عالم البنات النسائي كل ما يخص المرأة العربية من ازياء وجمال والحياة الزوجية والمطبخ
كل عام وانتم بخير بمناسبة قرب حلول شهر رمضان المبارك
أعاده الله عليكم بالخير واليمن والبركات
ونسأل الله ان يبلغنا رمضان ويبارك لنا فيما تبقى من شعبان
وأن يجعلنا من المرحومين والمغفورين لهم والمعتوقين من النار في هذا الشهر الكريم
•·.·`¯°·.·•(مائدةملوكة الرمضانية….. اتفضلو كل يوم عزومة … متجدد)•·.·°¯`·.·•
ان شاء الله يا حبيباتي في هذا الشهر الكريم
سأدعوكم في هذا الموضوع كل يوم على عزومة من مائدتي
ويارب تنال رضاكم
في البداية
وقبل العزومات احب اعرض عليكم
استعداداتي المتواضعة لهذا الشهر الكريم
لتوفير الوقت والجهد والتفرغ للعبادات
ويارب تعجبكم
نبدأ
اولا السمبوسة
جبت 3 باكيت سمبوسة السنبلة
وعملت 4 انواع من الحشوات
الاولى((عصاج))
لحمة مفرومة معصجة عادية بس ضفت لها شوية قرفة
وطبعا صفتها من الزيت والمية كويس بعد ما عصجتها
الثانية((جبنة وزيتون))
جبنة كرافت وطحنتها في الكبة مع زيتون اخضر
الثالثة
فراخ مع الخضار
طريقتها
شوحت بصلة وشوية زنجبيل مفروم في شوية زيت
ضفت عليها ربع كيلو فراخ بانية بعد ما فرمتها في الكبة
وضفت بهارات( كركم وكاري وبابريكا وفلفل اسود وملح وشطة )
ضفت نص كيس بسلة بالجزر وشوية مية وسبتهم لحد ما استوت
الرابعة
جمبري
الطريقة
شوحت بصل وتوم وزنجبيل مفرومين في شوية زيت
ضفت الجزر المقطع
ضفت فلفل اخضر واحمر مقطع
ضفت الجمبري وبشر ليمونة وعصيرها وبهارات سمك وكمون وملح
وفضلت اقلب لحد ما شربت كل المية واستوت
طريقة لف السمبوسة
نفردها ونحط شوية من الحشو
نتني الطرف على شكل مثلث
ونتني تاني مثلث
وهكذا لحد ما تخلص المهم في الاخر تفضل حتة ادخلها جواها واقفلها زي الظرف
عشان متفتحش في القلي وما احتجش اني الزقها ببيض او نشا
بعد ما خلصتها كلها جبت اكياس وستيكرز عشان اكتب على كل كيس نوع الحشو
وحطتهم في الفريزر
ثانيا الكبة
المقادير
***كيلو برغل اسمر ناعم
***نص كيلو لحم احمر خالص
***من كيلو لكيلو ونص لحمة معصجة للحشو مضاف لها قرفة ومتصفية
ولو تحبي تضيفي لها دبس رمان وسماق
او مكسرات
****ملح وبهارات الكبة(السبع بهارات)
او ممكن الاستعاضة عنهم ب( قرفة وكمون وبهار لحمة وفلفل اسود)
***معلقتين كبار نشا
الطريقة
ننقع البرغل لمدة نص ساعة ونصفيه ونعصره كويس جدا من المية
نطحن اللحمة ناعم جدا في الكبة
نحط شوية من البرغل في الكبة ونطحنها لحد ما تبطل تلف نحط عليها وهي شغالة حتت من اللحمة
اللي طحناها حتخليها تلف تاني ووتعجن كلها مع بعض ولحد ما نخلص المقدار
نضيف عليه البهارات والنشا
ونعجنها جامد جدا بايدينا وندعكها في قعر الصينية اللي بنعجنها فيه عشان تنعم زيادة
نلفها بالطريقة المعروفة ونحشيها باللحمة المعصجة
ودول شوية حشتهم بالجبنة الكيري حجمهم صغير اد البلحة
نجمدها في صينية في الفريزر
ولما تجمد نحطها في الاكياس
وطبعا سواء في السمبوسة او الكبة بحط 10 قطع في الكيس الواحد بس
ولو عايزة اكتر اطلع كيس تاني
عشان انا في رمضان مش بحب الاكل البايت
فبعمل الاكل بكميات صغيرة واصغر من الطبيعي عشان تتاكل كلها
وكل يوم اعمل صنف جديد
وبالهنا والشفا
تاااااااااابعوني
للموضوع باقية
