عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمه الله وبركاته
وش اخباركم بنات ؟ ان شا الله كويسين بصراحه صديقتي وقعت في مشكلة , وانا شرت عليها تطرح مشكلتها هنا , وهذي قصتها على لسان نفسها ,,,
السلام عليكم ورحمه الله وبركاته:
مساء الخيرات يا بنات…أنا طحت في مشكله وأبيكم تساعدوني..وتشورون علي..وتحسون فيه وانتم تقرونها..لا تطنشوا موضوعي والله إني بأمس الحاجة لرأيكم..
وهذي سالفتي بالتفصيل الممل:
يمكن تكون حكايتي يليق إنا نسميها(الحب الخفي)..
1- أنا اسمي(نوف)وعندي أخت اسمها(مها) تعرف كل شئ بس تقول مالي دخل باللي يصير لك..
2- (وليد) وهو مضمون القصة وأساسها..
3- (ساره) صديقتي بالجامعة و(مشاعل) بنت خالتها..
يوم كنت صغيره (8)سنوات.. كنا دايم نروح لجده وخصوصا” بيت وليد (9)سنوات.. لان هم قرايبنا من بعيد..المهم وليد حبني(ذاك الحب الطفولي اللي يكبر مع العمر) كبر وليد وكبر حبه لي.. وصار عمري(20)وهو(21) سنه.. دخلت الجامعة.. تعرفت ع ساره.. وبعد أسبوع وقفت عن الجامعة.. بس علاقتي مع ساره استمرت.. وفي يوم من الأيام كنا نتكلم أنا وساره عن الشباب وهبالتهم.. سألتني ساره في احد في بالك..المرة الأولى صرفتها..بس الثانية يوم لزمت علي. قلت: أنا بصراحة ودي أعرف..إذا وليد يحبني أو لا..قالت: من وليد قلت: هذا واحد يقربلي بجده.. وحكيتلها عنه.. قالت:عادي..اسأليه أو كلميه قلت:لا وين صعبه.. وبعدين أنا ما عندي جوال(لأني عزبة) قالت:طلعي من ورا أهلك.. رفضت الفكرة نهائيا”.. وسكرنا ع الموضوع لمدة أسبوع ..وبعدها كلمتني ساره وقالت:جيبي رقمه وأنا اجيبلك أخباره.. طبعا”أعجبتني ألفكره..مادام انه مو أنا اللي بكلمه..ألزبده: عطيتها الرقم كنت جايبته من جوال اخوي لأنه صديقه.. ساره عطت الرقم مشاعل(من هنا تعرفت ع مشاعل).. دقت مشاعل ع وليد ع أساس إنها غلطانه….قالت له:ممكن اكلم ندى..قال:مين انتي..أنا عمها (هو قال كذا لانبنت أخوه اسمها ندى)..من ألخبصه قالت:ندى..قال:يوه نفس الاسم؟!مشاعل ما عندها وقت..علطول قالت:اسمع لا تدق ع هذا الرقم.. أنا بدق من رقم ثاني… وبعد (4)أشهر دقت عليه..وقالت:أنا ندى..تذكرني ..قال:إيه..ودقوها علاقة..ع أساس انو اسمها ندى.. لما كبرت علاقتهم..تعرفت ساره ع صديقه (خالد) لما ساره كانت تكلم خالد كانت كثير تغلط في اسم ندى ..(حبل الكذب قصير)..ومره من المرات سألت مشاعل وليد:في احد بقلبك او قد قابلت بنات؟!..قال:لا.. كيف كلمتك ما ادري!! وحكالها عن اللي بقلبه..ولقينا اللي يهمنا (نوف) وحكالها عني وانه يحبني(كذا عرفت انه يحبني من وأنا صغيره) ويتمنى أكون شريكة حياته.. واستمرت علاقتهم لمدة (6)أشهر..مع شكوكه الكثيرة بأن مشاعل تكون نوف.. وكم مره قال هالشي لمشاعل.. وكان يحلفها بالله بأن تعترف له وانه ما راح يضرها ولا بشي..ويقول:أنا من زمان أدور عليك يا نوف..وأتمنى هاللحظة.. نسيت أقولكم إن مشاعل علمته باسمها الحقيقي وهو مشاعل مو ندى……بعد فتره قلت لها اقطعي العلاقة..خلاص وصلنا لهدفنا أحسن ماننفضح..قالت:طيب بس بالتدريج ……جت الإجازة الصيفية.. سافرت لجده وكنا طول السفرة نبات في بيت أهل وليد… مشاعل الله يهديها خربت الاتفاق…رجعت تحاكي وليد بكثره بالذات لما درت إني عندهم علطول…وطلبته يعترفلي بحبه وهو يقول:أخاف من ردة فعلها….. واستغرب وليد من كثرة اتصالات مشاعل بعد ما قلت…وشكوكه زادت…وصار يراقب تحركاتي في بيتهم ويحاول يشوفني….بس كنت حريصه ما يشوفني… طبعا” في اغلب مكالمات مشاعل ووليد تدق ساره علي…واسمع كل اللي يدور بينهم …وأحيانا” أكون مشغولة اخلي مها تسمع بدالي…أحب أقولكم إن ام مشاعل من النوع الشديد مرره…وجوالها يتفتش بين فتره والثانية… بالإضافة إلى إنها بتنذبح لو تطول بالمكالمات…. المهم…في يوم من الأيام (مازلت في بيت أهل وليد) دقت ساره تقول: الحين مشاعل بتكلم وليد…وقتها كنت مشغولة مع أخت وليد ….عطيت مها تسمع بدالي…طلعت مها الحوش عشان تسمع…(صار موقف ما نحسد عليه) وقت اللي مشاعل تكلم وليد كانت (ام) مشاعل تدخل كل شوي ..فتضطر مشاعل تقفل الخط ..وساره تقفل بعد (يعني مشاعل تنقطع مع وليد وساره مع مها) تكررت الحركة(3) مرات…وليد استغرب من الحركة..تدرون ليش؟!لان وليد يكلم وهو بالسطح ويشوف مها من فوق…(تخيلوا الموقف).. معقوله يقفل هو ومها مع بنفس الوقت…فعلطول قال:لمشاعل انتي مها.. وأنا شايفك من السطح..ودرت مها وهربت لداخل البيت….قال:ليش هربتي يا مها قالت مشاعل:والله إني مو مها ولا نوف…أنا ما اعرفهم …وهو مو مصدق بعد هذا الموقف..حاولت مشاعل تقنعه بس ما أقدرت..قفلت منه مع شكه بالموضوع.. قلت لمشاعل دوري صرفه تخليه يتأكد انك مب نوف او مها…قالت:بحاول… في هالفترة قللت اتصالات وتتعذر بأن أمها مضايقتها ع الجوال..وهي قاعده تدور صرفه وحل للمشكلة…(جاااااء الفرج).. وربي أنقذنا.. وهو إنو مشاعل جتها سفره لجده…خبرت مشاعل وليد إنها راح تجي لجده بتقابله وتثبتله إنها مشاعل مو وحده ثانيه..قال لها: إذا قابلتك ترجع غلاة نوف مثل قبل..بس هي ما راح تقابله بتسوي موقف :وهو بتستغل مرضها(الربو) وهذي التفاصيل:
تحاول مشاعل تثير الربو عندها الين ما تنكتم…وبكذا تروح المستشفى وطوارئ بعد…وتخلي وليد يجي المستشفى ويسال عنها (هي عطته اسمها كامل) ويتأكد إنها كانت بالمستشفى…بس ما راح تقول له إنها دخلت بسبب الربو…عندها سالفة ثانيه…وهي :اتفقت مشاعل مع خويها(فهد) إنها تستخدم رقمه ع أساس انه رقم أخوها واسمعوا وش صار….قبل ما تسافر قالت مشاعل لوليد…راح اترك جوالي عند ساره ..وبتواصل معك عن طريق جوال اخوي (اللي هو جوال فهد)..وانتبه تتصل او ترسل…وتم الاتفاق وسافرت مشاعل لجده …وسوت اللي خططت له.. صارت تكتب الرسالة..وترسلها لفهد وفهد يرسلها لوليد..وآخر رسالة كانت تخبره فيها عن مكان المقابلة و الموعد…وصلت وليد الرسالة .. وجاء الموعد.. دقت ساره ع وليد وتقول له:لا تروح تقابل مشاعل…ترى مشاعل بالمستشفى أخوها طقها لان مشاعل نست تمسح الرسالة الاخيره وهو قراها …وينتظرك بالمكان اللي متواعدين فيه..وليد سأل ساره في أي مستشفى مشاعل؟!قالت له: انت صاحي ..اللي جاها يكفيها…(مشعل صدق دخلت المستشفى بس من كتمه.. وعند وليد من طق أخوها)…بعد كم ساعة دقت مشاعل ع وليد من المستشفى .. وقالت نفس اللي قالته ساره..بس هي علمته بالمستشفى..قال لها: الحين جايك.. قالت: ماله داعي شوي وبطلع..وسكرت منه..بس هو يبي بتأكد..راح للمستشفى.. وسأل عنها.. وقالوا له:إنها طلعت من شوي…أكيد ودكم تعرفوا كيف عرفنا انه راح للمستشفى؟! هو دق ع ساره وقالها انه راح وسأل عن مشاعل…وبكذا تأكد إن مشاعل مو نوف…وطلعت من السالفة…وبعد السالفة قلت المكالمات مع وليد.. إلى أن انقطعت نهائيا”..بس هو ما انقطع صار يدق كثير..وشاف مشاعل ما ترد. صار يرسل رسائل..كل يوم بنفس الوقت..لمدة شهر تقريبا”…(ترى كل اللي صار لمشاعل مع وليد بجده..أنا كنت بالرياض) ,,,,,جاء عيد الفطر..سافرت لمكة وأنا بالطريق دقت ساره تقول: وليد مرسل رسالة يقول فيها : (تروحيوترجعي بالسلامة.. وعمره مقبولة)هو عرف من اخوي إنا رايحين لمكة..بس مو هذا المهم…المهم كيف يرجع شكه بعد متأكد إن مشاعل مو أنا؟؟!!أكيد مستغربين مثلي..أقولكم وش اللي غير نظرته:
الفضيحة الكبرى..فهد خوي مشاعل غدر فيها…راح ودق ع وليد وقاله أنا مو اخو مشاعل أنا خويها..وهذي لعبة قريبتك…أنا شعوري ما ينوصف..انفضحت فضيحة ع سنع…وتنكدت طول سفرتي…تمنيت الموت ولا تتشوه سمعتي..وهو ما زال يرسل ع جوال مشاعل.. وهي ترسلها لي..ماكانت تهديد..بالعكس..كان يقول فيها:أنا احبك يا نوف..وأبي أتزوجك..أكيد تقولوا لعاب مثل كل الشباب..بس أنا تأكدت من كلامه…اخته تقولي كل شي..حتى إنها خبرتني انه مرض..وصار عصبي..مايطيق مخلوق..وسفروه يغير جو..ولما رجع قال لامه: أبي أتزوج نوف ..وكل مرره يسألها عني..(لعلمكم اخته ما تدري ليش مرض.. وليش حالته صارت كذا)..ورسايله مازالت تجيني كل يوم ..لين مره قلت لمشاعل:ارسليله رسالة..خبريه انك صديقتي..واني ما كلمته ابد..رد برسالة يقول:ادري انك ماكلمتيني..بس ردي..تتزوجيني يا نوف؟؟ أنا احبك..(وأنا أحبه..بس خايفه اندم)
“أوافق ولا ارفض“
&&&&&&&&&&&&
,,,والحين يجي دوركم ..أتمنى تتفاعلون معي..والله اكتب وأنا كلي حيره … الله يسامحني … ويتوب علي … وعلى جميع المسلمين,,,
****آآآآآآآآآآآآآآمين****
