عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بسم الله الرحمن الرحيم
أولا البطاقة الشخصية
عمري 18 سانتي متر
طولي 165 كيلو غرام
وزني 60 سنة
صورتي الشخصية تقريبا جذي >>> http://www.ba9bnat.com/vb/images/smilies/NEW3/rakna_bow_200611.gif
=+=+=+=+=+=+=+=+=+=+=+=+
القصة
أمي احملت فيني 8 أشهر ( المفروظ تسعة بس بتعرفون ليش 8 ) و بصراحة مليت ماكو شي في بطنها مجابل 4 جدران ( جدران عضوية ) فقلت خل أطلع أغير جو
قعدت أفكر شلون أطلع و خطرت على بالي فكرة …. فعطيتها فنجر ( إللي اهي الوالدة ) بس ما أدري وين …المهم قامت تصرخ ، و انا بهاللحظة استانست قلت هذا اهو جرس الاستعداد …. يعني حان وقت الاقلاع
بعدها بثلاث ثواني سمعت الوالد يقول للوالدة ( ….) ، تتوقعون اشقال ؟؟
.
.
.
.
قال شي ما يناسب الموقف ” يا ام علي ابي قلاص ماي الله يعافيج ” <<<<< لأن أول مرة مرته تطلق فما يعرف شلون يتصرف
يوم سمعت هالكلام قلت ” هذا شكله مو ناوي يطلعني يبي يحبسني ، ما في إلا ظربة كابتن ماجد هذي بتفك قيدي ” فجربتها و ظبطت ، الوالدة قامت تصرخ بصوت الله لا يوريكم اياه ، حتى الجيران قفلو كل بيبانهم حسبالم صفارة انذار <<< اي بعد ارواحهم غالية
المهم بعدها ابوي ركب الموستنج ماله <<<< عرفته من صوته جنه قنبلة يدوية
شغل الموستنج و طار بطريقه لمستشفى الولادة ……….. لكن بعد دقيقتين استوعب انه نسى الوالدة في البيت فرجع ياخذها
ركبها و طار مرة ثانية … اتذكر كانت سرعته اذا ما خاب ظني 512 كيلو / ساعة <<<<< مع ان السيارة حدها 240 بس الوالد ارادته قوية فوصلها 512 ، لا تسأل اشلون
و بالطريق اشوف فلاشات كامرات ( مع اني كنت في بطن امي بس الفلاشات كانت قوية كفاية ) والوالد فاظي يقول لأمي ” قولي جيييييز ” ، انا استانست حسبالي المعجبين يصورون و ناطريني اطلع …
( بعد 10 سنوات اكتشفت بعد التحري وجمع الأدلة انها فلاشات كامرات السرعة بالشارع )
و بنص الطريج … الوالد دعس بريك الله لا يبليكم فيه …. الوالدة ” ليش وقفت يا ريال ؟ ” ….. الوالد ” لقيت فقعة ” …. نزل و اخذ الفقعة على قولته و ركب السيارة و كمل طريجه <<<<<< ما ينلام يحب الفقع لاكن حب من طرف واحد
( ملاحظة : ابوي عقب ما رد البيت بد المستشفى أول شي سواه أكل هالفقعة … لكنه بعد اسبوعين اكتشف انها بطاطة … لكن شلون اكتشف ليلحين ما أدري )
و طبعا هالكلام كله كان الساعة 3 الفجر
و بالسلامة وصلنا مستشفى الولادة … و قبل ما ينزل ابوي و امي … طلع لنا هندي ( لا تسأل من وين طلع ، الله أعلم ) قام يطرق الزجاج و يقول ” بابا غسيل سيارة ” .. الجدير بالذكر ان الوالدة أول ما شافت الهندي اغمي عليها ّّّ>>>> مسكينة ما تنلام هندي لونه ما يساعد والدنيا ظلمه الساعة 3 الفجر ، حسبالها جني
بس الهندي يوم شاف امي اغمي عليها استانس <<<< حسباله اغمي عليها من جماله
المهم ركبو امي على الويل جير و دخلوها … بس الوالد ظل مكانه ، قال ” عندي شغلة بسويها و ارجع “
و احنا بالطريق لغرفة العمليات سمعت الهندي يصرخ و يقول ” لا بابا انا في بجا ” و سمعت صوت عالي يشبه صوت الديناميت لما ينفجر <<<< بس ما أدري شاللي صار بالظبط
المهم دشينا غرفة العمليات و الطبيبة كانت مستانسة .. لأن العملية راح تكون هادية بدون صراخ بعد عملية تخدير الجني ( الهندي ) للوالدة
المهم بدت العملية … و الطبيبة طلعتني و انا كنت ابتسم جذي .http://www.ba9bnat.com/vb/images/smilies/ib/ib(65).gif.. ما مداني آخذ نفس إلا ردتني مرة ثانية … السسترات معصبين يقولون ” لا لا ليش تردينه ” …… الطبيبة ” هذا وايد صغير ما اكتمل نموه لازم يكبر بعدين يطلع ” <<<< أحر ما عندي ابرد ما عندها أنا مختنق و هي تتفلسف ، اطلعت مبتدأة و هذي اول عملية تسويها …. آه يا حظي النحس
المهم السسترات لحقو و طلعوني قبل ما اموت و فعلا كان وزني قليل نسبيا و بالظبط كان وزني 2.5 سنة
و شكلي كان نفس شكل الوالد بالظبط بس بدون لحية و شنب و على اصغر اشوي
المهم
صار اليوم الثاني و الزوار تارسين المكان و انا كل ما افتح عيني اشوف ظروس صفر و براطم جنها أطراف بيدزا فأرجع اسكرها <<<< و ذبحوني من البوس وقتها و اتذكر اني ندمت لأني استعجلت و طلعت بعد ما اكتشفت ان الدنيا ما تسوى
المهم جان فجأة تدش هالطبيبة المبتدئة إللي بغت تذبحني http://www.ba9bnat.com/vb/images/smilies/ib/ib(98).gif، والكل التزم الصمت و اللقطة صارت بتصوير بطيئ …. و كانت ماسكة أوراق بإيدها و خذت نظارتها من الجنطة ولبستها و فتحت الورقة العاشرة على ما اعتقد و قالت ” طلع ذكر ” و بعدها بيوم طردوها من المستشفى
=+=+=+=+=+=+=+=+=+=+=+=+
و هذي قصة ولادتي اللي سادت فيها الأحداث الدرامية
و في الختام أهديكم تحياتي العطرة
على أمل انكم تعطرون الموضوع بتعليقاتكم
