عالم البنات النسائي كل ما يخص المرأة العربية من ازياء وجمال والحياة الزوجية والمطبخ
هذا ضي الصبح ،، او هو بعض نورك .. ؟؟
هذا همس الورد ،، او دافي شعورك .. ؟؟
منهو مثلك في طيبتك في
حلاتك في كامل وصوفك؟؟ ..
//
انعم الله علينا بنعم لاتعد ولاتحصى
كلنا حلوات وكلنا مميزات
ومافيه وحده تقول انا موحلوه او انا فيني وفيني
كل انسان خصه الله بخصله من خصل الجمال
لو فتشتي نفسك راح تلقين ان فيك شي حلو وشي مميز
ميزك الله عن فلانه وعن فلانه اما بجمال وجهك او جسمك او شعرك
ماحسيتي بها النعمه
ان الله اعطاك ميزه عن الغير
بعض البنات ماتحس بهالشي ودائم تتذمر من شكلها الخارجي الله معطاني جمال وانا شينه ومن هالكلام
طيب ياحلوه دامك تشوفين نفسك شينه قد صادفتي بحياتك انسان شكله شين بمعنى الكلمه
وحمدتي ربك ع نعمة ملامحك وجمالك الي اعطكيه
حتى لو كان جمالك بسيط جدا
الجمال الخارجي مو كل شي
اكسبي الناس بجمالك الداخلي وباخلاقك وتعاملك
كم من بنت احرمها الله جمال الشكل لاكن اعطاها الله جمال الروح وكسبت قلوب ملايين من الناس
وكم من بنت اعطاها الله جمال وانحرمت من جمال الروح وكسبت نفور الناس منها
خليك قنوعه ياعمري بمظهرك الخارجي
ماتدرين يمكن مظهرك ذا الي موعاجبك عاجب غيرك
اعرف بنات مو حلوات بس فيهم جاذبيه مجنونه
الناس هم من يشوفونك والناس اذواق
يمكن تكسبين اذواقهم بجمالك العادي والبسيط00
ركزي ع جمالك الروحاني واخلاقك لانها جسر بينك وبين الناس
اذا حاولتي تكسبين الناس اكسبيهم باخلاقك
تميزي باخلاقك ومرحك
خلي لك نكهه بين البنات باخلاقياتك العاليه
مو تقتصرين بس ع جمال نفسك وتتركين اخلاقياتك
طيب وش ينفع لو صرتي حلوه واخلاقك شينه
وش تبي الناس فيك
ودك الناس تحبك ولاتنفر منك
اقتربي للناس بطيبة قلبك وحسن تعاملك وخفة دمك
اصنعي لك ميزه بنفسك تميزك عن الغير
خلي فيك شي مميز
التميز يعطيك شعور ايجابي اتجاه نفسك
ويساعدك ع التطور من نفسك
الى متى وانتي مافيك شي مميز
لو مره حسسي نفسك ان عندك شي مميز
وانا متاكده انك تقدرين تتميزين عن مليون بنت
بس مانتي معطيه نفسك هالاحساس
ولو تفتشين عن نفسك بتلقين اشياء كثيره تقدرين تميزين فيها منتي احسن من غيرك الي ميز نفسه باشياء بسيطه
خليهم يقولون عنك انك مميزه
والله فلانه طالعه مميزه وفلانه صارت تميز بهالشي
//
كوني مميزه باخلاقك
كلنا نملك اخلاق بس تترواح اخلاقنا من العاليه الى الوسط
تخيلي معي يالغاليه00
لو قابلتك وحده تبتسم تسولف وتضحك وتمزح معك
وقابلتك وحده الابتسامه ميته بين شفاياها والسكوت مخيم عليها واذا سولفت مره سواليفها ثقيلها وضحكتها ماتسمعينها الا بعد وش
يعني مررره ثقيله
اي وحده راح تميلين لها وتشعرين بالارتياح لها الاولى او الثانيه
من المعروف الناس ماتحب الانسان الكئيب والثقيل
تحب الانسان الي يشع جو المرح والضحك بينها
انتي يالغاليه وش تحبين الناس تلتقيك بي صوره الاولى او الثانيه
ماتوقع وحده ترضى الناس تشوفها بالصوره الثانيه
كلنا نتمنى نكون بالصوره الاولى واحسن منها
دامك تمنين الناس يشوفونك بهالشي فاعملي له مافيه شي صعب
ابتسمي وسولفي واضحكي
تدرين باخلاقك تاخذين اجر وتفرجين عن مكروبين يمكن ضحكه او ابتسامه منك تدخل ع مكروب السرور
وش يمنعك ماتكونين اخلاق وضحوك مع الناس وش خسرانه
حنا بالدنيا اخذ وعطى اعطيهم حسن الخلق اتركي لك بصمه بالدنيا بحسن اخلاقك وتعاملك مع الغير
شاركي الناس بهمومهم واحزانهم تعاطفي معهم كوني لينه
ابتعدي عن التكبر والغرور
الي ماترضينه ياعمري في اخلاق الناس وتعاملهم لاترضينه في اخلاقك وتعاملك لهم
تميزي عن الغير باخلاقك00
دائما ارسمي الابتسامه ع وجهك فالانسان المبتسم مرغوب عند الناسخلي ابتسامتك تميزك وتقرب الناس منك
الابتسامه ماتكلف منك شي بتعطيك كل شي ولاننسى الابتسامه في وجه اخيك صدقه
حاولي تجالسين الناس والمجتمعات وتسفيدين لاتقولين انا ماحب ماتعودت
عودي نفسك ولازم تصيرين اجتماعيه لان الانسانه الاجتماعيه مرغوبه
خالطي الناس ومازحيهم
ارسمي لنفسك صوره حلوه امام الناس باخلاقك
الى متى بتبقين وحيده او انطوائيه
الوحده والانطوائيه والبعد عن المجتمعات تسبب امراض نفسيه وتورث الحزن
عيشي وعايشي العالم
لاتبخلين ع نفسك من فرص ايجابيه
عن النبي صلى الله عليه وسلم قال: ((أنا زعيم ببيت في أعلى الجنة لمن حسَّن خلقه))
كوني مميزه بجمالك
لاتقولين انا شينه مافي من الجمال شي لا اقتلي هالاحساس وعطي نفسك احساس بانك حلوه واحلى البنات
لاتحطمين نفسك لان التحطيم يقتل ايجابيات داخلك
انا متاكده ان كل وحده فينا فيها خصل من الجمال
وجهها شعرها جسمها طولها
تميزي بجمالك باظهاره
ابرزي جمالك بالمناسبات العامه والخاصه
البسي واكشخي لاتحرمين نفسك من شي
اعرف بنات حلوات من تشوفين وجهها تذكرين الله مليون مره
بس من اطالع فيها اشوفها مخفيه جمالها كله<<ليش خايفه من العين حنا ماذبحنا الا هالافكار ماني كاشخه يعطوني عين ماني لابسه يعطوني عين
والله لو كاتب الله لك عين بتجيك لو انك بيتك
ليش تحرمين نفسك في شي انتي نفسك فيه
ولا ماتكشخ واذا جت المناسبه وشافت العالم كاشخه قالت ياليتني كشخت
تحصني وتوكلي ع ربك وماجاك الا الي كاتبه الله لك
انا ادري من حقك تخافين ع نفسك بس مو هالدرجه
تفنني باظهار جمالك
جمال وجهك اظهريه بطريقة مكياج حلوه ونوعي فيها بين المناسبات
جمال جسمك اظهريه بالبس نوعي في لبسك والبسي اخر صيحات الموضه
جمال روحك اظهريه بضحتك ومزحك وابتسامتك
اظهري جمال اليدين بالاكسسورات والمناكير والاظافر
والنقش
اظهري جمال قدميك باكسسورات الاقدام والخلخال
اظهري جمال شعرك بتسريحات والنعومه والاكسسورات
تميزي بروائح العطورات الجذابه
ميزي جمالك في المكياج واللبس وكل شي
اصنعي لجمالك ميزه
اذا كنتي حلوه والله اعطاك جمال اظهري جمالك بلمساتك وابدعاتك في المكياج واللبس والموضه
اعرف بنات خاليات من الجمال
لاكن جملو انفسهم بالبس واللوك
كم من شينه اخفت معالم الشين فيها بطريقة مكياجها ولبسها
وكم من زينه زادت حلاوتها بكشختها ولمساتها
احزن ع حال بعض المتزوجات الي اعطاها الله جمال بس مو مهتمه في نفسها
وتلفين زوجها متزوج عليها وحده اقل منها جمال بس مهتمه في نفسها ومظهره جمالها بكل الصور
خلي زوجك يكحل عيونه من جمالك
اذا ماتجملتي لزوجك لمن تجملين؟؟؟
تجملي له قبل تجمل له وحده غيرك
لاتموتين خصال الجمال بداخلك اظهريها النفس ع ماتعود عودي نفسك ع البس والكشخات والنظافه وتلقين مايسرك وابتعدي عن الكسل
قابلي الناس بمظهر حسن وبلبس حلو اعكسي لنفسك صوره حلوه امامهم
تميزي باعمالك واشغالك
دائم احرصي ان تكونين سريعه في قضاء اعمالك واشغالك لاتخلين الناس يقولون عنك بطيئه
عودي نفسك ع الحركه السريعه بالشغل
الناس ماتحب البطي
تحب الانسان السريع والعجول في قضاء الاشغال
في تنظيف البيت والطبخ حاولي تكونين سريعه شوي وابتعدي عن الكسل
لاتقولين ماقدر
مافيه بهالدنيا شي ماقدر انتي تعطين نفسك هالاحساس وتموتين قدراتك
لاقولي ان شالله بسوي وبشتغل شجعي من نفسك
وعودي نفسك ع العجله بالشغل مره مرتين راح تضبط معك وتمشي امورك
دائم تميزي باعمالك في طريقة تقديم الطبخ في طريقة استقبالك لضيوفك في طريقة ترتيب المنزل والاثاث
تميزي في طريقة ترتيب غرفة نومك
تميزي في طريقة تريبة اولادك
تميزي في اواني المطبخ
تميزي في نظافة بيتك واولادك ونفسك
انــــــتــــــي مـمـــيــــــزه
ميزي نفسك عن الغير ولاتحصرين نفسك باطار واحد اجعلي من نفسك قواعد التميز
الله ميزك عن الغير بكل شي فيك اشياء ممكن انحرمو منها ناس
لاتقولين وش المميز فيني
لا قولي انا مميزه ازرعي هالاحساس بداخلك
نعم انتي مميزه
لو وهبتي هالاحساس فيك
دائم اذا جيتي بتطلعين او تكشخين قولي لازم الليله اتميز بالحفله
لازم اتميز بطبخي
لازم اتميز بطريقة تعاملي
اصنعي لنفسك ميزه
بلمساتك وابدعاتك
//
اختكم
بنت العتيبي
بنت العتيبي
