ولادتي

شلونكم يا حلوات

اسفة اتاخرت عليكم بالقصة بس والله مشغولة وية البيبي و وقتي كله اله 😆 🙂

راح احجيلكم قصة ولادتي من طق طق للسلام عليكم

طبعا اني ولدت يوم 27 – 1 – 2009 وكان موعد ولادتي يوم 15 – 2 – 2009 وما كنت

متوقعة ابدا ان اولد قبل 15-2-2009 لاني بكرية وكل الي يشوفني يقول راح تاخذين كم يوم بعد موعدج يلا تولدين

يوم الاثنين كان يوم كباقي الايام بس كان بي شي مميز *** كان بي مناسبة احتفلنا بيها اني وزوجي

وبيومها رحت للكوافير وقصيت شعري ( واخيرا ) صارلي سنة ونص اتوسل بزوجي اقص شعري وما يخليني وبيوم الاثنين وافق اني اقص شعري ورحت بسرعه للكوافير وقصيت شعري وظبطت حالي 😳 وطلعت كاني عروسة ➡ ….. وخلص يوم الاثنين على خير ونمت

يوم الثلاثاء الساعه 6 ونص الصبح كنا نايمين حسيت برطوبة من تحت فزيت ورحت للحمام وشفت المي تنزل مني بغزارة صحيت زوجي وقلت اله لازم نروح للمستشفى هذه مية الراس

رحنا للمستشفى الساعه سبعة ونص اجت الممرضة فحصتني وتاكدت انها مية الراس وقالت الرحم مفتوح 3 سانتي وانا بهذاك الوقت ما عندي اي الم ما شا ءالله وخلال ساعتين صار الالم يجيني خفيف كل ربع ساعه بعدين صار كل خمس دقايق الالم يروح ويجي بشكل منتظم وانا طول الوقت نايمة على السرير

صارت الساعه عشرة اجت فحصتني قالت 4 سانتي امشي بالمستشفى لمدة ساعتين بعدين تعالي نقيس

رحنا اني وزوجي فطرنا وصارت الساعه 11 صار الالم قوية جدا

قلت لزوجي خلي نرجع الهم بعد ما اكدر الالم كلش قوية رجعنا الهم قالو تحبين نجهز غرفة الولادة الج وانتي منا الى وقت الولادة تكدرين تتمشين او تتحممين او تاخذين جاكوزي قلت الهم اوكي جهزو الغرفة

دخلت الغرفة وصارت الساعه 1 واني الالم ذبحني ما ينوصف احس ظهري يريد ينكسر نصين

قالت الي الممرضة تردين ابرة الظهر قلت الها لا (( لاني سامعة بيها مو زينة وانها اذا تحركت وهم ينطوني اياها راح يصير شلل وما اعرف شنو )) فكنت رافضة الابرة تماما …. بعدين اخذت حمام بمي دافيء حسيت اني صرت احسن وبس طلعت من الحمام زاد الالم اكثر صرخت وقلت الهم اريد ابررررررررة الظهررررررررررررررررر

صارت الساعه 3 ونص انطوني ابرة الظهر وحطولي طلق اصطناعي وبعدها ما شاء الله ما حسيت بشي لا الم ولا شي بس نايمة واسولف واضحك وية امي وزوجي واشوف بالجهاز الطلق تصعد وتنزل واني ما احس بشي لان ابرة الظهر خدرتني ***ا

صارت الساعه 5 اجت الممرضة فحصتني قالت مفتوح 10 سانتي بس الدكتورة تقول راح ننتظر بعد ساعه لان انتي بكرية وهاي اول ولادة الج …….. مرت الساعه مرور الكرام وصارت الساعه ستة اجت الممرضة قالت راح ننتظر بعد ساعه 😛 حتى تتوسعين اكثر قلت الها اوكي

اني ما اعرف شنو اسوي لان هاي اول مرة وبما اني كنت مخدرة من ابرة الظهر وما احس بالم ولا شي كان عندي التاخير شي عادي

صارت الساعه سبعة اجت الدكتورة فحصتني قالت البيبي نازل وعندك ولادة بس راس البيبي داير على جهة اليسار

لازم ندور الراس لتحت حتى تصير الولادة سهلة لان ما يكدر البيبي يطلع هيج دخلت ايدها وحاولت حاولت ما كدرت تدور البيبي وقالت راح ارجع بعد ساعة وان شاء الله يكون البيبي داير

راحت ورجعت بعد ساعة يعني صارت الساعه 8 بالليل قالت اوكي هسة البيبي داير راسة وصار وقت الدفع

وبدات المعاناة

قوة الدفع كانت تاذيني حييل كل دفعة اصرخ واقول راح امووت زوجي كان بجانبي وامي بالجانب الثاني

واستغرق وقت الدفع من الساعه 8 بالليل الى الساعة 11 بالليل وكل هذا الوقت اني اتالم من الدفع الم مو طبيعي

واخيرا اجى حسوووني خلوه على صدري وبعدها اخذوه على جنب واجى كروب من الدكاترة يمكن شي 8 دكاترة على البيبي

واحد يفحص صوتة واحد يفحص تنفسه واحد يقيس نبضة و واحد يقيس وزنة

ما شا ء الله عناية واهتمام ونظافة بالمستشفى شي مو طبيعي

والممرضات يعني صدق لو قالو ملائكة الرحمة

فترة وصولي للمستشفى الى حين الولادة من الساعه 7 الصبح الى الساعه 11 باليل امي تقول اني اتاخرت بسبب الابرة لان الطلق الطبيعي يساعد على الولادة ويسهلها واني اقول كلامها صحيح بس اني ما اتحملت الالم

وهاي هي قصتي بولادة حسن الله يخليه ويحرسة من كل مكروه يا رب

الله يسهل وييسر ولادة جميع الحوامل يار ب العالمين