عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
كيف حالكم إن شاء الله بخير ؟؟
الحمد لله على السلامة للي ولدوا والله يسهل على الحوامل
الحمد لله ولدت يوم الأثنين تاريخ : 14 11 1430 هـ
آخر أسبوع في الثامن جاني طلق خفيف والرحم فاتح 1:30 سم وفي بداية التاسع الطلق يزيد بس الرحم ما ينفتح وضليت على كذا إلى يوم السبت تاريخ : 12 11 جاني ألم قوي وقالوا لي مفتوح 2 سم ورجعت البيت هذا الكلام كان العصر وبالليل الألم زاد ورجعت المستشفى وقالوا لي نفس الكلام 2 سم وقالوا لي تنويم لأنه نزل عندي دم خفيف مع إفرازات وقلت لهم لا ما أبغى قالوا لي خلاص رجعي البيت وإذا زاد عندك الألم أو نزل مويه تعالي رجعت بيت أمي وأمي ما قصرت بعد عمري بخرتني بعود وزاد الألم وقمت شربت مويه وعسل الألم زاد أكثر وصار الألم كله في فخوذي وظهري رحت المستشفى وكشفت قالت 2 سم خلاص تحطمت وضليت تنومت والألم يزيد ويزيد بس الرحم ما ينفتح ضليت على هذا الحال يوم السبت والأحد وأنا أطلق والرحم ما ينفتح وأكلت تمر وزاد الألم بس ما ينفتح ويوم الأثنين الفجر نزل عندي مويه خفيفه وكشفت علي قالت فاتح 3 سم وجات لي الدكتورة وقالت راح نعطيك طلق صناعي قلت الحمد لله واخيرا راح افتك ونزلوا غرفة الملاحظة الساعه 12 الظهر وحطوا علي التخطيط والمغذي وأنا كل هالوقت أطلق بس الرحم ما ينفتح وحطوا لي أبره طلق في المغذي وأنا الألم زاد أكثر جات كشفت قالت 3 سم وفتحت المويه والألم زاد ناديتها كشفت قالت 4 سم وكل هالألم والجهاز يبين أنه الطلق خفيف وضليت لحد الساعه 1:30 وبعدها قمت أصرخ قالت لي الممرضه ماما انتي ما فيه ألم قوي عشان تصرخين جات كشفت قالت ما شاء الله 7 سم قلت الحمد لله واللي كانوا معاي من الممرضات الله يجزاها خير ويفتحها في وجهم وين ما يروحون قالوا لي أذكري الله هانت ما بقى شيء ضليت نص ساعه قالوا لي انفتح 8 سم وبعد 5 دقايق انفتح تسع ونص وودوني غرفة الولادة وأنا كنت أصرخ وأدفع من قوة الألم ووصلت غرفة الولادة والرأس طلع شوي وقالت لي كل ما جاتك الطلقه دفعي وأنا من الألم قمت أسكر رجولي وجاوا ثنتين ومسكوا رجولي وصرت كل ما جات الطلقه ادفع بكل قوتي واهم يقولون لي يلا هذا الرأس طلع دفعي أقوى وأنا أقول لهم خلاص ما أقدر بموت قالوا لي يلا آخر مرة ودفعت بأقوى ما عندي وطلع بعد قلبي حمودي حبيبي وسمعت صياحه ونست كل التعب والمعاناه اللي دامت 3 أيام وطلعت المشيمة وقالت لي الدكتورة ما تحسين بشيء قلت لها لا شنو قالت ما سوينا لك جراحه استانست واجد بس جاني بعد الولادة نزيف وظليت تحت المراقبه مدة 4 ساعات
والحمد لله تمت الولادة بأحلى حمد يوم الأثنين تاريخ : 14 11 1430 هـ الساعه : 2:40 الظهر
والله يخليه ويخلي أخوه ويعيننا على تربيتهم التربية الصالحه
وعذرا على الإطاله
والله يسهل على الجميع
