم البنات النسائي كل ما يخص المرأة العربية من ازياء وجمال والحياة الزوجية والمطبخ
أهلين حبايبي بصراحه انا جديده بينكم
بس شدني موضوع الخيانه الزوجيه وحواراتكم الرائعه
أنا أنسانه متزوجه صار لي تقريبا 10 شهور وألى الان لم انجب أطفال
اكتشفت ان زوجي بعد ماتملكنا انه يكلم كذا وحده
وكنت خلاص ابي الطلاق وهو لسه ماتم الزواج بشكل رسمي مجرد ورق وعقد فقط
وكان يكذب كالعاده
المهم قلت بعطيه فرصه
تزوجنا ومازلت احس انه يخون وعرفت البنت نفسها طلعت وحده مطلقه ولديها ولد وكلمتها وقالت لي انا ماراح ادخل حياتك واللي ماارضاه لنفسي ماارضاه لبنات الناس
المهم صدقتها وشكرتها انها ماراح توقف بدربي
وفجأه بعد العشره شهور
شكيت برقم كان يجيه بشكل مستمر
وكان عندي فضول اني اعرف مين كان يقول لي هذا واحد حق شغل
وبس
ومره كنت ادق على زوجي وكان خطه مشغول وقلت له مين معك قال هذا نفس الرجال اللي قلت لك
و انا كنت حافظه الرقم فبالي
من كثر الاتصالات اللي اشوفها بجوال زوجي
المهم دقيت ورد نفس الصوت والبحه هي نفسها قلت انتي نفسك اللي كذبتي علي وعلطول تحسبت عليها وسكرت السماعه بوجهي
انقهرت حسيت اني مخدوعه
حسيت اني غبيه
ورحت دقيت عليه واتهاوشت وياه وانكر انها بنت قال انها ولد
وهي بعد الحقيره
انكرت انها نفس البنت بس وربي انا اعرفها واعرف اسلوبها
وماني غبيه
وصار خلاف قوي جدا
وانا الان فبيت اهلي
وهو حتى مافكر يجي ويراضيني
وحاول انه يكذب على اهلي
بس اهلي نفسهم دقو على البنت وردت بكل وقاحه وسكرت بوجيههم
يعني بجد انا مقهوووره
وللمعلوميه مو اول مره يخون كم مره يقول لي انسي وانا احاول اعطيه فرصه وعطيته زياده فوق ماتتصورون
ورغم كل هذا احبه
بس جواتي انا انسانه مجروحه
لان البنت حقيره وعدتني انها ماتكلمه وبالنهايه طلعت انا المخدوعه
بالله وش تنصحوني فيه خواتي وربي انا قاعده اعيش حالة قهر
لاني بجد ماقصرت بحقه وهو بنفسه يقول لي انتي ماعمرك قصرتي بحقي بشي
واللي قهرني اكثر انه مادق يعتذر مسوي الحق معه زعلان اني انا اخذت الرقم من جواله
وللحين مصر على كذبه انه رجال مو حرمه
بس انا كشفته وربي فوقه
وحسبي الله عليها وعلى كل وحده واقفه بدربي
ابيي ردودكم بالله
أختكم
مجروحه بس أكابر
