يالعنبوا اللي مايسطرك بنعال رهييييبه

وانا ترى في الحـب مانيـب :: فعّـال ::
ولا بعـد ” ولّـع ” بقلبـي هشيـمـه

ولا بعد غنّيت فـي ساعـة ” وصـال “
ولا بعد ذقـت ” الفـراق ” وجحيمـه

ولا جرى دمعي على الخـد :: همّـال ::
ولابعـد جربـت ” مــرّ ” الهزيـمـه

حتى وردنـي تالـي الليـل :: جـوال ::
وانا على // شاهي ” وبسكـوت ديمـه ” //

الرقم _ بايخ _ لكـن الصـوت _ قتـال_
كنه مثل صـوت المذيعـة ” حليمـه “

قالت : مساء الخير يـا طيّـب الفـالـ
قلـت : ارحبـي ترحيبـةٍ مستديمـه

بالعود ” والصفـري ” ودلـة ” وفنجـال
واجبك يا : بنت الأصـول الكريمـه :

ردتـ بضحكة ثم قالت : وش الحـال ..؟
قلت : اشهد إن الحال عقبك سقيمـه

قالت : وهي تضحك بعد مثل ” الأطفال “
وانـا بعـد كنـي بدونـك ” يتيمـه “

من يـوم قالتهـا : تزلزلـت زلـزال :
من فجعتي كنـي مسـوي :: جريمـة ::

قلت : ارفعي صوتك ترى مابه ” ارسال “
” كـذاب ” لكـنّ المصيبـة عظيمـة

قالت : أقول اسمع ترى هرجنـا طـال
ممكـن تصاحبنـي ترانـي وسيمـه ..؟؟!

واسمي الحقيقي أول حروفـه :: الـدال ::
لكـن يسمّونـي البنـات ” الزعيمـه :

صحيح أحب الفخفخة و : اعشق المال :
لكـن ترانـي : طاهـرة مستقيـمـة :

ما عندي امغازل ولا _لعب يهّـال _
ما عندي إلا في ” الشرف ” و ” الحشيمـة “

بس الصراحة :: قلبي :: لشوفتـك مـال
واصبحت وحدكـ جالسٍ فيـ ::صميمه ::

فكّر بعقلك واترك : القيـل والقـال :
واحذر تطيع اهل : العقـول العقيمـة :

وارسل علي الحين ” خمسميـة ريـال “
أشحن بهـا جـوال أختـي ” غنيمـه “

أو” طقم غالي ” فيه خاتـم وسلسـال
أروح بـه فـي : عـرس ولاّ عزيمـة :

قلت : الحقيقة مانيب رجـل أعمـال
ولآنـي بتاجـر والمـوارد عديـمـة

أنا الصراحة شبـهـ : عطّـال بطّـال:
وعلاقتـي بالفقـر جـداً ” حميـمـة “

والراتب الله : يرحم الحـال : مـا زال
محـدود والمصـروف ربـي :: عليمـه ::

: والدين بـالآلاف : والبنـك شغّـال
ياكـل : فلوسـي بالربـا ” و “الظليمـة :

و” السوق طايح ” والغلا ضيّـق البـال
والموت والله صايـر اكبـر” غنيمـة “

قالت: تحمّل بـس والحمـل ينشـال
خلك شديد الباس : صلـب العزيمـة :

ياخي تصرّف جعلك تصيـر ” نشّـال “
أهـم شـي إن ” النوايـا سليـمـة “

لابد تفهمني علـى كـل الأحـوال
ما دمت من أهل :: العقـول الفهيمـة ::

قلت: إيه والله فاهم اللي على البـال
لكن تـرى هـذي علينـا :: قديمـه ::

يا بنت هـذا صايـر اليـوم مـوال
للي تبي تلعب علـى ” ابـن اللئيمـه “

يا بنت ما تدرين كـم فيـه :: محتـال ::
يلعب على الحبلين وانتـي ” غشيمـة “

يا بنت كم من “جاهلة ” دمعها سـال
من عقب ما جات العواقب ” وخيمـة “

والبنت لا اقفى عرضها بيد :: الأنـذال ::
والله مـا يبقـى لهـا أي قيـمه

قالت : تبي ولاّ فخلّك علـى جـال
مهوب ناقص نصايـح ” حكيمـة “

عز الله إنك منـت برجّـال
وانك : قليل الذوق ما فيـك شيمـة :

// يا لعنبو اللي مـا يسطّـرك ” بنعـال “
حتـى يعلمـك الغزل يابهيمه .. //

:: تفو :: عليك وصكّت الخط في الحال
مدري :: تفو :: هي مدح ولاّ شتيمـه ..؟!!