أخواتي ساعدوني ..أبي أشياء تجيب الطلق

أخواتي الغاليات الكروشات أتمنى تساعدوني ..أنا حامل بطفلي الثاني وباقي لي 3 أيام على موعد ولادتي
طفلي الاول جبته بعمليه تأخرت عن موعد ولادتي اسبوعين كامله وعقب رحت للمستشفى وسوو لي طلق صناعي ومع ان الرحم فتح 7 سم بس سووا لي عمليه لان البيبي بدا يتعب ونبضه ضعف

هالحمل كان كل شي اوكي وكانت الدكتوره متفائله بولادتي طبيعي وحتى كانت تقولي مابتتاخرين ان شاءالله هذاك لانك بكريه والجنين كان حجمه كبير شوي بس من دخلت التاسع تغير الكلام 😛

الاسبوع اللي طاف كان عندي موعد وقالتلي البيبي وايد فوق كأنك مو آخر التاسع وبدت تقولي يمكن يكون عندك ضيق بسيط في الحوض وهذا الحين يعتمد على حجم البيبي وطلبت لي صوره عشان تتأكد من حجم الجنين وبتاخذ قياسات الحوض

أمس كان موعدي وسويت الصوره قالت الوضع ان شاءالله اوكي بس بعده وايد مرتفع والرحم مافتح ابدا والحين موعدك بعد 3 ايام وبعطيك عقبها 10 ايام بس لازم يجيك طلق طبيعي بهالفتره اذا ماجاك مااقدر اسوي لك صناعي بتجين على طول عمليه … أنا انصدمت وقلت ليش ؟!!!

تقول عشان انتي مسويه عمليه قبل والطلق الصناعي اشد بيفتح جرح العمليه وهذا خطر عليك

الحمدلله على كل حال ..والله كل يوم أدعي ربي يسهل علي وعلى كل اخت حامل
و أمشي كل يوم واحاول اسوي تمارين تسهيل الولاده وآكل رطب واشرب ماي زمزم

حبيباتي أبي مساعدتكم أبي شي يفتح الرحم ويجيب الطلق أي شي أشربه أو أتبخر فيه .. بس أبي اللي تكتب تكون جربت مو تقول سمعت لاني كل يوم أسمع عن شي وبعدها اقرا انه غلط أو خطر على البيبي ..

والله يسهل على كل وحده ترد علي ويوفقها ويرزقها باللي في خاطرها