عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بسم الله الرحمن الرحيم
السلام عليكم ورحمة الله وبركاته كيفكم ان شاء الله تمامو قلت لنفسي من زمان مانزلت موضوع قلت يابنت وش وراك وعاد اقروالموضوع وابغى ردودكم احر من الجمر ………………… انا ابي منكم في هالموضوع … الاعتراف ولا شيء غير الاعتراف …. وترى عندي جهاز كشف الكذب .. اي وحده تكذب بيلفط بها الكهرب ….!!!! > > ماتدري وشلون الجهاز يشتغل!!
كل وحده منكم تقول لنا شخصيتها وهي صغيره …. وهل تغيرت الصفه هذي لما كبرت والا لا ؟؟!!معروف ان انماط الشخصيات تختلف والسلوكيات حسب الظروف المحيطه وحسب ترتيبك في العائله …
ممكن تكونين الطفله الدلوعه اللي لا احد ياخذ مني شيء واذا خذاه ياوويله ياسواد ليله … وودوني وجيبولي وحطوا لي .. والا ترى بصيح …!!!
وممكن تكونين الطفله الهاديه اللي ما تهشين ولا تنشين .. وخذوا اللي تبون بس وخروا عني …واذا ما احد عطاك وجه ولعب معك تلعبين لحالك ولا عندك مشكله ….
وممكن تكونين البزره الصياحه الحنّانه الرنانه … فاقة ثمك على اللي يسوى واللي ما يسوى ….وممكن تكونين العنيده … اللي متمسكه برايها ولا تغيره لو تنجلد بالخيزرانه … واذا قالت ابي شيء لو من يقنعها تظل متمسكه برايها … وودك تدبجينها مع ظهرها لين تتأدب …
ممكن تكونين الفتانه .. اللي مشتغله وكالة استخبارات على اهل البيت … وماعندك سر .. وياويل اللي تطيحين له في عوره … فلان سوّا وفلانه قالت .. وترى فلانه هي اللي كابه المويه … وعلانه هي اللي طاقة اخوي …!!!
ممكن تكونين العله .. وام الاسئله والاستفسارات .. ليه شريت كذا وليه سويت كذا وليه انتي امي وليه انت ابوي و ليه عطست وليه كحيت ؟؟!!!
ممكن تكونين الداجه في الشوارع وقليل اهلك مايلقونك في البيت مايفوتك شارع ولا سكه ولا بقاله وتعرفين عيال الجيران اكثر من اهلك ….
ممكن تكونين اللزقه .. مايطلع احد الا وانتي ناشبه فيه .. ولا يجي حريم الا وانتي قالطه معهم في المجلس .. تلقين اهلك دايم ينحاشون منك اذا بغوا يطلعون من البيت … مسويه حالة استنفار …
وممكن تكونين الطفله القويه .. اللي البزران يخافون منها ويحسبون لها حساب وياويل اللي يجيها والا يجي اختها … قشراء وينخاف منها
وممكن وممكن وممكن تكونين ماخذه شخصيه ثانيه انا ما ذكرتها … يمكن تكون شخصيتك بعد حلوه …
المهم … حددي لنا انتي كيف كنتي يومك بزر وترى محد شره عليك لو صار فيك عله … خابرين المبزره وحركاتهم ..وهل تغيرتي يوم كبرتي والا لا ؟؟؟
لازم تجاوبون على هالسؤالين مع بعض …..انتظركم بنات وياويل اللي تطلع وتطلع ما ترد …. تراي اشوفكم > > يقطع ام التخويف http://www.b.almoso3h.com/images/smilies/evil.gifhttp://www.b.almoso3h.com/images/smilies/evil.gifhttp://www.b.almoso3h.com/images/smilies/evil.gifhttp://www.b.almoso3h.com/images/smilies/evil.gif
ومع التحيةhttp://www.b.almoso3h.com/images/smilies/543.gif
