عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بسم الله الرحمن الرحيم
السلام عليكم ورحمه الله وبركاته
(سبحان الله وبحمده .. سبحان الله العظيم)
.
.
.
بنات .. أنا قبل سنتين كنت (دبه) .. يعني ماعلي وصل وزني 67 لطولي المتوسط
وكنت حيل متعقده منه .. يعني أركض ورى النحف مراكض .. ماهنا شي ماسويته وهاتو من الرجيم
لين وصلت مرحله اليأس انه خلاص منيب ناحفه إلا أن يشاء الله
وماسكين علي الأهل شماته .. اتفخهم
ومعقدتهم بالتسوق والملابس مافيه الي يدخل فيني .. واتردد على المحل 10 مرات لين
ألقى القياس المضبوط .. بس كان جسمي بوجه عام حلو يعني ريانه وشعري صحته تمام والحمدلله
مو من كثره بس مو عدم ..
ومع محاولات النحف والتأثر ب بنات التلفزيون والأجسام وصديقاتي الي يلبسون الي يبون
بدون محد يقزز بأجسامهم .. كلها راحت هباءً منثورا
طبعاً .. النحاف بيقولون شي حلو وياحظك وأقول (لا إله إلا الله وماشاء كان ومالم يشأ لم يكن)
ودوام الحال من المحال .. بنات في فتره قصيره جداً ماتعدت الشهر (وأنا موقفه نشاطاتي الرجيميه)
نزلت مايقارب 13 كيلو أو أكثر .. نحفت بطريقه خياليه .. ومريعه (نحف مرضي)
انا بادئاً ما انتبهت لنفسي إلا من ملابسي الي يدخلون أهلي معي فيها .. ولما الناس بدت تسألني .. كيف نحفتي .. أنتِ مريضه ؟
والأهل لاحظو هالشي .. و خلينا نقول هالشي مايحتاج من يلاحظه .. لأنه عيان بيان للكل
طبعاً ماوقف على النحف انا صحتي تغيرت 180 ْ يعني أنقلبت على أعقابها
بعد ماكانت نفسي مفتوحه وأهلي يهزؤني ويقولون خفي .. صرت ما آكل اللقمه مهما كانت ومهما كان نوع الأكل
بديت أشعر بكتمه وغثيان والشحوب بان علي .. وجهي أسمر بطريقه عجيبه وجسمي برضو
وبدت تطلع تهدلات ومخططات النحف على كل شبر من جسمي
غير كذا بدا شعر جسمي يكثر لين صار اكثر من شعر راسي .. ولحد يقول عشان كنتي ممسه والحين نحفتي والتمت
المسامات انا ناحفه من سنتين وكل ماله الشعر يزيد بطريقه عجيبه
اما شعر راسي .. تقصف وطاح بطريقه مهوله لدرجه اني قصيته وانا مطولته وفرحه فيه
والله لايوريكم والشعرتين الي قصيتهم طاحو .. غير كذا احس بحموضه شديده فالفم ومع المضمضه يطلع
سائل اخضر من المعده .. اما اسناني صارت كنها ورق وتتكسر بدون سبب بطريقه خلتني أتأذى و زادت من نفسيتي
يعني مافيه سوس بس تتكسر كذا بشكل عجيب سببت رائحه للفم .. لدرجه أن دكتوره الأسنان ماتدري وش تلحق
أما آلام البطن فخذ وخل احس كأن في انبوب من المرئ الى الأمعاء ساد الأكل وغير كذا وانتم بكرامه
جاني اسهال شي غريب .. ومائل للون الأخضر
غير كذا صايره أبرد بسرعه أول ما أقوم من النوم على طول الدولاب وآخذ أقرب جاكت لين أدفى
هذا الي قدرت أجمعه من ملاحظات على الطاير ولا فيه أشياء تغيرت زود
وسوست بنفسي وما أنلام هالتغير مايبشر بخير .. رحت سويت اختبار لجرثومه المعده والحمدلله طلعت نتايجي سليمه
من كلام الدكاتره هذي حموضه زايده وسببت ألتهاب في جدار المعده وعطوني كم شغله عن الحموضه
قالت لي الدكتوره ضروري تخلصين وتجيني ثاني طبعاً انا طنشت الموضوع
وألحين مدري شسوي ؟ ماودي أتعبث بالمستشفيات ويطلعون بلاوي مهيب فيني ؟
عموماً .. بما أني أحمل جنسيه سعوديه فلا بد أن يروح تفكيري للعين
والله اعلم لأن ناس كثير كانو يتكلمون عني وعن جسمي وصحتي .. خاصه الحريم الي بناتهم نحاف (معصقلات)
واللي يمكن يحسسني باحتماليه هالشي أني لما أقرى القرآن أتثاوب لدرجه أني مقدر ألف الصفحه
أقعد امسح بدموعي ..
ملحوظه : أنا مو متزوجه
بنات الي عندها تجربه أو حل طيب .. تنفعني الله ينفعها بكل طيب .. أبي أسترجع لو شيء بسيط من الي فقدته ..
ما أبي أدويه وعلاجات حبذا تكون ممارسات أو أكلات ووصفات طبيعيه
لان معدتي معد تحمل شي وكل مالها وحالتي تسوء والحمدلله على كل حال
فِ إنتظاركم بِ إذن الله :0108:
