عالم البنات النسائي كل ما يخص المرأة العربية من ازياء وجمال والحياة الزوجية والمطبخ
عسسسسل
من بعد غيبه حبيت اسدح هالقصيده
:
/
:
اسلي خاطري واكتب وكني ماشكيـت البـاس
على عين العرب كني سعيـد وطيـبٍ حالـي
وانا لي حول خمس شهور مافارقني الهوجاس
مع الايام مدري ويـش راح وشهـو التالـي
تسريني هجوسي لاسهيـت وصـدو الجـلاس
خذتني بين فرقـاك وخذتنـي بيـن غربالـي
,,
سريت اليل يطويني الضما لك طية القرطـاس
لبست الشوق درع وسرت في دربك ولا ابالـي
وشفتك يالطريق الي وقف بين الامل واليـاس
قريبٍ من عيونـي بـس وصلـك ماتهيالـي
على ذا الحال من يوم الفراق الي قطع الانفاس
وخلاني مجرد صوره وعايش علـى الخالـي
,,
غيابك مثل رمحٍ مارحمنـي والقـدر جسـاس
وروعي مثل روع الزير يوم انه فقـد غالـي
غيابك كثر ما صحى اشتياقي يذبح الاحسـاس
مثل ذبح الاماني في عيونـي لاعتـذر فالـي
كتبتك وأنتهت سهرة غرامك وامتلى الكـراس
كتبتك ياخـوي القلـب فـي حلـي وترحالـي
,,
يبعثرني حنيني كـل ماهـب الهـوى نسنـاس
واطيح من التعب بيني وبينك وابكـي اطلالـي
تبين الشمس وعيوني سهيره ماهتنت بنعـاس
على نار السهر صدري حطب وهمومي دلالـي
خفوقي غصن شوقٍ مال لك والهجر مثل الفاس
ياحطاب الضلوع الغصن من كثر الوله مالـي
,,
اقول اني نسيتك والحقيقـه مالصدقـي سـاس
ياكيف انساك وانت اول غرامي واخـر امالـي
اجامل ولا انا شوقي الشوفك فاق كـل قيـاس
لاتحسب ضحكتي من خاطري واني بها سالـي
تراك اكثر بشر تفهم شعور الشاعر الحسـاس
وتدري ان ضحكتي كذبه وتدري ويش في بالي
,,
همومي وابلٍ ماخف مطـاره وصـدري كـاس
واخاف الهم لايطوي الضلوع ويفضح اقوالـي
اخاف يبين ضعفي لين اشوفه في عيون الناس
واخاف اطيح ولمح طيحتـي بعيـون عذالـي
حبيبك ماتغير عـاده القاسـي قـوي الـراس
يوقف لـو طعونـه موجعـه والغـدر قتالـي
,,
صحيح انه من الفرقا غدى به خفه ووسـواس
وغدى صدره من هموم الزمان الموجعه بالـي
ولكن عاده الـي تذكـره مـآ عزتـه تنـداس
يموت وهو علـى وقفتـه ماهـزوه الانذالـي
على درب الوصل سقت الخطاوي كني العساس
واخاف اطيح فـي نـص الطريـق ولاتهيالـي
الشاعر … سهيل اليماني
